හිටපු සභාපති මෛත්‍රිපාල සිරිසේන මහතාට මන්ත්‍රීවරු 142ක් සමඟ භාර දුන් ශ්‍රී ලංකා නිදහස් පක්ෂය මන්ත්‍රීවරු 2කට බස්සවා විනාශ කළ බව කෘෂිකර්ම හා වැවිලි කර්මාන්ත ඇමැති,ශ්‍රී ලංකා නිදහස් පක්ෂයේ ජ්‍යෙෂ්ඨ උප සභාපති මහින්ද අමරවීර මහතා පැවසීය.
ශ්‍රී ලංකා නිදහස් පක්ෂය මෙසේ විනාශ වී යෑම බලා සිටීමට නෙහැකි වූ නිසා,හිටපු ජනාධිපතිනි චන්ද්‍රිකා බණ්ඩාරනායක කුමාරතුංග මැතිනිය විසින් හිටපූ සභාපති මෛත්‍රිපාල සිරිසේන මහතාට විරුද්ධව අධිකරණමය ක්‍රියාමාර්ගවලට අවතීරණ වූ බව ද අමරවීර මහතා කීය.
හදබිම අධිකාරිය විසින් ක්‍රියාත්මක කර ඇති තරුණ කෘෂි ව්‍යවසායකත්ව ගම්මානවල තරුණ ව්‍යවසාකයන් සඳහා නොමිලේ කුකුළු පැටවුන් ලබාදීම සඳහා වූ ව්‍යාපෘතියේ තිස්සමහාරාමයේ දී පැවැති වැඩසටහනකදී ඇමැතිවරයා මේ බැව් පෙරේදා (17) ප්‍රකාශ කළේය.
මෙහිදී වැඩිදුරටත් ඇමැතිවරයා මෙසේද පැවසීය.
දැන් ශ්‍රී ලංකා නිදහස් පක්ෂය තිබෙන්නේ අපේ අතේ.වැඩ බලන කෑලි දැන් අපේ පක්ෂයේ නැහැ.ශ්‍රී ලංකා නිදහස් පක්ෂය හිටපු සභාපතිගේ කාලේ කෑලිවලට කැඩිලා ගියා. පාක්ෂිකයන්ට අපේ පක්ෂය ගැන කිසිම විශ්වාසයක් තිබුණේ නැහැ.මන්ත්‍රීවරු 142ක් එක්ක අපි හිටපු සභාපති මෛත්‍රිපාල සිරිසේන මහත්තයාට භාර දුන්නු ශ්‍රී ලංකා නිදහස් පක්ෂය අන්තිමට මන්ත්‍රීවරු දෙන්නට බැස්සුවා.හිටපු ජනාධිපතිනි චන්ද්‍රිකා බණ්ඩාරනායක කුමාරතුංග මැතිනිය හිටපූ සභාපතිට විරුද්ධව අධිකරණමය ක්‍රියාමාර්ගවලට ගියේ ශ්‍රී ලංකා නිදහස් පක්ෂය විනාශ වෙනවා බලා ඉන්න බැරි නිසයි.
දැන් ශ්‍රී ලංකා නිදහස් පක්ෂයට නායකයෝ වැඩියි කියා සමහරු කියනවා.ශ්‍රී ලංකා නිදහස් පක්ෂයට ඉන්නේ එකම නායකයයි.ඒ අපේ සභාපති වශයෙන් නීත්‍යානුකූලව පත්වෙලා ඉන්න ඇමැති නිමල් සිරිපාල ද සිල්වා මහතායි.අපි හැමවෙලාවෙම කටයුතු කරන්නේ නීතිය අනුවයි.නීතියට පටහැනි දේවල් අපි කරන්නේ නැහැ.ඒ නිසා තමයි මේ පත් කිරීම් කිසිම දේකට විරුද්ධව හිටපු සභාපතිගේ පාර්ශ්වයේ කිසිම කෙනෙක් නඩු දාන්නේ නැත්තේ.දැන් ශ්‍රී ලංකා නිදහස් ලක්ෂය තිබෙන්නේ අපේ අතේ.අපි මේ පක්ෂය අපේ අතට ගත්තේ නීත්‍යානුකූලවයි.මේ මාසයේ 29 වැනිදා වැල්ලවායේ දී අපි නව සන්ධානයේ දෙවැනි මහජන රැලිය පවත්වනවා.
එදාටත් විශාල පාක්ෂිකයන් පිරිසක් සහභාගි වෙනවා. ඒ වගේම කවුරුවත් නොසිතන දේවල් පවා එදාට සිදුවෙන්න පුළුවන්.ඉදිරියේ දී මීළඟ ජනාධිපතිවරයා පත් කරන්නේ අපේ සන්ධානය මිසක් ඔය අතන මෙතැන අටව ගත්ත සන්ධාන නොවෙයි. අනිවාර්යෙන්ම මීළඟ ජනාධිපතිවරයා වන්නේ අපි සහයෝගය දෙන නායකයායි.
(බුද්ධිකා ඉඹුලාන)
0 Comments