සෙලින්කෝ සමූහ ව්‍යාපාරයේ හිටපු සභාපති ලලිත් කොතලාවල මහතාගේ මරණය හෘදයාබාධයක් හේතුවෙන් සිදු වූ හදිසි මරණයක් බව ඊයේ (31) තීන්දු කළ කොළඹ අතිරේක මහේස්ත්‍රාත් පසාන් අමරසිංහ මහතා, ඒ අනුව ලලිත් කොතලාවල මහතාගේ මරණ සහතිකය ඔහුගේ ඥාතීන් වෙත භාර දෙන ලෙස අධිකරණ රෙජිස්ට්‍රාර්වරයාට නියෝගයක් නිකුත් කළේය.
ලලිත් කොතලාවල මහතාගේ මරණයට හේතුව සම්බන්ධයෙන් මහේස්ත්‍රාත් පරීක්ෂණ තීන්දුව ප්‍රකාශයට පත් කරමින් මහේස්ත්‍රාත්වරයා මේ නියෝගය නිකුත් කළේ අධිකරණ වෛද්‍ය රාජපක්ෂ මහතා විසින් ඉකුත් 22 දා අධිකරණයට භාර දෙනු ලැබූ කොතලාවල මහතාගේ මරණ පරීක්ෂණ වාර්තාව, රජයේ රස පරීක්ෂක වාර්තාව සහ සාක්ෂිකරුවන්ගේ ගත් සාක්ෂි සැලකිල්ලට ගනිමිනි. කොතලාවල මහතාගේ මරණය සැක සහිත බවට ඔහුගේ බිරියගේ සහෝදරිය වන ෂෙරින් පේෂන් විජේරත්න යන අය බම්බලපිටිය පොලිසියට කළ පැමිණිල්ලකට අනුව මේ නඩුව අධිකරණය හමුවේ කැඳවිණි.
ලලිත් කොතලාවල මහතාගේ මරණ පරීක්ෂණයට අදාළව ඔහුගේ බිරියගේ සහෝදරිය වන ෂෙරින් පේෂන් විජේරත්න,
ඔහු යටතේ සේවය කළ සේවක සේවිකාවන් කිහිප දෙනකු ඇතුළු අට දෙනෙක් පශ්චාත් මරණ පරීක්ෂණයේදී අධිකරණය හමුවේ සාක්ෂි දුන්හ.
මෙරට ප්‍රකට ව්‍යාපාරිකයකු වූ දේශමාන්‍ය ආචාර්ය ලලිත් භූපේන්ද්‍ර කොතලාවල මහතා අභාවප්‍රාප්ත වූයේ ඉකුත් 2023 වසරේ ඔක්තෝම්බර් 21 දාය. කොළඹ පෞද්ගලික රෝහලක ප්‍රතිකාර ලබමින් සිටියදී ඒ මහතා මියගිය අතර, ඒ වන විට ඔහු 84 වියෙහි පසු වූ බව පොලිසිය අධිකරණයට කරුණු වාර්තා කර තිබිණි.
(නිමන්ති රණසිංහ)
0 Comments