නිවාස කොල්ලකෑම් ගණනාවකට සම්බන්ධ සැකකරුවකු පෙරේදා (06දා) ග්‍රෑන්ඩ්පාස් පොලිස් වසම තුළ මාර්ගයක සැකකටයුතු ලෙස යතුරුපැදියකින් ගමන් කරමින් සිටියදී රථවාහන පොලිස් නිලධාරීන් රවටා පැනයෑමේ සිද්ධියක් වාර්තාවේ.
සැකකටයුතු යතුරුපැදිය නවතා ප්‍රශ්න කිරීමේදී සැකකරු තම රියැදුරු බලපත්‍රය හා අනෙකුත් ලියවිලි නිවසින් රැගෙන එන බව පවසමින් යතුරුපැදිය නවතා සූක්ෂ්ම ලෙස එතැනින් පලායාමේ පුවතක් වාර්තාවේ.
අදාළ යතුරුපැදිය පමුණුගම පොලිස් වසමේ නිවසකින් සතියකට පමණ පෙර සොරකම් කළ පොලිස් නිලධාරියෙකුට අයත් යතුරුපැදියක් බවට මේ වන විට හඳුනාගෙන ඇති අතර එය දැනට ග්‍රෑන්ඩ්පාස් පොලිස් භාරයේ තබාගෙන ඇත.
පොලිස් නිලධාරීයකුට අයත් යතුරුපැදියක් දුරකතන ඇතුළු දේපළ කොල්ලකෑ සොරකු සොයයි යන හිසින් ජුනි 06 දින දිනමිණ පුවත්පතේ පළ කර තිබූ පුවතට අදාළ පමුණුගම පොලිස් වසමට අයත් බෝපිටිය මංසන්ධියට නුදුරින් එකම දිනෙක සොරකම්වල යෙදුණු මෙම සැකකරු, තවත් ප්‍රදේශවලද එවැනි සොරකම්වල නිරත වී ඇති බවටද පොලිසිය තොරතුරු අනාවරණය කරගෙන ඇත.
(වත්තල - ජෝශප් පයස්)
0 Comments