බස්නාහිර පළාත් පිහිනුම් තරගාවලියක් සඳහා සුගතදාස ක්‍රීඩාංගණයට පැමිණ සිටි බාලවයස්කාර දැරියන්ගේ අඟපසඟ වීඩියෝගත කළැයි කියන සිද්ධියකට අදාළව ග්‍රෑන්ඩ්පාස් පොලිසිය අත්අඩංගුවට ගත් විදුලිබල මණ්ඩලයේ සේවකයකු ලබන මස 27 වැනිදා තෙක් රක්ෂිත බන්ධනාගාරගත කරන ලෙස කොළඹ අතිරේක මහේස්ත්‍රාත් මංජුල රත්නායක මහතා ඊයේ (18) නියෝග කළේය.
මෙලෙස රක්ෂිත බන්ධනාගාරගත කරනු ලැබුවේ විදුලිබල මණ්ඩලයේ සේවය කරන හොරණ පදිංචි (33) හැවිරිදි පුද්ගලයෙකි.
මෙම සිද්ධිය සම්බන්ධයෙන් ග්‍රෑන්ඩ්පාස් පොලිසියට පැමිණිල්ලක් ඉදිරිපත් කරනු ලැබ තිබුණේ එම තරගාවලිය සංවිධාන කළ පුහුණුකරු විසිනි.
බස්නාහිර පළාත් පිහිනුම් තරගාවලියක් සඳහා කොළඹ ප්‍රසිද්ධ කාන්තා පාසලක දැරියන් පිරිසක් ඉකුත් 15 වැනිදා සුගතදාස ක්‍රීඩාංගණයට පැමිණ ඇති අතර එහිදී තරගාවලියට ප්‍රථම ඇඟ උණුසුම් කිරීමේ ව්‍යායාමවල නිරතවන අවස්ථාවේදී මෙම සැකකරු එම දැරියන්ගේ අඟපසඟ වීඩියෝගත කර ඇති බව ග්‍රෑන්ඩ්පාස් පොලිසිය අධිකරණයට කරුණු ඉදිරිපත් කළේය.
පුහුණුකරු විසින් කරනු ලැබූ පැමිණිල්ලකට අනුව සැකකරු අත්අඩංගුවට ගෙන පරීක්ෂා කර බැලීමේදී ඔහුගේ ජංගම දුරකතනයේ දැරියන්ගේ වීඩියෝ පට ගබඩා වී ඇති බවට හෙළිවූ බවද පොලිසිය අධිකරණයට කරුණු වාර්තා කළේය.
ඉදිරිපත් වූ කරුණු සැලකිල්ලට ගත් අධිකරණය සැකකරුගේ ඇප ඉල්ලීම ප්‍රතික්ෂේප කරමින් ලබන 27 වැනිදා තෙක් රක්ෂිත බන්ධනාගාරගත කර එදින තෙක් නඩුව කල් තැබීය.
(නිමන්ති රණසිංහ)
0 Comments