නීතිඥයකු ලෙස ව්‍යාජ ලෙස පෙනී සිටිමින් කටයුතු කළ යාපනයේ උඩුවිල් ප්‍රදේශයේ පදිංචි පුද්ගලයෙකු යාපනය පොලිසිය විසින් 23දා අත්අඩංගුවට ගෙන තිබේ.
මෙම පුද්ගලයාව චාවාකච්චේරී මහේස්ත්‍රාත්වරයා වෙත ඉදිරිපත් කළ අවස්ථාවේදී රුපියල් ලක්ෂ දහය බැගින් වූ ශරීර ඇප දෙකක් මත සැකකරුව නිදහස් කිරීමට මහේස්ත්‍රාත්වරයා පියවර ගෙන තිබිණි.
තමන් නීතිඥවරයකු යැයි කියා ගත් මෙම පුද්ගලයා යාපනයේ උඩුවිල් ප්‍රදේශයේ කාර්යාලයක්ද පවත්වා ගෙන ගොස් තිබේ.
විදේශ රටක ජීවත් වූ කාන්තාවක් නිවාඩුවකට යාපනයට පැමිණ සිය ස්වාමිපුරුෂයාගෙන් දික්කසාද වීමට ඇතිවූ අවශ්‍යතාවක් මත වෙනත් නීතිඥවරයකු හමු වීමට ගිය විට එම අඹු සැමි යුවළ ඊට වසර හතරකට පෙර ව්‍යාජ නීතිඥවරයා විසින් දික්කසාදකොට ඇති බවට තොරතුරු හෙළි වී තිබේ.
පසුව එම කාන්තාව මේ පිළිබඳව යාපනය පොලිසියට පැමිණිලි කිරීමෙන් පසුව පොලිසිය විසින් සිදු කළ පරීක්ෂණවලදී මොහු ව්‍යාජ නීතිඥයකු බවත් ඉහත කී දික්කසාදයද ව්‍යාජ ලෙස සිදු කළ එකක් බවටත් තොරතුරු හෙළි වී තිබේ.
තවදුරටත් සිදු කළ පරීක්ෂණවලදී අනාවරණය වී ඇත්තේ මොහු විසින් යාපනයේ ප්‍රදේශ කීපයකම පුද්ගලයින්ව රවටා විශාල මුදලක් උපයාගෙන ඇති බවයි. ඇප මත නිදහස් වූ මෙම ව්‍යාජ නීතිඥවරයාට එරෙහිව නඩු විභාගය සැප්තැම්බර් මස 19 වැනිදා පැවැත්වීමට නියමිතය.
( රසුල දිල්හාර ගමගේ)
0 Comments