වරකාපොළ ඉහළ පුහුලේගම ප්‍රදේශයේ පදිංචිව සිටි වයෝවෘද්ධ කාන්තාවක් ඊයේ (26) අලුයම නි‍ෙවස ආසන්නයේ ඇති ආරක්ෂක බැම්මක් බැඳ තිබුණු ළිඳකට වැටී මියගොස් ඇතැයි වරකාපොළ පොලිසිය පවසයි.
මෙසේ මියගොස් ඇත්තේ වරකාපොළ දංඕවිට ඉහළ පුහුලේගම අංක සී 09 ලිපිනයේ පදිංචිව සිටි 84 හැවිරිදි අස්සැල්ලලාගේ බේලාවති කුමාරසිරි නැමැති පස්දරු වයෝවෘද්ධ කාන්තාවකි. මියගොස් ඇති කාන්තාවට ගැහැනු දරුවන් තිදෙනෙක් හා පිරිමි දරුවන් දෙදෙනෙක් සිට ඇති අතර එක් පිරිමි දරුවෙක් මිය ගොස් තිබේ. ඇගේ සැමියා ද 2005 වර්ෂයේදී මියගොස් ඇත.
විවාහක ගැහැනු දරුවන් දෙදෙනෙක් සමඟ මහ ගෙදර නිවසේ පදිංචිව සිට ඇති කාන්තාව වසර ගණනාවක සිට අසනීප තත්ත්වයන් කීපයකට ප්‍රතිකාර ගනිමින් සිට ඇති බවත් පොලිසිය පැවසීය.
නිවස ආසන්නයේ අඩි 52ක් ගැඹුරු ආරක්ෂක බැම්මක් බැඳ ඇති ළිඳක් ඇති බවත් එම ළිඳේ අඩි 7ක පමණ ජලය පිරී තිබුණු බවත් පොලිසිය පැවසීය.
ඊයේ (26) පාන්දර එකට පමණ දියණියකගෙන් කහට තේ ඉල්ලා ඇති බවත් දියණියක් තේ කෝප්පයක් සාදාදී තිබේ. පාන්දර 4.00ට පමණ නිවසේ පිටුපස දොර විවෘත කර තිබීම හේතුවෙන් නිවසේ සිට එක් දියණියක් මව සොයා තිබේ. පසුව මිදුලට පැමිණ සොයා බලා නැති අවස්ථාවේ ළිඳ ද බලා ඇති බවත් පොලිසිය පැවසීය. පසුව මවගේ සිරුර ළිඳේ පාවෙන අයුරු දැක දියණියක් වරකාපොළ පොලිසියට පැමිණිල්ලක් ඉදිරිපත් කර තිබුණි.
වරකාපොළ පොලිසිය වරකාපොළ මහේස්ත්‍රාත් අධිකරණයට ඊයේ (26) දහවල් සිද්ධිය සම්බන්ධයෙන් කරුණු වාර්තා කළේය. වරකාපොළ වැඩ බලන මහේස්ත්‍රාත් ශාන්ත වර්ණකුලසූරිය මහතා සිද්ධිය වූ ස්ථානයට ගොස් මූලික විමර්ශන සිදු කළ අතර මහේස්ත්‍රාත් ඉදිරියේ දේහය ගොඩට ගැනිණි. දේහය කෑගල්ල මහ රෝහලේ අධිකරණ වෛද්‍යවරයා වෙත ඉදිරිපත් කර පශ්චාත් මරණ පරීක්ෂණයක් පවත්වා අනතුරුව දේහය පුතාට භාරදෙන ලෙසත් වෛද්‍ය වාර්තාව අධිකරණයට ඉදිරිපත් කරන ලෙසත් අගෝස්තු 9 වැනිදා දරුවන්ට අධිකරණයේ පෙනී සිටින ලෙසත් වැඩ බලන මහේස්ත්‍රාත්වරයා නියෝග කළේය.
වරකාපොළ පොලිසියේ අපරාධ විමර්ශන අංශයේ ස්ථානාධිපති පොලිස් පරීක්ෂක මුදිත බණ්ඩාර, පොලිස් සැරයන් ඒ.පී. බර්නාඩ් සිරිවර්ධන (29255), කෑගල්ල කොට්ඨාස අපරාධ ස්ථාන පරීක්ෂණාගාරයේ ස්ථානාධිපති ප්‍රධාන පොලිස් පරීක්ෂක තිවංක දෙහිමඩුගේ, පොලිස් පරීක්ෂක උපාලි ජයසේකර, පොලිස් සැරයන් ගුණසිංහ (19641) නිලධාරීන් කණ්ඩායම විමර්ශන කටයුතු සිදු කරති.
(චමින්ද ජයලත්)
0 Comments