බණ්ඩාරනායක සමන්ත්‍රණ ශාලාවේ පැවැති කාර්මික ප්‍රදර්ශනයේ ලංකා කාර්මික සංවර්ධන මණ්ඩලයේ වෙළෙඳ කුටියේ රාජකාරි කළ සේවකයකු එම පරිශ්‍රයේදී හදීසියේ මිය යෑමේ සිද්ධිය සම්බන්ධයෙන් විමර්ශනයක් ආරම්භ කළ බව කුරුදුවත්ත පොලිසිය කොළඹ ප්‍රධාන මහේස්ත්‍රාත් තිළිණ ගමගේ මහතා ඉදිරියේ ඊයේ (24) කරුණු වාර්තා කළේය.
කාර්මික ප්‍රදර්ශනය අවසානය දිනය වූයේ ඉකුත් 23 වැනිදා කාර්මික සංවර්ධන මණ්ඩලයේ නිලධාරීන් විසින් පවත්වනු ලැබූ සතුටු සාදය අවසානයේදී අනෙක් පිරිස බස් රථවලින් පිටත්ව ගොස් ඇති අතර මෙම පුද්ගලයා බණ්ඩාරනායක සම්මන්ත්‍රණ ශාලාවේ සිරිමාවෝ ශාලාව ඉදිරිපිට වැටී සිටි බවට එම සම්න්ත්‍රණ ශාලාවේ පොලිස් මුරපොළේ ස්ථානාධිපතිවරයා තම පොලිසියට පැමිණිල්ලක් කළ බව කුරුඳුවත්ත පොලිසිය අධිකරණයට කරුණු ඉදිරිපත් කර ඇත.
ඒ අනුව මෙලෙස මියගොස් සිටියේ අංක 577/13ඒ, ගාලුපාර, රාවතාවත්ත, මොරටුව ලිපිනයේ පදිංචි කටුබැද්ද කාර්මික සංවර්ධන මණ්ඩලයේ සේවකයකු වන විජේ ජේසුදාසන් නමැත්තකු බව ද කුරුඳුවත්ත පොලිසිය අධිකරණයට කරුණු වාර්තා කර තිබේ.
මෙම මරණය සම්බන්ධයෙන් කාර්මික සංවර්ධන මණ්ඩලයේ නිලධාරියකුගෙන් සහ මරණකරුගේ බිරියගෙන් ප්‍රකාශ සටහන් කරගෙන ඇති බවත් මරණකරු වැටී සිටි ස්ථානයේ සොකෝ නිලධාරීන්ගේ පරීක්ෂාවට ලක්කළ බවත් සඳහන් කළ කුරුඳුවත්ත පොලිසිය මෙම සැකකටයුතු මරණය සම්බන්ධයෙන් මහේස්ත්‍රාත් පරීක්ෂණය පැවැත්වීම සඳහා අවසර ලබා දෙන ලෙසට අධිකරණයෙන් ඉල්ලීය. ඒ අනුව කොළඹ අතිරේක මහේස්ත්‍රාත් බණ්ඩාර ඉලංගසිංහ මහතා එම ස්ථානයට ගොස් මහේස්ත්‍රාත් මරණ පරීක්ෂණය සිදු කළ අතර පශ්චාත් මරණ පරීක්ෂණයක් සිදු කර අධිකරණයට වාර්තාවක් ඉදිරිපත් කරන ලෙසට එහිදී මහේස්ත්‍රාත්වරයා කොළඹ ජාතික රෝහලේ අධිකරණ වෛද්‍යවරයාට නියෝග කළේය.
කුරුඳුවත්ත පොලිසියේ පොලිස් සැරයන් 18680 සමන් රාජපක්ෂ මහතා සිද්ධිය සම්බන්ධයෙන් අධිකරණයට කරුණු ඉදිරිපත් කළේය.
(නිමන්ති රණසිංහ)
0 Comments