ගෙවල් බිඳුම් ඇතුළු විවිධ සොරකම් සම්බන්ධයෙන් ජීවිතයේ අවුරුදු 39ක්ම විටින් විට බන්ධනාගාරගතව සිට නිදහස් වූ අවස්ථාවලදී යළි යළිත් සිදුකරන ලද සොරකම් ගණනාවකට වරෙන්තු ලබා සිටි පුද්ගලයෙක් දර මඩුවක සැඟව සිටියදී පෙරේදා (06) පොලිසිය විසින් අත්අඩංගුවට ගනු ලැබුවේය.
මෙලෙස අත්අඩංගුවට ගෙන ඇත්තේ කෑගල්ල හෙට්ටිමුල්ල තලේවල ප්‍රදේශයේ පදිංචිව සිටින 73 හැවිරිදි තුන්දරු පියෙකි.
අත්අඩංගුවට ගෙන ඇති පුද්ගලයා තරු‍ණ කාලයේ සිට ගෙවල් බිඳුම් ඇතුළු දේපොළ සොරකම් කිරීම් සම්බන්ධයෙන් විටින් විට අත්අඩංගුවට පත්ව අධිකරණයට ඉදිරිපත් කෙරී ඇති අතර වසර 39ක් විටින් විට බන්ධනාගාරගතව සිට ඇත.
2022 වසරේ සැකකරු නැවත නිවසට පැමිණ ඇති බව පොලිසිය පැවසීය. පසුව යළිත් සොරකම් කිරීම් කිහිපයක් සම්බන්ධයෙන් අත්අඩංගුවට ගෙන අධිකරණයට ඉදිරිපත් කර ඇප මත මුදාහැර සිට ඇති අතර ඔහුට එරෙහි නඩුවලට ඉදිරිපත් නොවීමෙන් වරෙන්තු නිකුත් කර තිබුණි.
පසුව පොලිසිය සැකකරු සම්බන්ධයෙන් විමර්ශන කටයුතු සිදු කරමින් සිටින අවස්ථාවේ දී තලේවල ප්‍රදේශයේ නිවසක දර මඩුවක දිවි ගෙවන බවට ලද තොරතුරකට අනුව සැකකරු අත්අඩංගුවට ගැනීමට පෙරේදා (06) කෑගල්ල මූලස්ථාන පොලිස් පරීක්ෂක නාලක මාගෙදරගම මහතාගේ උපදෙස් පරිදි වරෙන්තු අංශයේ ස්ථානාධිපති උප පොලිස් පරීක්ෂක නිශ්ශංක පොලිස් සැරයන් සාගර (1379), දුමින්ද (68830) යන නිලධාරින් කණ්ඩායම අදාළ තලේවල නිවසේ දර මඩුවට ගොස් තිබුණි. සැකකරු දර මඩුවේ පැදුරක් දමාගෙන දිවි ගෙවමින් සිටි බවත් කෑම බීම වයෝවෘද්ධ බිරිය විසින් දර මඩුවට වේල් තුනටම ගිහින් දෙන බවත් පොලිසිය පැවසීය.
පෙරේදා (06) පොලිස් නිලධාරින් කණ්ඩායම දර මඩුවට යන අවස්ථාවේ දී සැකකරුගේ බිරිය කෑම රැගෙන ගොස් සැමියාට කෑම කවමින් සිටි බවත් පොලිසිය පැවසීය. කෑම ටික කෑමෙන් පසුව සැකකරුගේ ඉඳුල් අත බිරිය විසින් ප්ලාස්ටික් කෝප්පයකට සෝදා චීත්තයෙන් අත කට පිස දැමූ බවත් පොලිසිය පැවසීය. සැකකරු අත්අඩංගුවට ගෙන රැගෙන ඒමට සුදානම් වු අවස්ථාවේ දී වයෝවෘද්ධ බිරිය කදුළු සලමින් හඩා වැළපෙමින් සිටි බවත් පොලිසිය පැවසීය. සැකකරුට රාත්‍රි කෑමට කෙසෙල් කොළයක කෑම එකක් ද වයෝවෘද්ධ බිරිය විසින් ඔතා දුන් බවත් පොලිසිය පැවසීය. සැකකරු කාලයක් කැලෑබද ගල් ගුහාවල සැඟව සිට ඇති බවත් ගල් ගුහාවලට වේල් තුනට කෑම රැගෙන යාම නොහැකි වීම හෙතුවෙන් බිරිය විසින් ගමේ පුද්ගලයෙකුගේ දර මඩුවක සැඟව සිටීමට අවස්ථාව සලසා දී ඇති බවත් පොලිසිය පැවසීය. වර්තමානයේ සොරකම් කිරීමට නොහැකි තත්ත්වයට සැකකරු වයෝවෘද්ධ වී ඇති බවත් පොලිසිය පැවසීය.
සැකකරු ඊයේ (07) කෑගල්ල මහේස්ත්‍රාත් අධිකරණයට ඉදිරිපත් කිරීමට නියමිතව තිබුණි.
කෑගල්ල - චමින්ද ජයලත්
0 Comments