ප්‍රේම සම්බන්ධයක් පවත්වාගෙන යමින් සිට ඇතැයි කියන 15 හැවිරිදි බාලවයස්කාර පාසල් දැරියක රවටා ගෙන ගොස් ඇය අපයෝජනය කළා යැයි කියන 20 හැවිරිදි තරුණයෙකු හා එයට අනුබල දුන් බව කියන තරුණයාගේ සගයකු ඊයේ (08දා) අත්අඩංගුවට ගත් බව කිරිබත්ගොඩ පොලීසිය සඳහන් කරයි.ඉඹුල්ගොඩ පරකන්දෙනිය ප්‍රදේශයේ පදිංචි 20 හැවිරිදි සැකකරු හා ඔහුට අනුබල දුන්නා යැයි කියන කිරිබත්ගොඩ ඊරිය වැටිය ප්‍රදේශයේ පදිංචි 42 හැවිරිදි පුද්ගලයෙකු මෙසේ අත්අඩංගුවට ගනු ලැබ තිබේ.
කිරිබත්ගොඩට ආසන්න ප්‍රදේශයක පදිංචි මෙම පාසල් දැරියගේ මවුපියන් වෙන්වෙන්ව වාසය කරන අතර දැරිය ආච්චි අම්මාගේ සහ සීයාගේ රැකවරණයෙන් සිට ඇත.දැරිය 2022 වසරේ ජනවාරි හෝ පෙබරවාරි මාසයේ දිනක අම්මා පදිංචිව සිටි වැලිවේරිය ප්‍රදේශයේ නිවසේ සිටියදී සිය පෙම්වතා යැයි කියන තැනැත්තාගේ ඉල්ලීම මත ඔහු හමුවීමෙන් පසු ඔහුගේ හිතවතෙකුගේ කිරිබත්ගොඩ ඊරිය වැටිය ප්‍රදේශයේ පිහිටි නිවසකට ගොස් එහි කාමරයකදී දැරිය අපයෝජනය කර ඇතැයි පැවසේ.
පසුව දෙදෙනා විරසකවී ඇතැයිද කියයි. මෙම සිද්ධිය පිළිබඳ පියාට දැනගැනීමෙන් පසු පොලීසියට පැමිණිලි ඉදිරිපත් කර ඇත. ඒ අනුව පරීක්ෂණ ආරම්භ කළ පොලීසිය සැකකරුවන් අත්අඩංගුවට ගනු ලැබ තිබේ. සැකකරුවන් මහර මහේස්ත්‍රාත් අධිකරණයට ඉදිරිපත් කිරීමට කටයුතු යොදා ඇති අතර 15 හැවිරිදි දැරිය වෛද්‍ය පරීක්ෂණය සඳහා රාගම මහ රෝහලට ඇතුළත් කර ඇත.කිරිබත්ගොඩ පොලීසිය සිද්ධිය පිළිබඳ වැඩිදුර පරීක්ෂණ සිදු කරයි.
(පද්මසිරි රණතුංග)
0 Comments