තැපැල් දෙපාර්තමේන්තුවේ නිල ලාංඡනය උපයෝගී කරගනිමින් අන්තර්ජාලය මඟින් භාණ්ඩ බෙදාහැරීමට යැයි පවසා වෛද්‍යවරුන්, නීතිඥවරුන්, ඉංජිනේරුවන්, ව්‍යාපාරිකයින් සහ රාජ්‍ය නිලධාරීන් ඇතුළු විශාල පිරිසකගෙන් රුපියල් කෝටි 17කට අධික මුදලක් වංචා කළ සංවිධානාත්මක කණ්ඩායමක් සම්බන්ධයෙන් විමර්ශනයක් ආරම්භ කළ බව පරිගණක අපරාධ විමර්ශන කොට්ඨාස අන්තර්ජාල ආවේක්ෂණ හා බුද්ධි ඒකකය කොළඹ ප්‍රධාන මහේස්ත්‍රාත් තිළිණ ගමගේ මහතා ඉදිරියේ ඊයේ (24) කරුණු වර්තා කළේය.
මෙම සංවිධානාත්මක අපරාධය සිදුකළ පිරිස සම්බන්ධයෙන් කළ ආවේක්ෂණයේ දී අදාළ මුදල් චීනයේ ‘අලි එක්ස්ප්‍රස්“ (Ali express)නම් ආයතනයට බැරවී ඇති බවට සොයා ගත් බව ද එම ඒකකය අධිකරණයට කරුණු වාර්තා කර ඇත.
මෙම සිද්ධිය සම්බන්ධයෙන් තම ඒකකයට පැමිණිලි 88කට අධික ප්‍රමාණයක් ලැබී ඇති අතර, එම පැමිණිලි ඉදිරිපත් කළ අය අතර වෛද්‍යවරුන්, නීතිඥවරුන්, ඉංජිනේරුවන්,
ව්‍යාපාරිකයින් සහ රාජ්‍ය නිලධාරීන් ඇතුළු විශාල පිරිසක් සිටින බව ද එම ඒකකය අධිකරණයට කරුණු ඉදිරිපත් කළේය.
මෙම සිද්ධියට අදාළව ඉදිරිපත් වූ පැමිණිලි දෙකක් අධිකරණය හමුවට ඉදිරිපත් කරමින් පරිගණක අපරාධ විමර්ශන කොට්ඨාස අන්තර්ජාල ආවේක්ෂණ හා බුද්ධි ඒකකය සඳහන් කරනු ලැබුවේ එම පැමිණිලි දෙක ආයුර්වේද වෛද්‍යවරයකු වන පාදුක්කේ පදිංචි අනුරාධ ද මැල් සහ ශ්‍රී ලංකා ටෙලිකොම් සමාගමේ ජාලගත අංශයේ සහකාර ඉංජිනේරු මත්තේගොඩ පදිංචි සමීර රංගන විජේසේකර යන අය විසින් ඉදිරිපත් කරනු ලැබ තිබූ බවය.
ආයුර්වේද වෛද්‍යවරයාගෙන් රුපියල් ලක්ෂ 23ක මුදලක් ද ඉංජිනේරුවරයාගෙන් රුපියල් ලක්ෂ 18ක මුදලක් ද වශයෙන් වංචා කර ඇතැයි එම ඒකකය අධිකරණයට කරුණු වාර්තා කළේය. අන්තර්ජාලය මඟින් භාණ්ඩ ගෙන්වා ගැනීම සඳහා
අදාළ විකුණුම් ආයතන වෙත තොරතුරු ඉදිරිපත් කළ පසු මෙම සංවිධානාත්මක කණ්ඩායම එම පාරිභෝගිකයින්ගේ ජංගම දුරකතනයට කෙටි පණිවිඩයක් යොමුකර ඔවුන්ගේ නම් සහ ලිපින සහිත විස්තරවල යම් ගැටලුවක් ඇති බව පවසා ඔවුන් අලුතින් ලබා දෙන පෝරමය පුරවා එවන ලෙසට අන්තර්ජාලය මඟින් වාර්තාවක් යොමුකරන බව එම ඒකකය අධිකරණයට කරුණු වාර්තා කර ඇත.
පසුව එය යොමු කරන්නේ තැපැල් දෙපාර්තමේන්තුව හරහා බවට සඳහන් කර ඇති මෙම පිරිස එම පෝරමයට තැපැල් දෙපාර්තමේන්තුවේ ලාංඡනය ව්‍යාජ ලෙස යොදා ඇති බවත් මෙම ක්‍රියාවට රැවටී අදාළ පාරිභෝගිකයින් එම පෝරමය පිරවීමෙන් පසු නැවත ඔවුන්ට කෙටි පණිවිඩයක් මඟින් ඕටීපී අංකයක් ලබාදෙනු ලබන බවත් පරිගණක අපරාධ විමර්ශන කොට්ඨාස අන්තර්ජාල ආවේක්ෂණ
හා බුද්ධි ඒකකය අධිකරණයට සඳහන් කළේය.
එම ඕ.ටී.පී. අංකය පාරිභෝගිකයින් විසින් මෙම සංවිධානාත්මක පිරිසට යොමු කළ පසු එම පිරිස අදාළ අංකය භාවිත කරමින් පාරිභෝගිකයින්ගේ බැංකු ගිණුම් තුළට ඇතුළුවී එහි ඇති සියලු මුදල් සොරාගන්නා බව එම ඒකකයේ පොලිස් කොස්තාපල්වරුන් වන 27263 ධනුෂන් සහ 17414 ෂාලික යන නිලධාරීහු අධිකරණයට කරුණු වාර්තා කළහ.
ඒ අනුව මෙම වංචාව සම්බන්ධයෙන් ඉදිරි විමර්ශන සඳහා බැංකු වාර්තා කැඳවීමට නියෝගයක් නිකුත් කරන ලෙසට පරිගණක අපරාධ විමර්ශන කොට්ඨාස අන්තර්ජාල ආවේක්ෂණ හා බුද්ධි ඒකකය අධිකරණයෙන් ඉල්ලීය.
ඉදිරිපත් වූ කරුණු සැලකිල්ලට ගත් අධිකරණයට අදාළ බැංකු නියෝග නිකුත් කර සිද්ධියට අදාළ සැකකරුවන් වහාම අත්අඩංගුවට ගෙන අධිකරණයට ඉදිරිපත් කරන ලෙසට පරිගණක අපරාධ විමර්ශන කොට්ඨාස අන්තර්ජාල ආවේක්ෂණ හා බුද්ධි ඒකකයට නියෝග කළේය.
0 Comments