පොලොන්නරුව, හබරණ ප්‍රධාන මාර්ගයේ හබරණ 7 කණුව දේවාලය ආසන්නයේදී හබරණ රක්ෂිතයේ සැරිසැරූ වන අලියෙකු සිදුකළ පහරදීමකින් ලොරි රථයක ගමන් කළ පුද්ගලයකු ඊයේ (19) උදෑසන මියගොස් ඇති බව මින්නේරිය පොලිසිය කියයි.
මෙම වන අලි පහරදීමෙන් මියගොස් ඇත්තේ පොලොන්නරුව 4 ඇළ ප්‍රදේශයේ පදිංචිව සිටි පුද්ගලයෙකි. ඊයේ 19 උදෑසන 6 ට පමණ මෙම වන අලි පහරදීම සිදුව ඇත.
මියගිය පුද්ගලයා ලොරි රථයකින් කෙසෙල් හා කොස් දඹුල්ල ආර්ථික මධ්‍යස්ථානයට රැගෙන යමින් සිටියදී මෙම ප්‍රහාරයට ඔහු ලක්ව ඇති බව පරීක්ෂණ සිදු කරන මින්නේරිය පොලිසිය කියයි.
එම කුඩා ලොරි රථය මින්නේරිය දෙස සිට දඹුල්ල දෙසට ධාවනය වී ඇති අවස්ථාවේ එක්වර වන අලියෙකු ලොරි රථය ඉදිරිපිටට පැමිණ ඇති බව පොලිසිය කියයි. එම අවස්ථාවේ ලොරි රථයේ රියැදුරු කලබලවීම හේතුවෙන් මාර්ගයේ ලොරි රථය එකවර නතර වී ඇත. එවිට ඔහු ලොරි රථයෙන් පැනගොස් බේරී තිබේ.
පසුව වන අලියා විසින් ලොරි රථය ඒ අසල පිහිටි හබරණ රක්ෂිතයේ බෑවුමකට පෙරලා තිබේ.
ඉන් අනතුරුව වන අලියා විසින් ලොරි රථයේ ගමන් කළ පුද්ගලයාට පහර දී ඝාතනය කර ඇති බව පොලිසිය කියයි.
වන අලියා පහරදීමෙන් ලොරි රථය හබරණ රක්ෂිතයේ බෑවුමකට පෙරලීගොස් තිබූ අතර එහි රැගෙන යමින් තිබූ කොස් කෙසෙල් රක්ෂිතය පුරා විසීරී ගොස් තිබිණි.
වන අලි පහරදීමෙන් මියගිය පුද්ගලයාගේ මෘත ශරීරය හිගුරක්ගොඩ මූලික රෝහලේ තබා ඇති අතර මේ පිළිබද වැඩිදුර පරීක්ෂණ කටයුතු මින්නේරිය පොලිසිය සිදු කරයි.
(සිරිපුර - මදුශානි අබේසිංහ)
0 Comments