පුද්ගලයකුගේ දණ ඉසෙන් පහළ කොටස නොමැති එල්ලී මැරුණ බවට සැක කළ හැකි පුද්ගල මළ සිරුරක් ලග්ගල මාඔය මැණික් ඉඩමක් තුළ තිබී ඊයේ (24) හමුවූ බව ලග්ගල පොලිසිය පවසයි.
රත්නපුර ප්‍රදේශයේ ප්‍රසිද්ධ මැණික් ව්‍යාපාරිකයකුට අයත් ලග්ගල මාඔය ජනසවි ගම ප්‍රදේශයේ මැණික් ඉඩමක කෙළවරෙහි ගිනිසීරියා ගසක නරක් වූ පුද්ගල මළ සිරුරක කොටසක් ඇති බවට ලග්ගල පොලිසියට ලැබුණු තොරතුරකට අනුව පොලිස් නිලධාරීන් විසින් එම ස්ථානයට ගොස් පරීක්ෂණ කටයුතු ආරම්භ කර තිබේ.
අදාළ මැණික් ඉඩමෙහි මැණික් කැණීම් කටයුතු සිදුකර ඇති අතර එම කටයුතු මීට මාස කිහිපයකට පෙර සිට නවතා දමා ඇති බවට තොරතුරු අනාවරණය වන අතර මෙම මළ සිරුර වයස අවුරුදු 40ත් - 50ත් අතර පිරිමි පුද්ගලයෙකුගේ බවට සැක කෙරෙන අතර එම සිදුවීම මීට මාස තුන හතරකට පමණ පෙර සිදුවන්නට ඇති බවට පොලිසිය විසින් සැක කරනු ලබයි.
කඹයක ආධාරයෙන් ගසක අඩි දහයක පමණ උසින් පිහිටි තිරස් අතට වූ අත්තක එල්ලී පැවති එම මළ සිරුරෙහි දණ ඉසෙන් පහළ කොටස් සතුන් විසින් ආහාරයට ගෙන ඇති බවටද සැක කළ හැකි අතර මරණයට පත් වූ පුද්ගලයා පිළිබඳ නිශ්චිත තොරතුරක් මේ වන විටත් සොයා ගැනීමට නොහැකි වූ අතර
අදාළ සිද්ධියට සම්බන්ධ පුද්ගලයා විසින්ම සිය ගෙල වැලලාගෙන මරණයට පත්වූයේද, නැතහොත් වෙනත් ස්ථානයක සිදුවූ සිදුවීමකින් අනතුරුව මෙම ස්ථානයට රැගෙන විත් මෙම සිදුවීම සිදුකර ඇත්තේ ද යන්න පිළිබඳ පොලිසිය විසින් විමර්ශන කටයුතු ආරම්භ කර තිබේ.
අදාළ සිද්ධිය පිළිබඳ වැඩිදුර පරීක්ෂණ කටයුතු ලග්ගල පොලිස් ස්ථානාධිපති ප්‍රධාන පොලිස් පරීක්ෂක ධම්මික පද්මරාජ මහතා ඇතුළු කණ්ඩායම විසින් සිදු කරනු ලබයි.
0 Comments