ඩෙල්ෆ්ට් පොලිසිය විසින් නීති විරෝධී ලෙස බලපත්‍රයක් නොමැතිව මත්පැන් බෝතල් 10ක් ළඟ තබා ගෙන සිටි පුද්ගලයෙකු අත්අඩංගුවට ගෙන ඩෙල්ෆ්ට් අධිකරණය වෙත ඉදිරිපත් කොට තිබේ.
එහිදී සැකකරු වරද පිළිගනීම නිසා මත්පැන් බෝතල් 10 ඉදිරි නඩු කටයුතු සඳහා යාපනය අධිකරණ සංකිර්ණයේ ගබඩා කොට තබන ලෙස නියෝග කළ මහේස්ත්‍රාත්වරයා සැකකරුට දඩ නියම කරනු ලැබීය.
අදාළ නඩුව යළි විභාගයට ගත් අවස්ථාවක මත්පැන් අධිකරණයට ඉදිරිපත් කිරීමට සූදානම් කළ අවස්ථාවේදී ඒවායෙහි පැහැය වෙනස් වී තිබීම නිසා මත්පන් බෝතල් පිළිබඳව කළ පරීක්ෂාවකදී එම බෝතල්වල මැත්පැන් වෙනුවට තේ කහට අඩංගු බව පෙනී ගොස් තිබේ.
ඩෙල්ෆ්ට් පොලිසිය විසින් මේ පිළිබඳව අධිකරණයට කරුණු වාර්තා කිරීමෙන් පසුව එහි සාම්පල වැඩිදුර පරීක්ෂණ සඳහා රජයේ රස පරීක්ෂකවරයා වෙත යවන ලෙසද සිද්ධිය සම්බන්ධයෙන් පූර්ණ පරීක්ෂණයක් පවත්වන ලෙසද ඩෙල්ෆ්ට් මහේස්ත්‍රාත්වරයා නියෝගකොට තිබේ.
ඒ අනුව යාපනය අධිකරණයේ රෙජිස්ට්‍රාර්වරයා ඇතුළු පිරිසක් මේ සිද්ධිය සම්බන්ධයෙන් පොලිසියේ සහාය ඇතිව වෙනම පරීක්ෂණයක් ආරම්භ කොට ඇත.
මත්පැන් බෝතල් 10ම අධිකරණයේ මුද්‍රා සහිතව ගබඩා කොට තිබියදී මත්පැන් බෝතල්වලට කවරෙකු විසින් හෝ තේ කහට පුරවා මත්පැන් ඔවුන් විසින් ලබා ගන්නට ඇතැයි පොලිසිය සැකකරයි.
රසුල දිල්හාර ගමගේ
0 Comments