සති අග ඉංග්‍රීසි පුවත්පත්වල මංගල දැන්වීම් පළකර පියකු සහ පුතකු ලෙස ද්විත්ව රංගනයක යෙදෙමින් මත්ද්‍රව්‍ය වලට පුනරුත්ථාපන වූ පුද්ගලයෙකුගේ හැඳුනුම්පත යොදාගෙන මුදල් වංචාවේ යෙදුනු සේවය අත්හැර ගිය යුද හමුදා මේජර් වරයෙකු අත්අඩංගුවට ගත් බව පරිගණක අපරාධ කොට්ඨාසය කියයි.
සැකකරු වංචාව සඳහා යොදාගත් ජංගම දුරකථන දෙකක් රවුටරයක් සහ ලැප්ටොප් පරිගණකයක් පොලිස් භාරයට ගෙන ඇත.
මොරටුව විශ්ව විද්‍යාලයෙන් ඉංජිනේරු උපාධිය ලබා ඇති 28 හැවිරිදි එකම පුතුට කොළඹ ප්‍රදේශයෙන් රූමත් මනමාලියක් බලාපොරොත්තු වන බවට පියා වශයෙන් හඳුන්වා සති අග ඉංග්‍රීසි පුවත්පතක සැකකරු පළ කර තිබූ මංගල දැන්වීමකට කොළඹ ප්‍රදේශයේ රජයේ විශ්‍රාම ලැබූ ධනවත් යුවළකගේ විශ්ව විද්‍යාලයක අවසන් වසරේ සිසුවියක් වන එකම දියණියකගේ මවක් එම මංගල දැන්වීමේ තිබූ දුරකථන අංකයකට කතා කර අදහස් හුවමාරු කරගෙන තිබූ බව පොලිසිය කියයි.
දෙපාර්ශවයේ අදහස් මූලිකව ගැලපෙන බැවින් පුතුගේ ඡායාරූපයක් එවන ලෙස දැනුම් දීමෙන් අනතුරුව වට්සැප් තාක්ෂණය ඔස්සේ කඩවසම් තරුණයකුගේ ඡායාරූපයක් සැකකරු විසින් එම යුවළ වෙත එවා තිබූ බව පොලිසිය කියයි.
ප්‍රියමනාප පෙනුමකින් යුත් කඩවසම් තරුණ අනාගත බෑනා සමග තොරතුරු හුවමාරු කර ගැනීමට ද අවස්ථාව සලසා දීමට දෙමව්පියන් විසින් කටයුතු කර තිබූ අතර ඒ අනුව වට්ස්ඇප් තාක්ෂණය ඔස්සේ ඔහු නොවුන් අදහස් කරගෙන තිබූ බව පොලිසිය කියයි.
ඒ අතරතුර තරුණියගේ මවුපියන්ද සැකකරු හා දුරකථනයෙන් සම්බන්ධ වෙමින් අපි රුපියල් කෝටියක දෑවැද්දක් ලබා දෙන බවත් පැවසීමේදී අපි දෑවැද්ද බලාගෙන දරුවෝ ගන්නේ නෑ යයි සැකකරු පවසා තිබූ බවද පොලිසිය සඳහන් කරයි.
මාසයක් පමණ ගතවෙද්දී හිටිහැටියේම තරුණියගේ දුරකථනයට කතා කර තිබූ තරුණයා යැයි හඳුන්වා ගත් පුද්ගලයා තමන් සමාජ සේවා කටයුතු කරන බවත් ආබාධිත දරුවෙකුගේ පරීක්ෂණයක් සඳහා මුදල් පරිත්‍යාගයක් සිදු කරන බවත් හැකි උපකාරයක් සිදු කරන ලෙසත් තරුණියට පවසා ඇත.
ඔහු ඒ බව තහවුරු කිරීම සඳහා මුහුණු පොතේ පල කර තිබූ සමාජ සත්කාරක ඡායාරූප කීපයක්ද තරුණිය වෙත ඒවා විශ්වාසය දිනා ගැනීමටද කටයුතු කර තිබිණි.
අහක දැමිය නොහැකි තරමට ඔහු නොවුන් කතා බහෙන් ලන් වී ඇති බැවින් තරුණිය ඔහු ලබා දුන් ගිණුම් අංකයකට රුපියල් 30000/= බැරකර යි සමීප හිතවතුන්ට සහ ඥාතීන්ට ඒ බව පවසා තවත් රුපියල් ලක්ෂ දෙකකට අධික මුදලක් බැංකු ගත කර ඇති බව විමර්ශනවලදී අනාවරණය වී ඇත.
දින කීපයක් ගතවෙද්දී තරුණියගේ මවුපියන් විසින් තරුණයාගේ පියා වන මංගල දැන්වීම පළ කළ පුද්ගලයා වෙත ඇමතුමක් ලබා දී තම නිවසට පැමිණෙන ලෙස ආරාධනා කර ඇති අතර එම ආරාධනාව ඉහලින්ම පිළිගෙන තිබූ සැකකරු නිවසට පැමිණෙන දිනයේදී දුරකථන සියල්ල විසන්ධිකර , වට්සැප් ද අක්‍රීයකර තිබී ඇතැයි පොලිසිය කියයි.
තමන් මහා වංචාවකට හසුව ඇති බව දැනගත් විශ්‍රාමික යුවළ පරිගණක අපරාධ කොට්ඨාසය වෙත පැමිණ කළ පැමිණිල්ලක් අනුව සිදුකළ විමර්ශන වලදී සැකකාර යුද්ධ හමුදා මේජර්වරයා තරුණියගේ වෙත ලබා දී තිබූ දුරකථන අංක, එලෙසම තරුණිය වෙත ලබා දී තිබූ බැංකු ගිණුම් අංක ඔහුගේ නමට ලියාපදිංචි වූ ඒවා නොවන බවත් එය දකුණු පළාතේ මත්ද්‍රව්‍ය වලට සම්බන්ධ පුනරුත්ථාපනය වූ පුද්ගලයකුගේ නැති වු හැඳුනුම්පතක පිටපතක් ලබාදී සකස් කර ගත් ඒවා බවට පරීක්ෂණවලදී අනාවරණය වී යැයි පොලිසිය කියයි.
අනතුරුව විමර්ශන නිලධාරීන් සීසීටීවී කැමරා 20 කට ටික ප්‍රමාණයක දර්ශන විශාල ප්‍රමාණයක් පරික්ෂා කර පියකු සහ පුතෙකු ලෙස ද්විත්ව රංගනයක යෙදුණු සැකකාර යුද හමුදා මේජර්වරයා නිට්ටඹුව වතුපිටිවල බෝඩිම් කාමරයක සැඟව සිටියදී අත්අඩංගුවට ගැනීමට සමත් විය.
සැකකරු තරුණිය හා මවුපියන් සමඟ කතා කර කරන ලද එම කාලය තුළ කිසිදු අවස්ථාවක එකම සිංහල වචනයක් හෝ කතා නොකර චතුර ලෙස ඉංග්‍රීසි බසින් පමණක් කතා කර ඇති බවත් පොලිස් විමර්ශනවලදී වැඩිදුරටත් අනාවරණය වී ඇත.
59 හැවිරිදි සැකකරු අධිකරණය වෙත ඉදිරිපත් කිරීමට නියමිතය.
පරිගණක අපරාධ කොට්ඨාසයේ ජ්‍යෙෂ්ඨ පොලිස් අධිකාරී දර්ශිකා කුමාරි , ස්ථානාධිපති පොලිස් පරීක්ෂක නදීකා ගුණසේකර මහත්මියගේ මෙහෙයවීමෙන් උපපොලිස් පරීක්ෂක ඉසුරු ගුණතිලක පොලිස් සැරයන් ගුණරත්න හා රජිත මහත්වරු පරීක්ෂණ පවත්වති.
(බණ්ඩාරගම- බිමල් ජයසිංහ)
0 Comments