ශ්‍රී ලංකා විවාහක රූ රැජණ පුෂ්පිකා ද සිල්වා මහත්මියගේ හිස රැඳි කිරුළ ගලවා තුවාල කළැයි කියන සිද්ධිය තමා නොදුටු බව රූපලාවන්‍ය ශිල්පි චන්දිමාල් ජයසිංහ මහතා කොළඹ ප්‍රධාන මහේස්ත්‍රාත් තිළිණ ගමගේ මහතා ඉදිරියේ සාක්ෂි ලබා දෙමින් ඊයේ (01) ප්‍රකාශ කළේය.
මෙම සිද්ධියට අදාළව පැමිණිල්ලේ දෙවැනි සාක්ෂිය ලෙස අධිකරණය හමුවේ පෙනී සිටිමින් සාක්ෂිකාර ජයසිංහ මහතා එසේ ප්‍රකාශ කළේය.
එම සිදුවීම වන අවස්ථාවේදී තමන් එම ස්ථානයෙන් බැස ආරාධිත අමුත්තන් සමඟ පිටව ගිය බවත් පසුව එවැනි සිදුවීමක් වූ බව දැනගත් බවත් සාක්ෂිකරු සාක්ෂි ලබා දෙමින් ප්‍රකාශ කළේය. ඒ අනුව එම සාක්ෂිය අවසන් කළ අධිකරණය පැමිණිල්ලේ තෙවැනි සාක්ෂිකාරිය වන ආශා බස්නායක යන අයට ලබන අගෝස්තු මස 05 වැනිදා අධිකරණයේ පෙනී සිටින ලෙසට සිතාසි නිකුත් කරමින් එදින තෙක් නඩුව කල් තැබීය.
ශ්‍රී ලංකා විවාහක රූ රැජන තරගයේදී සිදුවූ ආන්දෝලනාත්මක සිද්ධිය සම්බන්ධයෙන් 2019 ලෝක රූ රැජන කැරොලයින් ජුලි සහ නිරූපන ශිල්පිණී චූලා පද්මේන්ද්‍ර යන මහත්මීන් තමන් නිවැරදිකරුවන් බව අධිකරණයේ දී ප්‍රකාශ කර තිබුණේ ඉකුත් අප්‍රේල් මස 04 වැනිදා සිද්ධියට අදාළ චෝදනා කියවා දීමෙන් පසුවය.
මෙම සිද්ධිය සම්බන්ධයෙන් දෙපිරිසම සමත මණ්ඩලයට යොමු කළ ද සමතයක් නොවු බැවින් නඩුව විභාගයට ගැනීමට මහේස්ත්‍රාත්වරයා තීරණය කර තිබිණි. ඒ අනුව මෙම නඩුව ඊයේ (01) අධිකරණය හමුවේ යළි කැඳවූ අවස්ථාවේ මෙම කරුණු අනාවරණය විය.
වර්ෂ 2020 ශ්‍රී ලංකා විවාහක රූ රැජන වන පුෂ්පිකා ද සිල්වා මහත්මිය ඉකුත් 2021 වසරේ අප්‍රේල් මස 05 වැනිදා කරනු ලැබූ පැමිණිල්ලකට අනුව කුරුඳුවත්ත පොලිසිය මෙම නඩුව අධිකරණය හමුවේ ගොනුකර තිබිණි. මෙම සිදුවීමෙන් රජයට රුපියල් ලක්ෂ 07ක අලාභයක් සිදුවී ඇති බවට කුරුඳුවත්ත පොලිසිය අධිකරණය හමුවේ කරුණු වාර්තා කර තිබිණි.
0 Comments