කුලී පදනමින් ලබා ගන්නා වාහනවලට නියම අයිතිකරුවන්ගේ නමින් ව්යාජ ලේඛන සකස් කොට ඒවා හොර රහසේ අලෙවි කිරීමේ නිරත වූ පුද්ගලයකු නාගොල්ලගම වනගත ප්රදේශයකදී අත් අඩංගුවට ගත් බව නාගොල්ලගම පොලිසිය කියයි.
සැකකරු විසින් මේ ජාවාරමෙන් රුපියල් තුන්කෝටි විසිඑක්ලක්ෂ තිස්පන්දහස (3,21,35,000.00)ට වැඩි මුදලක් උපයාගෙන සිටින්නකු බවද මෙතෙක් කළ මූලික පරීක්ෂණවලදී හෙළි වූ බව පොලිසිය කියයි.
අත්අඩංගුවට ගත් සැකකරු තල්කොටේවත්ත,නාගල්ලාගම ලිපිනයේ පදිංචි 34 හැවිරිදි විවාහක පුද්ගලයකු බවත් ඔහු දර්ගා නගරය ප්රදේශය මුල් පදිංචි අයකු බවත් පොලිසිය වැඩිදුරටත් සඳහන් කරයි. නාගොල්ලාගම පොලිස් ස්ථානාධිපති පොලිස් පරීක්ෂක සම්පත් ජයමහ මහතාට ලැබුණු පෞද්ගලික දුරකතන පණිවිඩයක් ඔස්සේ විමර්ශනය කර මේ අත්අඩංගුවට ගැනීම සිදු කර ඇත.
නාගොල්ලාගම,තල් කොටේ වත්ත,අඹ ගහවත්ත ප්රදේශයේ කැලෑ රොදක් අසල යතුරුපැදියකින් පැමිණි පුද්ගලයකු බොහෝ වෙලා රැඳී ඉන්නා බවත් ඔහු පිළිබඳව සැකයක් පවතින බවත් පොලිසියට තොරතුරු ලැබී ඇත.
ඒ අනුව වහාම ක්රියාත්මක වූ නාගල්ලාගම පොලිස්ථානාධිපතිවරයා ඇතුළු කණ්ඩායක් එම ස්ථානයට ළඟා වනවාත් සමඟම සැකකරු යතුරුපැදිය දමා පළාගොස් ඒ ප්රදේශයේ ඇති වෙනත් කැලෑබද ප්රදේශයකට ඇතුළු වී සැඟවී තිබේ.
සැකකරු ලුහුබදිමින් ගිය පොලිස් කණ්ඩායමට මහත් පරිශ්රමයක් යොදා ඔහු අත්අඩංගුවට ගැනීමට හැකිවූ බවත් විමර්ශන නිලධාරීහූ පවසති.
සැකකරු මහමඟ දමා පලා ගිය යතුරුපැදිය ආසන්නයට ගෙන්වා පරීක්ෂා කිරීමේදී යතුරුපැදියේ ඉදිරිපස කොටසේ සඟවා තිබූ රක්ෂණ සහතිකයක්,ආදායම් බලපත්රයක් හා රියැදුරු බලපත්රයක් ද පොලිසිය විසින් සොයාගෙන තිබේ.
එහි තිබූ ලිපි ලේඛනවලට අනුව අදාළ යතුරුපැදිය තම මස්සිනාගේ බවට සනාථ කිරීමට සැකකරු උත්සාහ ගත් නමුත් ඔහුට එය තහවුරු කර ගැනීමට නොහැකිවීම හේතුවෙන් පොලිසිය වැඩිදුර විමර්ශන කටයුතු ආරම්භ කර තිබේ.
එහිදී සැකකරු සතුව තිබූ රියැදුරු බලපත්රය සම්බන්ධයෙන් ද කරුණු අනාවරණය වී ඇති අතර එය ඇලබඩගම, පන්නල ප්රදේශයේ පුද්ගලයකුට අයිති එකක් බවට අනාවරණය කරගෙන තිබේ.
අත්අඩංගුවට ගත් සැකකරු පිළිබඳව අවට පොලිසි දැනුවත් කිරීමෙන් අනතුරුව මේ වන විට දිවයිනේ විවිධ ප්රදේශවලින් මේ සැකකරු සම්බන්ධයෙන් නාගොල්ලාගම පොලිසියට තොරතුරු ලැබෙමින් පවතින බව පොලිසිය කියයි.
ඒ අනුව සැකකරුට විරුද්ධව නිකවැරැටිය, හොරණ, කළුතර,කුරුණෑගල, මාතර,ගිරිබාව ආදී පොලිස් ස්ථාන රැසකින් මෙවැනි වාහන ජාවාරම් සම්බන්ධයෙන් පැමිණිලි ලැබී ඇති බව වාර්තා වේ.
කුලී පදනමට වාහන ලබාදෙන ආයතන මඟින් මෙසේ ලබාගත් සැප මෝටර් රථ හතරක්, වෑන් රථ දෙකක් නැවත ලබා නොදීමේ හා අගරු චෙක්පත් ලබාදී මුදල් වංචා කිරීමක් සම්බන්ධයෙන් ද මේ පැමිණිලි අතර වන බව පොලීසිය කියයි.
සැකකරු විසින් කුලී පදනමින් ලබා ගන්නා වාහනවල බලපත්රය හා රක්ෂණ සහතික ව්යාජ ලෙස යළි සකස් කර මේ ජාවාරම සිදු කරගෙන ගොස් ඇති බවට කරුණු අනාවරණය වී තිබේ.එම සහතික මෝටර් රථ ප්රවාහන දෙපාර්තමේන්තුවෙන් පරීක්ෂා කිරීමේදී ඒවායේ කිසිදු වෙනස්කමක් දක්නට නොවන බව ද පොලිසිය කියයි. මේ සඳහා මෝටර් රථ ප්රවාහන දෙපාර්තමේන්තුවේ කිසියම් අයකුගේ හෝ පිරිසකගේ සහාය ලැබී ඇති දැයි සොයා බැලීමට වෙනම විමර්ශනයක් ආරම්භ කළ බවද පොලිසිය සඳහන් කරයි.
සිද්ධිය සම්බන්ධයෙන් නිකවැරටිය කොට්ඨාස භාර ජ්යෙෂ්ඨ පොලිස් අධිකාරි වසන්ත ජයමිනි කුමාර මහතාගේ උපදෙස් මත මහව දිසාව භාර සහකාර පොලිස් අධිකාරි බණ්ඩාර මහතාගේ මෙහෙයවීමෙන් නාගොල්ලාගම පොලිස් ස්ථානාධිපති පොලිස් පරීක්ෂක සම්පත් ජයමහ මහතාගේ මූලිකත්වයෙන් පොලිස් සැරයන්(35389) දිසානායක,පොලිස් පොලිස් සැරයන් (33547) රණසිංහ , පොලිස් සැරයන් (34124) දිසානායක,පොලිස් සැරයන් (57629) රත්නායක , පොලිස් කොස්තාපල් (72546) රණතුංග,පොලිස් කොස්තාපල්(34536) ලක්මාල් නිලධාරීහු වැඩිදුර විමර්ශන සිදුකරති.
අත්අඩංගුවට ගත් සැකකරු ඊයේ (03) මහව මහේස්ත්රාත් අධිකරණයට ඉදිරිපත් කිරීමට නියමිතව තිබුණි.
(සංජීවනී ආරියරත්න - මහව , සුනිල් එස්. පැල්ලන්දෙණිය - කුරුණෑගල)
0 Comments