උප්පැන්න සහතිකයේ නම වෙනස් කිරීමට අවශ්‍ය අනුමැති සහතිකයක් ලබාදීමට රුපියල් හතළිස් දහසක අල්ලස් මුදලක් ඉල්ලා ලබාගත්තැයි අල්ලස් කොමිසම අත්අඩංගුවට ගත් මාදම්පිටිය ග්‍රාම නිලධාරිවරයා ලබන 06 වැනිදා තෙක් රක්ෂිත බන්ධනාගාරගත කරන ලෙස කොළඹ ප්‍රධාන මහේස්ත්‍රාත් අධිකරණය ඊයේ (24) නියෝග කළේය. අධිකරණයට ග්‍රාම නිලධාරීවරයා ඉදිරිපත් කරන අවස්ථාවේදී විශාල පිරිසක් පැමිණ සිටි අතර මෙම ග්‍රාම නිලධාරීවරයා හොඳම ග්‍රාම නිලධාරියා ලෙස සම්මානලාභී නිලධාරියා වීම එයට හේතුවිය.
මෙලෙස රක්ෂිත බන්ධනාගාරගත කරනු ලැබුවේ මාදම්පිටිය පාර, කොළඹ 15 පදිංචි තට්ටම්බ රාළලාගේ දොන් ප්‍රදීප් පෙරේරා නමැති වේල්ලවීදිය ප්‍රාදේශීය ලේකම් කොට්ඨාසයේ මාදම්පිටිය ග්‍රාම නිලධාරිවරයාය. මෙම සිද්ධිය සම්බන්ධයෙන් අල්ලස් කොමිසම වෙත පැමිණිල්ලක් ඉදිරිපත් කර තිබුණේ කොළඹ 15 පදිංචි ව්‍යාපාරිකයෙකි. පැමිණිලිකරුගේ උප්පැන්න සහතිකයේ සඳහන්ව ඇති නම වෙනස් කිරීමට අවශ්‍ය අනුමාන සහතිකය ලබාදීමට හා නාගරික සංවර්ධන අධිකාරිය මඟින් සිදුකරනු ලබන නාගරික පුනර්ජීවන ව්‍යාපෘතිය යටතේ නිවාසයක් ලබා ගැනීමට අවශ්‍ය අයදුම්පත්‍රය නිර්දේශ කිරීමත් වසමේ පදිංචි බවට සහතිකයක් ලබාදීමටත් සැකකාර ග්‍රාම නිලධාරිවරයා මෙම අල්ලස් මුදල ඉල්ලා ඇතැයි අල්ලස් කොමිසම අධිකරණයට දැනුම් දුන්නේය.
මුල් අවස්ථාවේදී රුපියල් පනස් දහසක් වටිනා විදේශ මත්පැන් බෝතල් දෙකක් ඉල්ලා ඇති සැකකරු පසුව මෙම අල්ලස් මුදල ඉල්ලා ඇතැයි ද අල්ලස් කොමිසම අධිකරණයට කරුණු ඉදිරිපත් කළේය.
පැමිණිලිකරුගේ පැමිණිල්ලෙන් පසු උපායදූතයකු යොදවා වැටලීම සංවිධානය කර පෙරේදා (23) පස්වරු 4.00ට පමණ මෝදර ප්‍රදේශයේ මහල් නිවාස සංකීර්ණයක පිහිටි සැකකරුගේ නිල කාර්යාලයේදී අදාළ අල්ලස් මුදල ලබාගන්නා අවස්ථාවේදී අත්අඩංගුවට ගත් බව අල්ලස් කොමිසම අධිකරණයට දැනුම් දුන්නේය.
සැකකරු වෙනුවෙන් අධිකරණයේ පෙනී සිටි නීතිඥ ඇන්ටන් සේනානායක මහතා සඳහන් කර සිටියේ තම සේවාදායකයා කීර්තිමත් ග්‍රාම නිලධාරිවරයකු වශයෙන් කටයුතු කළ අයකු වන අතර මෙම අල්ලස් සිද්ධිය නිර්මාණය කරන ලද්දක් බවය.
මෙය කිසිසේත්ම නිර්මාණය කළ දෙයක් නොවන අතර, සැකකරු අදාළ අල්ලස් මුදල ලබාගෙන ඔහුගේ කලිසම් සාක්කුවට දමාගෙන ඇති බවට උපායදූතයා සඳහන් කළ බව ද අල්ලස් කොමිසම අධිකරණයට කරුණු සඳහන් කළේය.
අදාළ අල්ලස් මුදල තම සේවාදායකයා ඔහුගේ කලිසම් සාක්කුවට දමා ගන්නවා උපායදූතයා දුටුවා නම් ඔහුගේ මේස ලාච්චු ඇද පරීක්ෂාවට ලක් කළේ මන්දැයි මෙහිදී නීතිඥවරයා අධිකරණයට කරුණු ඉදිරිපත් කළේය. චුදිත පාර්ශ්වය ප්‍රකාශ කරන අන්දමට අල්ලස් මුදල ලබාගත් සැකකරු ඔහුගේ කලිසම් සාක්කුවේ දමා ගන්නවා උපායදූතයා දුටුවා නම් ඔහුගේ මේස ලාච්චුව පරීක්ෂා කළේ මන්දැයි අධිකරණය අල්ලස් කොමිසමෙන් ප්‍රශ්න කර සිටියේය. අදාළ සිද්ධිය සම්බන්ධයෙන් තවදුරටත් විමර්ශන සිදුවන බැවින් ඉදිරි දිනට සවිස්තර වාර්තාවක් ඉදිරිපත් කරන තෙක් සැකකරු රක්ෂිත බන්ධනාගාරගත කරන ලෙසට මෙහිදී අල්ලස් කොමිසම අධිකරණයට දැනුම් දුන්නේය.
ඉදිරිපත් වූ කරුණු සැලකිල්ලට ගත් අධිකරණය සැකකරු සම්බන්ධ සියලු වාර්තා සහිතව විමර්ශන කඩිනම් කර අධිකරණයට දැනුම් දෙන ලෙසට අල්ලස් කොමිසමට නියම කරමින් සැකකරු ලබන 06 වැනිදා තෙක් රක්ෂිත බන්ධනාගාරගත කර එදින තෙක් නඩුව කල් තැබීය.
0 Comments