ශ්‍රී ලංකා සම්භවයක් සහිත උමා කුමාරන් මහත්මිය බ්‍රිතාන්‍යයේ ලබන 4 වැනිදා පැවැත්වෙන මහ මැතිවරණයේ දී කම්කරු පක්ෂය නියෝජනය කරමින් එරට පාර්ලිමේන්තුවට තේරී පත්වීමේ බලාපොරොත්තුවෙන් තරග කරන බව එරට මාධ්‍ය වාර්තා කළේය. සී 40 සිටීස් දේශගුණික නායකත්ව කණ්ඩායමේ රාජ්‍යතාන්ත්‍රික හා ජාත්‍යන්තර සබඳතා පිළිබඳ හිටපු අධ්‍යක්ෂ ධුරයක් ද දරා ඇති කුමාරන් මහත්මිය මෙවර ස්ට්‍රැට්ෆෝඩ් සහ බවු ආසනයෙන් මහ මැතිවරණයට තරග කරන බව බ්‍රිතාන්‍ය මාධ්‍ය පෙන්වා දුන්නේය.
නැගෙනහිර ලන්ඩනයේ උපත ලද කුමාරන් මහත්මිය ක්වීන්ස් මේරි විශ්ව විද්‍යාලයෙන් ඉගෙනුම ලබා ඇති බවත් ඇය බ්‍රිතාන්‍ය සෞඛ්‍ය සේවයට අනුයුක්තව රැකියාවේ නිරත වී ඇති බවත් එරට මාධ්‍ය පැවැසුවේය.දේශපාලන උපාය මාර්ග සහ උපදේශනය පිළිබඳ වසර 16 කට වැඩි අත්දැකීමක් ඇයට තිබෙන බවත් කම්කරු පක්ෂයට තිරය පිටුපස සිට ඇය උපදේශනය සපයා ඇති බවත් බ්‍රිතාන්‍ය මාධ්‍ය පැවැසුවේය.
කුමාරන් මහත්මියගේ මවුපියන් 80 දශකයේ දී ශ්‍රී ලංකාවේ සිට සරණාගතභාවය අපේක්ෂාවෙන් බ්‍රිතාන්‍යයට පැමිණ ඇති බවත් එතැන් සිට වසර 40 කට අධික කාලයක් ඔවුන් බ්‍රිතාන්‍යයේ ජීවත්ව ඇති බවත් බ්‍රිතාන්‍ය මාධ්‍ය සඳහන් කළේය. උමා කුමාරන්ගේ මුත්තණුවන් යාපනයේ ක්‍රියාකාරී වෘත්තීය සමිති නායකයකුව සිට ඇති බැවින් දේශපාලනය ඇයට උපතින්ම පිහිටා ඇතැයි එරට මාධ්‍ය වාර්තා කළේය.
විමුක්ති එස්. රුද්‍රිගු
0 Comments