ජනති විමුක්ති පෙරමුණේ දේශපාලනඥ කේ.ඩී. ලාල් කාන්ත මහනුවර පැවති රැස්වීමකදී තමන්ට බැණ තර්ජනය කළ බව කියමින් මහනුවර මහ නගර සභාවේ වැටලීම් අංශයේ ප්‍රධානී අනුර වස්ගේවත්ත නමැති අය මහනුවර පොලිස් මූලස්ථානයට කළ පැමිණිල්ල සම්බන්ධයෙන් විමර්ශනයක් ආරම්භ කර තිබේ.
සිද්ධිය සම්බන්ධයෙන් මහනුවර නාගරික
කොමසාරිස්වරියගෙන් ප්‍රකාශයක් ලබා ගැනීමට කටයුතු කරන බව මහනුවර
පොලිසිය පවසයි. ජාතික ජනබලවේගයේ නායක අනුර කුමාර දිසානායක මහතාගේ
ප්‍රධානත්වයෙන් මහනුවර මධ්‍යම වෙළෙඳ පොළ ඉදිරිපිට දී පසුගිය 16
වැනි දින පැවැති ප්‍රචාරක රැලියේ දී මෙම තර්ජනය සිදු කළ බව කියමින්
වස්ගේවත්ත නමැති අය එහි හඬ පටයක් ද පොලිසියට ඉදිරිපත් කළේය.
මැතිවරණ ජයග්‍රහණයෙන් පසු ජාතික ජනබලවේගය ඇති කරන
පුනරුදයේ යුගය පැමිණි පසු මෙවැනි අයව පුනරුත්ථාපනය කළ යුතු බව
කියමින් ලාල්කාන්ත නමැති අය තමන්ගේ නම දහස් සංඛ්‍යාත ජනතාව ඉදිරියේ
ප්‍රකාශ කිරීම තුළින් තමන් ගේ ජීවිතයට තර්ජනයක් ඇතිවිය හැකි බව ද
වස්ගේවත්ත නමැති අය පොලිසියට පවසා තිබේ.
මෙම සිදුවීමට අදාළව නගර සභාවේ තවත් සේවකයන් පිරිසකගෙන්
ප්‍රකාශ ලබා ගැනීමට නියමිත බවත් ඉන් අනතුරුව ඒ සම්බන්ධ ඉදිරි
ක්‍රියාමාර්ග ගන්නා බවත් පොලිසිය පවසයි.
(අසේල කුරුළුවංශ)
0 Comments