කැමරාවක් විකිණීම සඳහා ‘ඉක්මන් ඩොට් එල් කේ වෙබ් අඩවියේ’ පළ කර තිබූ දැන්වීමකට අනුව එම කැමරාව මිලදී ගැනීමට සූදානම් වූ රූපවාහිනී ආයතනයක කැමරා ශිල්පියකුගේ රුපියල් ලක්ෂ 23ක මුදලක් ලබාගෙන වංචා කිරීමේ සිද්ධියකට අදාළව කුරුඳුවත්ත පොලිසිය අත්අඩංගුවට ගනු ලැබූ තරුණියක සහ තරුණයකු එක් අයකුට රුපියල් ලක්ෂ 5 බැගින් වූ ශරීර ඇප දෙකක් මත මුදා හැරීමට කොළඹ ප්‍රධාන මහේස්ත්‍රාත් තිළිණ ගමගේ මහතා ඊයේ (19) නියෝග කළේය.
මෙම සිද්ධියට අදාළ ප්‍රධාන සැකකරු වහාම අත්අඩංගුවට ගෙන අධිකරණයට ඉදිරිපත් කරන ලෙස ද මෙහිදී මහේස්ත්‍රාත්වරයා කුරුඳුවත්ත පොලිසියට නියෝග කළේය.
මෙලෙස ඇප මත මුදාහරිනු ලැබුවේ වල්පිට, වටවල පදිංචි මාපා හිටිහාමිලාගේ ගමේතැන්නේගෙදර තරංග නිශ්ශංක සේනාරත්න සහ සපුගස්කන්ද මාකොල පදිංචි ගුණරත්න මහ විදානගේ මධුෂිකා සෙව්වන්දි රණතුංග යන අයවළුන්ය.
මෙම සිද්ධිය සම්බන්ධයෙන් කුරුඳුවත්ත පොලිසියට පැමිණිල්ලක් ඉදිරිපත් කරනු ලැබ තිබුණේ කැමරා ශිල්පියකු වන මීරිගම පදිංචි ගස්පේ රාළලාගේ ගයාන් දිසාන්ත යන අය විසිනි.
රුපියල් 23ක් වටිනා කැමරාවක් විකිණීම සඳහා ඉක්මන් ඩොට් එල් කේ වෙබ් අඩවියේ දැන්වීමක් පළ කර තිබූ බවත් එම දැන්වීමට අනුව කිහිප වතාවක්ම අදාළ දැන්වීමේ සඳහන් පුද්ගලයා සමඟ සම්බන්ධ වූ බවත් පැමිණිල්ල සඳහන් කර ඇතැයි කුරුඳුවත්ත පොලිසිය අධිකරණයට කරුණු ඉදිරිපත් කර ඇත.
පසුව අවස්ථා දෙකකදී පැමිණිලිකරුගේ බිරියගේ බැංකු ගිණුමෙන් රුපියල් ලක්ෂ 23ක මුදලක් දැන්වීම්කරු සඳහන් කළ බැංකු ගිණුමකට යොමු කළ අතර පසුව කැමරාව මිලදී ගැනීම සඳහා ඔවුන් කියූ ස්ථානයට ගිය පසු කිසිඳු පුද්ගලයකු එම ස්ථානයට නොපැමිණි බවත් දුරකතන අංක ද විසන්ධි කර තිබූ බවත් කියමින් පැමිණිලිකරු සිය පැමිණිල්ලෙන් කරුණු ඉදිරිපත් කර තිබූ බව කුරුඳුවත්ත පොලිසිය අධිකරණයට දැනුම් දුන්නේය.
මෙම සිද්ධියට අදාළ විමර්ශන සිදුකිරීමේදී සැකකරුගේ බැංකු ගිණුමට මුදල් බැරවී තිබූ අතර සැකකාරිය විසින් සැකකරුගේ බැංකු ගිණුම් අංකය මෙහි ප්‍රධාන සැකකරුට ලබාදී ඇතැයි කරුණු අනාවරණය වූ බව කුරුඳුවත්ත පොලීසිය අධිකරණයට දැනුම් දුන්නේය.
මෙම සැකකරුවන් දෙදෙනා ඥාතීන් වන අතර, මෙහි ප්‍රධාන සැකකරු සැකකාරියගේ පැරණි පෙම්වතකු බවත් මේ වන විට ඔහු සම්බන්ධයෙන් තොරතුරක් ඇය නොදන්නා බවට ප්‍රකාශ කර තිබූ බවත් පොලිසිය අධිකරණයට දැනුම් දුන්නේය.
ඒ අනුව මෙම සිද්ධිය අදාළ ප්‍රධාන සැකකරු වහාම අත්අඩංගුවට ගෙන අධිකරණයට ඉදිරිපත් කරන ලෙසට මහේස්ත්‍රාත්වරයා පොලිසියට නියෝග කරමින් සැකකරුවන් දෙදෙනාට ඇප නියම කළේය.
(නිමන්ති රණසිංහ)
0 Comments