අනුරාධපුර නෙළුම්කුලම ප්‍රදේශයේ නිවසක කුලී පදනම මත සේවය කරමින් කිරි ගවයන් රැකබලා ගෙන සිටින අතරවාරයේදී එම නිවසේ තිබූ යතුරුපැදියක් ඇතුළු ලක්ෂ අටකට ආසන්න දේපොළ සොරකම් කර පලා ගිය 20 හැවිරිදි අඹු සැමි යුවළක් පෙරේදා (29) නාරම්මල ප්‍රදේශයේදී අත්අඩංගුවට ගත් බව අනුරාධපුර මූලස්ථාන පොලිසිය පවසයි.
මෙලෙස අත්අඩංගුවට පත්ව ඇත්තේ පුත්තලම, රත්මල්යාය ප්‍රදේශයේ පදිංචි පිරිමි පුද්ගලයකු සහ දෙහිඕවිට ගොඩගම්පල පදිංචි විසිහැවිරිදි යුවළකි.
සොරකම සිදුව තිබූ නිවසේ පදිංචිව සිටි බිරිය සහ සැමියා කුරුණෑගල ප්‍රදේශයේ විදේශ රැකියා ආයතනයක රැකියාව සිදු කරන අතරවාරයේ කිරි ගව පාලනය සිදු කරන බවත් නිවාඩුවට පැමිණ සිටි අවස්ථාවේදී මෙම සොරකම සිදුව තිබූ බව පොලිසිය පවසයි.
සැකකරු හා සැකකාරිය ගවයන් ගාල්කරන වත්තේ ඇති නිවසක නැවතී සිටීමට සලස්වා ගවයින්ගේ කිරි රැගෙන යෑම සඳහා යතුරුපැදියක් ද ලබා දී තිබූ බව පැමිණිල්ලේ සඳහන් වේ.
ඒ අනුව නිවසේ තිබූ යතුරුපැදිය, ජංගම දුරකතන තුනක්, මුදලින් රුපියල් 236,000ක්, රන් මාලයක්, රන් අත්පලඳනාවක් ඇතුළු රුපියල් හත්ලක්ෂ හැත්තෑඑක්දාහක මුදල් හා දේපොළ රැගෙන ගොස් ඇති බව පැමිණිල්ලේ වැඩිදුරටත් සඳහන්ව ඇති බව පොලිසිය පවසයි.
සැකකාර යුවළගෙන් සිදු කළ ප්‍රශ්න කිරීම්වලදී සොරකම් කරන ලද දේපොළවලින් කොටසක් සොයා ගෙන ඇත.
අත්අඩංගුවට ගත් සැකකාර යුවළ අනුරාධපුර මහේස්ත්‍රාත් අධිකරණයට ඉදිරිපත් කිරීමට නියමිතව ඇත.
(අනුරාධපුර - සශිනි මධුෂානි)
0 Comments