ස්කැනර් යන්ත්‍රයක් රැගෙන විත් ආණමඩුව පෙරමාකුත්තුව ප්‍රදේශයේ නිවෙසක කැණීම් කර රත්‍රන් සෙවීමේ නිරත වූ පුත්තලම කොට්ඨාස විශේෂ අපරාධ විමර්ශන අංශයේ ස්ථානාධිපතිවරයා ඇතුළු නිලධාරීන් සිව් දෙනකු වහාම එම ඒකකයෙන් ඉවත් කර ස්ථාන මාරු දී ඇති බව පුත්තලම නියෝජ්‍ය පොලිස්පති නාලක සිල්වා මහතා ඊයේ (7) පැවසිය.
ඒ අනුව පුත්තලම කොට්ඨාස විශේෂ අපරාධ විමර්ශන අංශයේ ස්ථානාධිපති (ප්‍ර.පො.ප) තෙන්නකොන් රාජපක්ෂ කොස්වත්ත පොලිස් ස්ථානයටත්, පොලිස් සැරයන් බස්නායක (35898) කල්පිටියටත්, (පො.කො) අබේසිංහ (87744) තොඩුවාවටත්, (පො.කො) 84135 සේනානායක ආරච්චිකට්ටුවටත් ස්ථාන මාරු ලබා තිබේ.
විශේෂ අපරාධ විමර්ශන අංශයේ නිලධාරීන් ආණමඩුව පෙරමාකුත්තුව නිවෙසට පසුගිය මැයි මාසයේ පැමිණ ඇති බවත්, ඉන් පසුව පාෂණ හෝ වෙනත් භූගතව ඇති දෑ සෙවීමට යොදාගන්නා ස්කෑනර් යන්ත්‍රයක් යොදාගනිමින් අදාළ නිවෙස තුළ කැණීම් කර ඇති බවත් එම යන්ත්‍රයෙන් ලබා දුන් කිසියම් සංඥාවක් අනුව අදාළ ස්ථානය කිසිදු ලෙසකින් හෝ කැණීමක් නොකරන ලෙස දන්වා නිවෙසින් පිට වී ගිය බවත් නිවැසියන් විසින් මේ සම්බන්ධව විමර්ශන කරන පොලිස් කණ්ඩායම් වෙත ප්‍රකාශ දී තිබිණි. ඉන් පසුව නැවතත් ජූනි 2 දින නැවත අදාළ නිලධාරීන් පිරිස මේ නිවෙසට පැමිණ අදාල නිවස තුළ නිවැසියන්ගේ විරෝධතා මැද කැණීම් කර තිබේ. පසුව මේ පිළිබඳ පොලිස් හදිසි ඇමතුම් ඒකකයට 119 ලැබුණු පැමිණිල්ලක් මත ආණමඩුව පොලිස් ස්ථානයේ නිලධාරීන් දෙදෙනකු පැමිණ ඇති බවත් ඒ වන විටත් අදාළ නිලධාරීන් නිවෙස තුළ කැණීම් කරමින් ඇති බව පරීක්ෂණවලදී හෙළි වී තිබේ.
පසුව මේ පිළිබඳ ආණමඩුව, හලාවත හා කරුවලගස්වැව යන පොලිස්ථානවල නිලධාරීන් විසින් මේ සදහා පරීක්ෂණ සදහා යොදවා තිබිණි. කෙසේ නමුත් මේ වන විට සිදු කළ පරීක්ෂණවලදී හෙළි වී ඇත්තේ මේ කැණීම කළ පොලිස් නිලධාරීන් කණ්ඩායම ඒ සම්බන්ධයෙනන් කිසිදු ඉහළ නිලධාරියකු දැනුවත් කර නැති බවයි.
අදාළ පොලිස් කණ්ඩායම් කැණීම් කළ නිවෙසේ හිමිකරු 2017 වසරේ ගසකින් ඇද වැටීමෙන් මරණයට පත්ව ඇති බවත්, එයින් පසු ඔහුගේ බිරිය මානසික ආතතියට පත්වි ප්‍රතිකාර ලබමින් සිටින බවද ඇයගේ ඥාතින් විසින් දරුවන් තිදෙනා හා ඇයගෙ රැකවරණය ලබා දෙමින් සිටින පසුබිමක මේ පොලිස් කණ්ඩායම අදාළ නිවෙසේ රත්‍රන් වළ දමා ඇති බව පවසමින් කැණීම් කිරීම බරපතළ තත්ත්වයක්ව තිබේ. මේ සිද්ධිය පිළිබඳව පුත්තලම නියෝජ්‍ය පොලිස්පති නාලක සිල්වා මහතාට මේ සිද්ධිය පිළිබඳ විධිමත් පරීක්ෂණයක් පවත්වන ලෙස වයඹ ජ්‍යෙෂ්ඨ නියෝජ්‍ය පොලිස්පතිවරයා උපදෙස් දී තිබේ.
(හිරාන් ප්‍රියංකර ජයසිංහ)
0 Comments