බත්තරමුල්ල පොල්දූව කථානායක නිල නි‍වස ඉදිරිපිට මාර්ගයට ගස් දෙකක් කඩා වැටී සිදුව තිබූ අනතුර යථා තත්ත්වයට පත්කරමින් සිටියදී අධික වේගයෙන් මාර්ගයේ ධාවනය වූ මෝටර් රථයක් ඒ මතින් ධාවනය වීමට යාමේදී එහි රියැදුරු බරපතළ තුවාල ලබා පෙරේදා (27) දා රාත්‍රී කොළඹ ජාතික රෝහලට ඇතුළත් කළ බව වැලිකඩ පොලිසිය පවසයි.
පාර්ලිමේන්තුව දෙස සිට පොල්දූව මංසන්ධිය දෙසට ගමන් ගන්නා මාර්ගයට නා ගසක් සහ තවත් ගසක් කඩා වැටී පෙරේදා (27) රාත්‍රියේ අනතුරක් සිදුව තිබුණි. අනතුරින් එම මාර්ගයේ මංතීරු තුනක් සම්පූර්ණයෙන්ම අවහිර වී තිබූ අතර සිද්ධියත් සමඟ වැලිකඩ පොලිසිය එම ස්ථානයට ගොස් පරීක්ෂණ ආරම්භ කර තිබේ.
එම ස්ථානය අඳුරු සහිත ස්ථානයක් බැවින් පැමිණ තිබූ වාහනවල විදුලි පන්දම් දල්වාගෙන මාර්ගය යථා තත්ත්වයට පත් කිරීමට කෝට්ටේ ගිනි නිවන ඒකකයේ නිලධාරීන් හා ගුවන් හමුදා නිලධාරීන් යුහුසුළුව ගස් දෙක කපා ඉවත් කරමින් සිටියදී එක්වරම පාර්ලිමේන්තුව දෙස සිට පොල්දූව මංසන්ධිය දෙසට පැයට කිලෝමීටර් සියයකට ආසන්න වේගයකින් ධාවනය වූ මෝටර් රථයක් ගසෙහි අතු කඩා බිඳ දමමින් ධාවනය වී අනතුරක් සිදුව තිබේ.
අනතුරින් මෝටර් රථයට බරපතළ හානි සිදුව ඇති අතර එහි රියැදුරුගේ අතක් බිඳී ප්‍රතිකාර සඳහා කොළඹ ජාතික රෝහලට ඇතුළත් කළ බව පොලිසිය කියයි.
මීට අමතරව කෝට්ටේ ගිනි නිවන ඒකකයේ කාර්යභාර නිලධාරි ඩී.ඩී. සුනන්ද මහතා ඇතුළු නිලධාරීන් පවසන පරිදි ගිනි නිවන රථයක් සහ ගලවා ගැනීමේ රථයක් පැමිණ මහමඟට වැටී තිබූ ගස්වල අතු කපා ඉවත් කරමින් සිටියදී ඉහළින් බිමට වැටුණු ගසක අත්තක් චේන් ෂෝ යන්ත්‍රයක් මතට වැටී එය සම්පූර්ණයෙන්ම විනාශ වී තිබේ.
අනතුරට පත් මෝටර් රථයේ රියැදුරු බීමතින් සිට ඇද්දැයි පරික්ෂාවට යොමු කිරීමට නියමිතව තිබුණි.
සිද්ධිය සම්බන්ධයෙන් වැලිකඩ පොලිසිය පරීක්ෂණ පවත්වයි.
(කොට්ටාව ප්‍රදීප් කුමාර)
0 Comments