‘මම අවුට් වුණොත් ඔයාට තමයි මැච් එක ඉවර කරන්න වෙන්නේ’ චමරි දුන් උප­දේ­ශය

ශ්‍රී ලංකා කාන්තා ක්‍රිකට් ඉති­හා­සයේ ස්වර්ණ­මය පරි­ච්ඡේ­ද­යක් ලියා තැබූ චමරි අත­ප­ත්තුගේ නාය­ක­ත්ව­යෙන් යුතු ශ්‍රී ලංකා ක්‍රීඩි­කාවෝ මෙරට ක්‍රිකට් ජය­ග්‍ර­හණ ඉඩෝ­ර­යට දිය දෝතක් එක් කළහ. පෙර නොවූ විරූ අයු­රින් අතුරු සිදුරු නැතුව පිරී ගිය දඹුල්ල ක්‍රීඩාං­ග­ණ­යේදී ශ්‍රී ලංකා පිලේ ඓති­හා­සික ජය­ග්‍ර­හ­ණය තහ­වුරු වූයේ කවීෂා දිල්හාරි එල්ල කළ දැවැන්ත හයේ පහ­රත් සම­ගිනි.

අව­සන් මිනිත්තු කිහි­ප­යේදී චමරි අත­පත්තු තර­ගය නැරැ­ඹූයේ ද වරින් වරය. ඒ මොහොතේ ඇය සිටියේ හතරේ සීමා­වෙන් පිටත ක්‍රීඩ­ක­යන්ගේ අට්ටා­ලය පසු­පස එහා මෙහා සක්මන් කර­මිනි. කවී­ෂාගේ හයේ පහ­රත් සමඟ ශ්‍රී ලංකාව ආසි­යානු ශූරි­යන් බවට පත්වෙද්දී හතරේ සීමා­වෙන් එපිට සිටි සිය­ලුම ක්‍රීඩි­කාවෝ ක්‍රීඩා පිටිය මැදට දිව ගියහ. එහෙත් ඒ වන විටත් චමරි සිටියේ පිටියේ පහළ ක්‍රීඩි­කා­වන් රැඳී සිටින අට්ටා­ලය පසු­පස බිම දණ­ග­සා­ගෙ­නය. ඇය මේ ජය­ග්‍ර­හ­ණය ඇය කාල­යක් තිස්සේ සිහින දකි­මින් සිටි­යාය. දැන් එය ඉටු වී තිබේ.

2004 සිට ඇර­ඹුණු කාන්තා ආසි­යානු කුස­ලාන තර­ගා­ව­ලියේ වැඩිම වාර ගණ­නක් ශූර­තාව දිනා සිටියේ ඉන්දි­යා­වය. ඔවුන් ආසි­යානු කුස­ලාන 7ක්ම දිනා සිටි අතර, බංග්ලා­දේ­ශය එකක් දිනා ගත්තේය. එහෙත් 2022 ආසි­යානු කුස­ලාන තර­ගා­ව­ලිය දක්වා ශ්‍රී ලංකාව පස්ව­තා­වක්ම අව­සන් තර­ග­යට පැමිණ අනු­ශූ­රියෝ බවට පත්ව සිටි­යහ. එබැ­වින් මේ ජය­ග්‍ර­හ­ණය ශ්‍රී ලංකා කාන්තා ක්‍රිකට් වංශ කතා­වට රන් අකු­රින් ලියූ පරි­ච්ඡේ­ද­යක් බවට පත් විය.

සැබැ­වින්ම මුල සිටම තර­ගය තිබුණේ ඉන්දි­යාවේ වාසි­ය­ටය. ඔවුන් කාසියේ වාසි­යත් දිනා ගත් අතර, ඉනිම අත­ර­තු­රදී ප්‍රබ­ල­තම පිති­කා­රි­නිය ස්ම්‍රිටි මන්දා­නා‍ ­සහ රිචා ගොෂ් දුන් උඩ­ප­න්දුත් ශ්‍රී ලංකා­වට මඟ හැරී ගියේය.

ඒ උඩ පන්දු දෙකම ගිලිහී ගියේ අන් කිසි­ව­කුට හෝ නොව ශ්‍රී ලංකාව ජය­ග්‍ර­හ­ණය දක්වා රැගෙන ගිය හර්ෂිතා සම­ර­වි­ක්‍ර­ම­ටය. මන්දානා ලකුණු 10ක් ලබා සිටි­යදී එම උඩ­ප­න්දුව දුන් අතර, අව­සා­නයේ ඇය පන්දු 47කින් ලකුණු 60ක් රැස් කළාය. කඩුලු රකින පිති­කා­රි­නිය රිචා ගොෂ් උඩ පන්දුව දුන්නේ ලකුණු 5ක් ලබා සිටි­ය­දීය. ඇය ලකුණු 9ක් ලබා සිටි­යදී පිත්තේ යාන්ත­මට ගැටුණු පන්දුව කඩුලු රකින අනුෂ්කා සංජී­වනී ඩැහැ ගත්තද විනි­සු­රු­ව­රිය ඇය නොදැ­වුණු පිති­කා­රි­නි­යක ලෙස සට­හන් කළාය. අන­තු­රුව ඇය කවීෂා දිල්හාරි යැවූ ඉනිමේ 19 වැනි ඕව­ර­යෙන් ලකුණු 18ක්ම උදුරා ගත්තාය. ඒ සම­ඟම එතෙක් ලකුණු 150ක් ඇතු­ළත අව­සන් වනු ඇතැයි සිතූ ඉන්දීය ඉනිම ලකුණු 170 සීමාව පසු කිරිමේ අව­දා­න­මක් මතු වූ අතර, එය 165කින් නිමා වූයේ අව­සන් ඕව­රය යැවූ උදේ­ශිකා ප්‍රබෝ­ධ­නීට පින්සිදු වන්න­ටය. ඇය සිය ඕව­ර­යේදී ලබා දුන්නේ ලකුණු 7ක් පමණි.

‘එහෙම දෙයක් වුණාට පස්සේ ඒ ගැන හිත හිතා ඉන්න බෑ. ඊළ­ඟට මොකද කරන්නේ කියලා අව­ධා­නය යොමු කරන්න ඕනා. අපි බලන්න ඕන මොන­වද අපිට පාල­නය කරන්න පුළු­වන් මොන­වද පාල­නය කරන්න බැරි කිය­ලයි.

හර්ෂිතා උඩ­පන්දු දෙකක් අත්හැ­රියා තමයි ඒත් ඇය ඊළ­ඟට තර­ගය දිනන ඉනි­මක් ක්‍රීඩා කළා.‘ චමරි අත­පත්තු තර­ග­යෙන් පසුව කීවාය.

‘මම හර්ෂි­තාට කිව්වා දැන් ඒක ඉව­රයි කියලා. ඊළ­ඟ­ටය කරන්න තියෙන දේ ගැන හිතන්න කියලා. මොකද අපට ඕන වුණේ ඇය නිවැ­රදි මාන­සි­ක­ත්ව­ය­කින් යුතුව බැට් කිරී­මයි. මම හර්ෂිතා එක්ක බැට් කරද්දී ඇයට කිව්වා කල­බල වෙලා මොකුත් කරන්න එපා කියලා. මම මගේ සාමාන්‍ය විදි­හට සෙල්ලම් කර­න්නම්. ඒත් මම අවුට් වුණොත් ඔයාට තමයි මැච් එක ඉවර වෙන­කල් අරං යන්න වෙන්නේ කියලා.‘

අව­සා­න­යේදී කවීෂා දිල්හාරි සමඟ එක්ව ඇය සිය නායි­කා­වගේ උප­දෙස් අකු­ර­ටම පිළි­පැ­ද්දාය. නොදැවී ලකුණු 69ක්ම රැස් කර­මින් තර­ගයේ වීරයා සම්මා­න­යත් දිනා ගත්තාය. කවී­ෂාගේ හයේ පහ­ර­කින් ජය­ග්‍ර­හ­ණය වාර්තා වෙද්දී ඉනිම නිමා­වී­මට තවත් පන්දු අටක්ම ඉති­රිව තිබිණි.
(ෆවුස් මොහොමඩ්)