තමන් යටතේ සේවය කරන ලිපිකාරිනියක සිප වැළඳ ගැනීමෙන් ඇයට ලිංගික අතවර කිරීමේ චෝදනාවට පෞද්ගලික ආයතනයක මානව සම්පත් කළමනාකාරවරයකු වරදකරු කළ අභියාචනාධිකරණය ඔහුට බරපතළ වැඩ සහිතව වසර 7 ක සිර දඬුවමක් නියම කළේය.ඊට අමතරව අතවරයට පත්වූ ලිපිකාරිනියට රුපියල් 7,50,000 ගෙවන ලෙසද ඔහුට නියම කෙරිණි.
අභියාචනාධිකරණය මෙසේ නියෝග කෙරුණේ අතවරයට පත්වූ ලිපිකාරිනිය ගොනුකර තිබූ අභියාචන පෙත්සමක තීන්දුව ප්‍රකාශයට පත්කරමිනි. අභියාචනාධිකරණ විනිසුරුවන් වන සම්පත් අබේකෝන් සහ පී. කුමාරරත්නම් යන මහත්වරුන් විසින් ප්‍රකාශිත තීන්දුවේ මෙසේ සඳහන් වේ. අභියාචන පෙත්සම්කාරිය පෞද්ගලික සමාගමක ලිපිකාරිනියක වශයෙන් සේවය කරමින් සිටියදී එහි මානව සම්පත් කළමනාකරු විසින් ඇය සිප වැළඳගන්නා ලදැයි චෝදනා කරමින් නීතිපතිවරයා විසින් මහාධිකරණයේ නඩු පවරා තිබිණි.
මෙම නඩුව විභාගයට ගැනීමෙන් අනතුරුව 2015 සැප්තැම්බර් 16 වැනිදා තීන්දුව ප්‍රකාශයට පත් කරමින් විත්තිකරු නිදොස් කොට නිදහස් කරන ලදී. විත්තිකරුට සැකයෙහි වාසය ලබාදීම නිසා ඔහු නිදහස් කරන බව තීන්දුවේ සඳහන් කර ඇති අතර තීන්දුවෙන් අගතියට පත් පෙත්සම්කාරිය අභියාචන පෙත්සම අභියාචන අධිකරණය හමුවේ ගොනු කළාය.ඉදිරිපත් වූ කරුණු සලකා බැලීමේදී විත්තිකරුට එරෙහිව ඇති සියලු චෝදනා සැකයෙන් තොරව ඔප්පු වී ඇති බව තීන්දු කළ අභියාචනාධිකරණය විත්තිකාර මානව සම්පත් කළමනාකාරවරයාට බරපතළ වැඩ සහිත වසර 7ක සිර දඬුවමක් නියම කළේය. ඊට අමතර රුපියල් 7,50,000 ක වන්දි මුදලක් පෙත්සම්කාර ලිපිකාරිනියට ගෙවන ලෙසට නියෝග කෙරිණ.
(රන්ජන් කටුගම්පොළ)
0 Comments