වෛද්‍ය නිර්දේශයක් නැතිව රැගෙන ආ එන්නතක් රෝගියකුට ලබාදීම ප්‍රතික්ෂේප කළ හිරිපිටිය ප්‍රාදේශීය රෝහලේ වෛද්‍යවරයකුට තර්ජනය කිරීමේ සිද්ධියක් සම්බන්ධයෙන් සැකපිට අත්අඩංගුවට ගත් පෞද්ගලික ඖෂධ වෙළෙඳසල් හිමිකරුවකු ඇතුළු සිව්දෙනකු ලබන 22 වැනිදා දක්වා රිමාන්ඩ් භාරයට පත් කිරීමට කුරුණෑගල ප්‍රධාන මහේස්ත්‍රාත් බන්දුල ගුණරත්න මහතා නියම කළේය.
කුරුණෑගල හිරිපිටිය නගරයේ ඖෂධ වෙළෙඳසලක හිමිකරුවකු සමඟ ඔහුගේ මිතුරන් තිදෙනකු මෙලෙස රිමාන්ඩ් භාරයට පත් කර තිබේ.
හිරිපිටිය ප්‍රාදේශීය රෝහලේ නේවාසිකව ප්‍රතිකාර ලබමින් සිටින තම බිරියට එන්නත් කිරීම සඳහා සැකකාර ඖෂධ වෙළෙඳසල් හිමියා පසුගිය 14 වැනිදා රාත්‍රියේ ප්‍රතිජීවක ඖෂධයක් රැගෙන රෝහලට ගොස් තිබූ අතර වෛද්‍ය නිර්දේශයක් නැතිව රැගෙන ආ එම ඖෂධය රෝගියාට ලබාදීම එම අවස්ථාවේ සේවයේ යෙදී සිටි වෛද්‍යවරයා ප්‍රතික්ෂේප කර ඇත. එම ඖෂධය ලබාදීමට නම් වෛද්‍ය නිර්දේශයක් අවශ්‍ය බව වෛද්‍යවරයා ඔහුට දැනුම්දී ඇත.
ඉන් කෝපයට පත් ඖෂධ වෙළෙඳසල් හිමිකරු වෛද්‍යවරයාට තර්ජනය
කර පිටව ගොස් ආපසු තම මිතුරන් තිදෙනකු ද සමඟ පැමිණ නැවත වරක් තර්ජනය කර
වෛද්‍යවරයාගේ රාජකාරි කටයුතුවලට ද බාධා වන අයුරින් හැසිරී තිබේ.
වෛද්‍යවරයා තමන් මුහුණදුන් එම සිද්ධිය වැල්ලව පොලිසියට පැමිණිලි
කිරීමෙන් පසුව පරීක්ෂණ සිදු කර තර්ජනය කළ බව කියන ඖෂධ වෙළෙඳසල් හිමියා
සමඟ ඔහුගේ මිතුරන් තිදෙනා ද සැකපිට අත්අඩංගුවට ගෙන තිබේ. මෙම
සිද්ධියෙන් අනතුරුව වෛද්‍යවරයා තම ජීවිත ආරක්ෂාව පතා
හිරිපිටිය රෝහලෙන් වෙනත් රෝහලකට ස්ථාන මාරුවක් ඉල්ලා තිබෙන බව වාර්තා වුවද ඒ සම්බන්ධයෙන් තොරතුරු දැන ගැනීම සඳහා වයඹ පළාත් සභාවේ සෞඛ්‍ය අංශයේ කිසිදු උසස් නිලධාරියකු සම්බන්ධ කරගත නොහැකි විය. මෙම වෛද්‍යවරයා ස්ථාන මාරුවක් ලැබීමට ආසන්නව සිටි අයකු බව ද වාර්තා වේ.
(පුෂ්පකුමාර ජයරත්න)
0 Comments