ත්‍රිරෝද රථයක අංකය යටතේ රුපියල් කෝටි ගණනක් වටිනා මිනිකූපර් වර්ගයේ සුඛෝපභෝගී මෝටර් රථයක් ලියාපදිංචි කිරීම හා ඒ සඳහා ආධාර අනුබල දීම ඇතුළු අධිචෝදනා යටතේ මෝටර් රථ ප්‍රවාහන කොමසාරිස් දෙපාර්තමේන්තුවේ හිටපු නියෝජ්‍ය කොමසාරිස්වරයකු ඇතුළු නිලධාරීන් 7 දෙනකුට එරෙහිව පවරා තිබූ නඩුවක් ඊයේ (29) අල්ලස් හෝ දූෂණ විමර්ශන කොමිෂන් සභාව ඉල්ලා අස් කරගන්නා ලදි.
කොළඹ මහාධිකරණ විනිසුරු නවරත්න මාරසිංහ මහතා ඉදිරියේ නඩුව කැඳවූ අවස්ථාවේ අල්ලස් කොමිසම වෙනුවෙන් පෙනී සිටි නිලධාරීන් නැවත ගොනු කිරීමේ අයිතියට යටත්ව නඩුව ඉල්ලා අස්කර ගත්තේය.
මෙලෙස නඩුවෙන් නිදහස් වූයේ එවකට මෝටර් රථ ප්‍රවාහන කොමසාරිස් දෙපාර්තමේන්තුවේ නියෝජ්‍ය කොමසාරිස්වරයකු ලෙස කටයුතු කළ වර්තමාන ඉඩම් කොමසාරිස් ජනරාල් බන්දුල ජයසිංහ, මෝටර් රථ ප්‍රවාහන කොමසාරිස් දෙපාර්තමේන්තුවේ වැඩසටහන් සම්පාදකවරයකු වන රෝහිත සමරවීර, විමර්ශන හා සංවර්ධන සහකාර උපුල් ප්‍රියන්ත ද සිල්වා, විමර්ශන සහකාර කේමන්ත මුත්තුංග (මේ වනවිට විදේශගතව), ලිපිකරුවකු ලෙස කටයුතු කළ චන්න රෝහිත, සිවිල් වැසියන් වන ධර්මරත්න ජයන්ත හා අජිත් කුමාර යන විත්තිකරුවන්ය.
අල්ලස් හෝ දූෂණ කොමිසම ඉදිරිපත් කළ චෝදනා පත්‍රය නිසි පරිදි ඉදිරිපත් කර නැති බවට විත්තිය වෙනුවෙන් පෙනී සිටි නීතිඥ හෆිල් පාරිස් මහතා ශ්‍රේෂ්ඨාධිකරණය ඉදිරියේ රිට් පෙත්සමක් ඉදිරිපත් කරන ලදී. ඒ පිළිබඳ තීන්දුව දෙන තෙක් මහාධිකරණය ඉදිරියේ විභාග වන නඩුව වළක්වන ලෙස නීතිඥවරයා අතුරු තහනම් නියෝගයක් ඉල්ලා සිටීම කර ඇත. එම මූලික විරෝධතාව අනුව නඩුව ඉල්ලා අස්කර ගැනීම සිදු විය.
2015 මැයි 16 වැනිදාත් සැප්තැම්බර් 23 වැනිදාත් අතර කාලසීමාවේදී ත්‍රිරෝද රථයක් බව හඟවමින් ඒ වෙනුවට රේගුවට හොර රහසේ නීති විරෝධී ආකාරයෙන් ගෙන්වූ මිනිකූපර් රථයක් ලියාපදිංචි කිරීමෙන් රජයට පාඩු කිරීම ඇතුළු චෝදනා යටතේ විත්තිකරුවන්ට එරෙහිව අල්ලස් හෝ දූෂණ චෝදනා විමර්ශන කොමිසම මේ නඩුව පවරා ඇත.
මෝටර් රථ ප්‍රවාහන කොමසාරිස් දෙපාර්තමේන්තුවේ වැඩසටහන් සම්පාදකවරයකු ලෙස කටයුතු කරමින් එම දෙපාර්තමේන්තුවේ පරිගණක පද්ධතියට ඇතුළු වී එකී මිනිකූපර් රථය අජිත් කුමාර වනිසුන්දර නමැති විත්තිකරුගේ නමින් ලියාපදිංචි කිරීමෙන් ශ්‍රී ලංකා රේගුවට අයවිය යුතු රුපියල් ලක්‍ෂ 26කට අධික රේගු ගාස්තුවක් අහිමි කිරීමත් ඒ සඳහා ආධාර අනුබල දීමත් එම විත්තිකරුවන්ට එරෙහිව එල්ල වී තිබූ චෝදනා වේ. අධිචෝදනා 60ක් යටතේ අල්ලස් පනතේ 70 වගන්තිය යටතේ සඳහන් දූෂණය නමැති වරද සිදුකරන ලදැයි විත්තිකරුවන්ට එරෙහිව මේ නඩුව ගොනුකර තිබේ.
(චන්දන ජයවීර)
0 Comments