බිත්තර නිෂ්පාදන ගොවිපළවලට අවශ්‍ය කිකිළි පැටවෙකුගේ මිල ඊයේ (27දා) වන විට රුපියල් දහසක් දක්වා ඉහළ ගොස් තිබෙන බවත්, මේ නිසා කුඩා පරිමාණ බිත්තර ගොවිපළ හිමියන් දැඩි දුෂ්කරතාවන්ට පත්ව සිටින බව සමස්ත ලංකා කුඩා කර්මාන්ත හිමියන්ගේ සංගමය සඳහන් කරයි. දෛනිකව බිත්තර අවශ්‍යතාවෙන් වැඩිම කොටසක් ලබා දෙන්නේ කුඩා පර්මාණ ගොවිපළ හිමියන් විසින් බවත්, 2022 වසරේ සිට ඇති වූ ආර්ථික අර්බුදය නිසා මේ දක්වා කාලයෙහිදී කුඩා පරිමාණ බිත්තර ගොවිපළවල් අතිවිශාල ප්‍රමාණයක් වැසී ගොස් තිබෙන බවත් එම සංගමයේ සභාපති නිරීක්ෂ කුමාර මහතා සඳහන් කළේය.
දෛනික බිත්තර අවශ්‍යතාව මේ වන විට බිත්තර ලක්ෂ අසූවක් බවත් දේශීය වශයෙන් නිෂ්පාදනය කරනු ලබන්නේ බිත්තර ලක්ෂ 50-60 අතර ප්‍රමාණයක් බවත් හෙතෙම පවසා සිටියේය. 2022 වසරේ අගෝස්තු මාසයේ සිට කුඩා පරිමාණ බිත්තර ගොවිපොළවල් අර්බුදයට ලක් වීම නිසා මව් සතුන්ගේ මිල සහ සත්ත්ව ආහර හා විටිමින් වර්ගවල මිල අඩු කිරීමේ වැඩපිළිවෙළක් සකස් කරන ලෙස එම වකවානුවේ සිටම බලධාරීන්ගෙන් ඉල්ලා සිටියද සිදුකරනු ලැබුවේ ගැටලුවට විසඳුම් ලබා නොදී ඉන්දියාවෙන් යම් බිත්තර ප්‍රමාණයක් රැගෙන විත් වෙළෙඳ පොළ හිඟය අඩු කිරීම බවද ඒ මහතා සඳහන් කළේය.
මේ වන විට ඉන්දියාවෙන් ගෙන්වන බිත්තර ප්‍රමාණය සිඹා වී තිබෙන බවත්, මේ අනුව පවතින බිත්තර හිඟය නිසා ඇතැම් ප්‍රදේශවල බිත්තරයක සිල්ලර මිල රු. 60 දක්වා ඉහළ ගොස් තිබෙන බවත්, බිත්තර මිල ඉහළ යෑමට සාපේක්ෂව හොඳ මව් සතෙකුගේ මිල රු.1000ක් දක්වා ඉහළ ගොස් තිබෙන බවත් හෙතෙම පවසා සිටියේය.පසුගිය කාලයේදී මව් සතෙකු රුපියල් 700 -රු. 900 අතර මිලකට අලෙවි වූ බවත්, මේ වන විට මව් සතුන්ගේ හිඟයක්ද නිර්මාණය වී තිබෙන බවත්, මේ නිසා රජය මැදිහත් වී සහන ලබා දී හෝ මව් සතුන්ගේ ගැටලුවට විසඳුමක් ලබා දිය යුතු බවත් නිරීක්ෂ කුමාර මහතා සඳහන් කළේ ය.
ඉන්දික හේවාවිතාරණ
0 Comments