මාදම්පේ, කරුක්කුලිය ප්‍රදේශයේදී සිදුවූ ලංගම බස් රථයක් සිමෙන්ති පැටවූ ලොරි රථයක ගැටීමෙන් සිදුවූ අනතුරින් බරපතළ තුවාල ලබා කොළඹ ජාතික රෝහලේ ප්‍රතිකාර ලබමින් සිටි හලාවත රෝහලේ නොමේරූ ළදරු ඒකකයේ සේවය කළ වෛද්‍යවරිය ප්‍රතිකාර ලබමින් සිටියදී පෙරේදා (15) මරණයට පත්ව ඇත.
මෙසේ මරණයට පත්ව ඇත්තේ නාත්තන්ඩිය, දුන්කන්නාව ප්‍රදේශයේ පදිංචිව සිටි එක්දරු මවක් වූ හලාවත රෝහලේ නොමේරූ ළදරු ඒකකයේ සේවය කරමින් සිටි වෛද්‍යවරියක වන සේපාලිකා වනමලී නැමති 37 හැවිරිදි එක් දරු මවයි.
පසුගිය ජූනි 4 වන දින කොළඹ සිට හලාවත දේවාලහංදිය දෙසට ගමන් කරමින් තිබූ හලාවත ලංගම ඩිපෝවට අයත් බස් රථය මෙසේ මාදම්පේ, කරුක්කුව ප්‍රදේශයෙදී සිමෙන්ති ප්‍රවාහනය කළ ලොරියක ගැටී 27 දෙනෙකු තුවාල ලබා හලාවත හා මීගමුව රෝහල් වෙත ඇතුළත් කර සිටියදී බස් රථයේ රියැදුරු හා තවත් දෙදෙනෙකු මරණයට පත්ව තිබුණි.
තම දරුවා පාසලට රැගෙන ගොස් ඉංජීනේරුවරයකු වන සැමියා සමඟ ලංගම බස් රථයට වෙන්නප්පුව ප්‍රදේශයෙන් මෙම වෛද්‍යවරිය ගොඩවී ඇත. වෛද්‍යවරියගේ සැමියා මාරවිල නගරයෙදී බස් රථයෙන් බැස නාත්තන්ඩිය, දුන්කන්නාව පිහිටි නි‍ෙවසට පැමිණ තිබේ.
වෛද්‍යවරිය හලාවත මහ රෝහලට සේවය සඳහා එම සඳහා බස් රථයෙන් පැමිනෙමින් සිටියදී මෙලෙස අවාසනාවන්ත ලෙස බස් රථ අනතුරට ලක්වී ඇය හා සෙසු මගීන් බරපතළ තුවාල ලබා තිබුණි.
එසේ බරපතළ ලෙස තුවාල ලබා අසාධ්‍යව සිටි මෙම වෛද්‍යවරිය ප්‍රතිකාර සඳහා ඇය සේවය කළ හලාවත රෝහලටම රැගෙන විත් තිබූ අතර තුවාලකරුවන් අතර සිටි තම මිතුරිය බේරා ගැනීමට තම සහෝදර වෛද්‍ය මිතුරන් මහත් වෙහෙසක් ගෙන තිබුණේ ඒ වනවිටත් තුවාල කරුවන් 27 දෙනෙකුට ද ප්‍රතිකාර ලබා දෙමිනි.
තමන් සමඟ එකට සේවය කළ වෛද්‍ය මිතුරියගේ සිරුර පුරා තිබූ දරුණු තුවාල වෙත ප්‍රතිකාර කරමින් ඇය බේරා ගැනීමට වෛද්‍ය කාර්ය මණ්ඩලය සතියකට ආසන්න කාලයක් දැඩි වෙහෙසක් ගෙන තිබුණි.
නමුත් ඇයගේ තත්ත්වය යහපත් අතට පත් නොවීම හේතුවෙන් කෙසේ හෝ ඇයව බේරා ගැනීමට කොළඹ ජාතික රෝහලට ඇතුළත් කිරීමට කටයුතු කර තිබුණි.
කොළඹ ජාතික රෝහලේ ප්‍රතිකාර ලබමින් සිටි වෛද්‍යවරියට සැත්කම් කිහිපයක් සිදු කර තිබූ නමුත් ඇය යහපත් තත්ත්වයට ගැනීමට නොහැකි වී තිබූ බව රෝහල් තොරතුරු සඳහන් කරයි.
ජීවිතයත් මරණයත් අතර සටනක නිරත වූ මෙම වෛද්‍යවරිය 15 දින ජීවිතය අතහැර ගොස් තිබූ බව ඇයට ප්‍රතිකාර කළ වෛද්‍යවරුන් පවසයි.
මෙම වෛද්‍යවරිය කුලියාපිටිය මහ රෝහලේ සේවය කර ඉන් පසුව පුත්තලම මූලික රෝහලේ වසර 4කට ආසන්න කාලයක් සේවයේ නිරතවී යන විට හලාවත මහ රෝහලේ සේවය කරමින් සිටියාය.
මෙම වෛද්‍යවරිය පුත්තලම මූලික රෝහලේ සේවය කර ඇත්තේ ළමා ඒකකයේ බව කියයි. දරුවන් වෙනුවෙන් කැපවී ඇති නිහතමානී වෛද්‍යවරියක් බවත් ඇය තම සෙසු කාර්ය මණ්ඩලය සමඟ සෑම රෝහලකදීම සුහදව කටයුතු කර ඇති බව ද කියයි.
හිරාන් ප්‍රියංකර ජයසිංහ
0 Comments