හිටපු ඇමැති ජොන්ස්ටන් ප්‍රනාන්දු මහතා ආහාර, සමුපකාර හා අභ්‍යන්තර වෙළෙඳ ඇමැතිවරයා ලෙස කටයුතු කළ සමයේ රාජකාරි කටයුතුවලින් බැහැරව දේශපාලන හා පෞද්ගලික කටයුතු සඳහා සතොස සේවකයන් 39 දෙනකු යොදා ගැනීමෙන් රජයට පාඩු කළ බවට චෝදනා කර පවරා තිබූ නඩුවක් විභාගයට ගැනීමට එරෙහිව
විත්තිය මතු කළ මූලික විරෝධතාව ප්‍රතික්ෂේප කළ කොළඹ මහාධිකරණ විනිසුරු නවරත්න මාරසිංහ මහතා නඩුව විභාග කිරීමට ඊයේ (10) නියෝග කළේය.විත්තිකරුවන්ට එරෙහිව නීතිපතිවරයා ගොනු කළ අධිචෝදනා පත්‍රයේ අයථා ගෙවීම් කළ තැනැත්තන් 39 දෙනකු ගැන සඳහන් වුවද ඔවුන්ගේ නම් හෝ කළ ගෙවීම් පිළිබඳ චෝදනා පත්‍රයේ හෝ නඩු භාණ්ඩ ලේඛනයේ සඳහන්ව නොතිබීම ගැන මූලික විරෝධතාවක් මතු කරන ලදී.
අදාළ තොරතුරු නඩුව සමඟ ඉදිරිපත් කළ දෘඪ තැටියක් මඟින් විත්තියට දී ඇති බව පැමිණිල්ල කියා සිටින ලදී. එහි ලිඛිත පිටපතක් වහාම පැමිණිල්ලට දීමට නියෝග කළ මහාධිකරණ විනිසුරු නවරත්න මාරසිංහ මහතා නඩුව පවත්වා ගෙන යෑමට නියෝග කළේය.
ජොන්ස්ටන් ප්‍රනාන්දු මහතා වෙළඳ අමාත්‍යවරයා වශයෙන් කටයුතු කළ 2010 - 2015 දක්වා කාලය තුළදී සතොස ආයතනයේ සේවකයන් ඔවුන්ගේ නිල රාජකාරිවලින් ඉවත් කර එම ආයතන මඟින් වැටුප් ගෙවමින් දේශපාලන කටයුතුවල යෙදවීම හරහා රජයට පාඩු කළ බවට චෝදනා කොට අල්ලස් පනතේ 70 වැනි වගන්තිය යටතේ දූෂණය යන වරදට නඩු පැවරීම සිදුව ඇත.
සතොස හිටපු සභාපති එරාජ් ප්‍රනාන්දු සහ එහි හිටපු අධ්‍යක්ෂවරයකු වන මොහොමඩ් සාකීර් නඩුවේ සෙසු විත්තිකරුවන් වේ. නඩුව මීට පෙර කැඳවනු ලැබූ අවස්ථාවේදී විත්ති පාර්ශ්වයේ නීතිඥවරුන් මූලික විරෝධතාවයක් මතු කරමින් විත්තිකරුවන්ට එරෙහිව නඩු පැවරීම සඳහා අල්ලස් කොමිසමේ කොමසාරිස්වරු තිදෙනාම අත්සන් කොට නොමැති හෙයින් නඩුව පවරා පවත්වාගෙන යෑමට නොහැකි බවට විත්ති පාර්ශ්වයෙන් මූලික විරෝධතාවයක් මතු කළේය.
විත්තිකරුවන්ට එරෙහි අධිචෝදනා 4ක් නීතිපතිවරයා විසින් ගොනුකර තිබේ. මින් පෙර නඩුව විභාගයට ගත් අවස්ථාවේ ඒවා කියවා උත්තරවාද විමසන ලදී. එහිදී විත්තිකරුවන් චෝදනාවන්ට නිවැරදිකරුවන් බව කියා සිටින ලදී. (චන්දන ජයවීර)
0 Comments