කොළඹ දවටගහ පල්ලිය බිඳ එහි කාමරයක තිබූ ලැප්ටොප් වර්ගයේ ජංගම දුරකතනයක් සොරා ගැනීමේ සිද්ධියක් සම්බන්ධයෙන් විමර්ශනයක් ආරම්භ කර ඇතැයි කුරුඳුවත්ත පොලිසිය කොළඹ ප්‍රධාන මහේස්ත්‍රාත් තිළිණ ගමගේ මහතා ඉදිරියේ ඊයේ (24) කරුණු වාර්තා කර ඇත.
මෙම සිද්ධිය සම්බන්ධයෙන් කුරුඳුවත්ත පොලිසියට පැමිණිල්ලක් ඉදිරිපත් කරනු ලැබ තිබුණේ රාවතාවත්ත මොරටුව ලිපිනයේ තෙල්ගේ මිරාජ් ප්‍රියංක ශ්‍රීනාත් පීරිස් නමැති කොළඹ 07 බැප්චිට් චැපැල් පල්ලියේ (කොළඹ දවටගහ පල්ලියේ) කළමනාකාරවරයා විසිනි.
පල්ලියේ ආරක්ෂාව සඳහා පුද්ගලික ආරක්ෂක සේවයක නිලධාරීන් යොදවා තිබූ බවත්, ඔවුන් පැය විසිහතරේම සේවය ලබා දෙන බවත් සඳහන් කර ඇති පැමිණිල්ල පල්ලියේ යතුර භාරව සිටින්නේ අරුල්දාස් පොන්නයියා යන අය බවත් සඳහන් කර ඇතැයි කුරුඳුවත්ත පොලිසිය අධිකරණයට කරුණු ඉදිරිපත් කර ඇත.
ඉකුත් 19 වැනිදා සවස පල්ලිය වසා දැමූ පසු අලුයම් කාලයේදී කිසිවකු හෝ පල්ලියේ පිටුපස කාමරයේ දොර විවෘත කර එහි තිබූ යකඩ කබඩ් එකක් විවෘත කර එහි සියල්ල ඇද දමා ඇති බවත් එහි තිබූ ලැප්ටොප් පරිගණකයක් සොරාගෙන ඇති බවත් පැමිණිල්ල සඳහන් කර ඇතැයි කුරුඳුවත්ත පොලිසිය අධිකරණයට කරුණු වාර්තා කර තිබිණ.
එසේම, පල්ලියේ ඉදිරිපස දොරක අගුලක් බිඳ දමා ඇති බව ද දැකගත හැකි බවට ද පැමිණිල්ල සඳහන් කර තිබූ අතර, පල්ලියේ සී.සී.ටී.වී. පරීක්ෂාවට ලක් කර බවත් ඇඟිලි සලකුණු කිහිපයක් ද සොයා ගත් බවත් කුරුඳුවත්ත පොලිසිය අධිකරණයට කරුණු ඉදිරිපත් කළේය.
ඒ අනුව සැකකරු වහාම අත්අඩංගුවට ගෙන අධිකරණයට ඉදිරිපත් කිරීමට පරීක්ෂණ පවත්වන බව ද මෙහිදී කුරුඳුවත්ත පොලිසියේ අධිකරණ අංශයේ පොලිස් සැරයන් 18680 සමන් රාජපක්ෂ මහතා අධිකරණයට කරුණු ඉදිරිපත් කරමින් සඳහන් කළේය.
ඉදිරිපත් වූ කරුණු සැලකිල්ලට ගත් අධිකරණය සැකකරුවන් වහාම අත්අඩංගුවට ගෙන අධිකරණයට ඉදිරිපත් කරන ලෙසට කුරුඳුවත්ත පොලිසියට නියෝග කරමින් නඩුව කල් තැබීය.
(නිමන්ති රණසිංහ)
0 Comments