සිය සැමියා විසින් තමාට පහර දෙන බවට වූ ප්‍රභූ ආරක්ෂක අංශයක සේවයේ නිරත පොලිස් කොස්තාපල්වරියක විසින් කළ පැමිණිල්ලක් විභාග කරන අවස්ථාවේදී ඇගේ සැමියා වන විශේෂ කාර්ය බළකා කොස්තාපල්වරයකු පැමිණ එඩේරමුල්ල පොලිස් ස්ථානය තුළදී ඇයට දිගින් දිගටම පහර දෙමින් පොලිස් ස්ථානය තුළ යකා නටා ඇතැයි පොලිස් තොරතුරු සඳහන් කළේය.
මෙම සිදුවීම වී ඇත්තේ පෙරේදා (25) සවස් කාලයේදීය.
මේ සම්බන්ධයෙන් විශේෂ කාර්ය බළකා ගෝනහේන කඳවුරේ සේවයේ නිරත කොස්තාපල්වරයකු අත්අඩංගුවට ගෙන ඇත. වත්තල ගොංගිතොට එක්සත් මාවතේ පදිංචිකාරියක වන ඇය සැමියා විසින් තමාට පහරදෙන බවට වූ පැමිණිල්ල ඉදිරිපත් කර ඇත්තේ පසුගිය 23 වෙනිදාය.
ඒ අනුව ඇයවත් ඇගේ සැමියාවත් එඩේරමුල්ල පොලිසියේ නිලධාරීන් විසින් කැඳවා පෙරේදා (25) පැමිණිල්ල විභාග කිරීමට සූදානම් වූ අවස්ථාවේදී පහරදීම සිදුව ඇත්තේ පොලිස් ස්ථානාධිපතිවරයා ඉදිරියේදීය.
බිරියට පහරදෙන පොලිස් කොස්තාපල්වරයා පාලනය කිරීමට පොලිස් ස්ථානාධිපතිවරයා ඇතුළු නිලධාරීන් දැඩි උත්සහයක් ගත්තද කලහකාරී ලෙස හැසිරීම හේතුවෙන් පොලිස් ස්ථානයේ දේපොළවලටද හානි වී තිබේ.
පොලිස් ස්ථානයේ වූ විදුලි පංකාවක්, වී.පී.එන්. කාමරයේ වීදුරු ද මෙම නිලධාරියාගේ කලහකාරී හැසිරීම හේතුවෙන් හානි වී ඇති බව පොලිසිය කියයි. අත්අඩංගුවටගත් පොලිස් කොස්තාපල්වරයා අධිකරණයට ඉදිරිපත් කිරීමට නියමිතව තිබුණි.
මෙහිදී එඬේරමුල්ල පොලිස් ස්ථානාධිපති ප්‍රධාන පොලිස් පරීක්ෂක සුනිල් ප්‍රියන්ත මහතාගේ උපදෙස් පරිදි කොස්තාපල්වරයා අත්අඩංගුවට ගෙන පහරදීම, රාජ්‍ය නිලධාරියෙකු හට සාපරාධී බලහත්කාරකම් සිදු කිරීම සහ රාජ්‍ය දේපළ හානි සිදු කිරීම යන චෝදනා යටතේ මහර මහේස්ත්‍රාත් අධිකරණයට ඉදිරිපත් කිරීමෙන් අනතුරුව රක්ෂිත බන්ධනාගාරගත කිරීමට නියෝග කොට තිබේ.
(ගයාන් කුමාර වීරසිංහ සහ)
0 Comments