නීත්‍යනුකූල ලෙස ලියාපදිංචි නොකර අලි ඇතුන් ළඟ තබා ගත් සියලු දෙනාට එරෙහිව නඩු පැවරීමට පියවර ගන්නා ලෙස නීතිපතිවරයාට නියම කරන මැන්ඩාමුස් රිට් ආඥාවක් අභියාචනාධිකරණය ඊයේ (31) නිකුත් කළේය. එසේම ඔවුන්ට එරෙහිව නීතිමය පියවර ගන්නා ලෙස වනජීවී අධ්‍යක්ෂ ජනරාල්ට, පොලිස්පතිට සහ අපරාධ පරීක්ෂණ දෙපාර්තමේන්තුවට නියම කරන ලදි.
එසේම පරම්පරාවෙන් අලි ඇතුන් තබාගෙන සිටි හිටපු ජනාධිපති ගෝඨාභය රාජපක්ෂ මහතා ඇතුළු මුල් හිමිකරුවන්ට එම සතුන් ලබා දෙන ලෙස ඉකුත් 2021 වසරේ සැප්තැම්බර් මස මාතලේ සහ කොළඹ මහේස්ත්‍රාත් අධිකරණ විසින් නිකුත් කළ නියෝග බල රහිත කරන සර්ටියෝරාරි රිට් ආඥාවක්ද නිකුත් කරන ලදී.
වනජීවී දෙපාර්තමේන්තුව භාරයට ගත් අලි ඇතුන් 15 දෙනකු මුල් අයිතිකරුවන් වෙත මුදාහැරීමට අදාළව නිකුත් කළ ගැසට් නිවේදනයට එරෙහිව ස්වාභාවික හා සංස්කෘතික අධ්‍යයන කේන්ද්‍රය සහ සත්ත්වයන් උදෙසා යුක්තිය නමැති සංවිධානය සහ පරිසර යුක්ති කේන්ද්‍රය ගොනු කල රිට් පෙත්සම් හතරක් විභාග කර අවසන් කර එහි තීන්දුව ප්‍රකාශ කරමින් අභියාචනාධිකරණය මේ නියෝගය කළේය.
සෝභිත රාජකරුණා සහ ධම්මික ගනේපොළ අභියාචනාධිකරණ විනිසුරු මඬුල්ල විසින් මේ තීන්දුව ප්‍රකාශයට පත් කරන ලදි. ඒ අනුව පුද්ගලයන් කිහිප දෙනකු ළඟ සිටියදී වනජීවී දෙපාර්තමේන්තුව භාරයට ගත් අලි ඇතුන් කිසිදු පුද්ගලයකුට ලබාදීමට පියවර නොගන්නා ලෙස අදාළ රජයේ නිලධාරීන්ට නියම කෙරිණි. එසේම පරම්පරාවෙන් අලි ඇතුන් ළඟ තබාගෙන සිටි පුද්ගලයන්ට ලියාපදිංචි කිරීමකින් තොරව එම අලි ඇතුන් නැවත ලබා දීමට අදාළව ඇති රෙගුලාසිද බල රහිත කරන ලදී.
වනජීවී සංරක්ෂණ දෙපාර්තමේන්තුවේ අධ්‍යක්ෂ ජෙනරාල්වරයා, ජාතික සත්ත්වෝද්යාන දෙපාර්තමේන්තුවේ අධ්‍යක්ෂවරයා, පින්නවල, රිදීගම ඇත් අතුරු සෙවණේ අධ්‍යක්ෂ ජෙනරාල්වරයාට සහ කොළඹ මහේස්ත්‍රාත් අධිකරණයේ රෙජිස්ට්‍රාර් වරයා මෙහි වගඋත්තරකරුවෝ වෙති.
බලපත්‍ර නොමැති කම හේතුවෙන් වනජීවී දෙපාර්තමේන්තුව භාරයට ගත් අලි ඇතුන් 15 දෙනකු ඔවුන්ගේ මුල් අයිතිකරුවන් වෙත මුදා හරින ලෙස කොළඹ අතිරේක මහේස්ත්‍රාත්වරයා සහ මාතලේ මහේස්ත්‍රාත්වරයා විසින් නියෝගයක් නිකුත් කර තිබුණි. නීතිපතිවරයා විසින් ලබාදුන් උපදෙස් මත අපරාධ පරීක්ෂණ දෙපාර්තමේන්තුව මගින් කරන ලද ඉල්ලීමකට අනුව අදාළ මහේස්ත්‍රාත්වරුන් විසින් මේ නියෝගය කර ඇතැයි සඳහන් කළ ජනාධිපති නීතිඥවරයා අදාළ මහේස්ත්‍රාත්වරුන් විසින් අලි ඇතුන් මුදාහරින ලෙස දුන් නියෝගය වන සත්ත්ව හා වෘක්ෂලතා ආඥා පනතට පටහැනි බවට පෙත්සම් විභාගයේදී කරුණු ඉදිරිපත් කෙරිණි.
එසේ මුදා හරින ලෙස නියම කර ඇති අලි ඇතුළු පිරිස අතර සිටින සුජීවා නමැති ඇතින්නිය සහ ඇයගේ මාස තුනක් වයසැති පැටියා මුල් අයිතිකරුවන්ට මුදාහරිනු ලැබුවොත් ඇතින්න සහ පැටවා වෙන් කිරීම නිසා දැඩි අගතියක් සිදු විය හැකි බවද එහිදී සඳහන් කෙරිණි. ඉදිරිපත් වූ කරුණු සලකා බැලූ අභියාචනාධිකරණය විනිසුරු මඬුල්ල මේ පෙත්සම පිළිබඳ සිය තීන්දුව ප්‍රකාශයට පත් කරමින් මේ නියෝග නිකුත් කළේය.
ජනාධිපති නීතීඥ සංජීව ජයවර්ධන සහ නීතීඥ ආචාර්ය රවීන්ද්‍රනාත් දාබරේ මහත්වරු පෙත්සම්කරුවන් වෙනුවෙන් පෙනී සිටියහ.
(නෙල්කා මැදගෙදර)
0 Comments