මන්නාරම දිස්ත්‍රික් රෝහලේදී තරුණ උපාධිධාරි කාන්තාවක අධික ලෙස රුධිරය වහනය වීමෙන් මියයෑම සම්බන්ධයෙන් එම රෝහලේ වෛද්‍යවරයකුගේත් හෙදියන් දෙදෙනකුගේත්, පවුල් සෞඛ්‍ය සේවිකාවකගේත් සේවය සෞඛ්‍ය අමාත්‍යාංශය විසින් පෙරේදා (20) සිට අත්හිටුවා තිබේ.
මන්නාරමේ මුරුන්කන් ප්‍රදේශයේ පදිංචි මරියරාජ් සින්ධුජා නම් 27 හැවිරිදි උපාධිධාරි කාන්තාවක මුරුන්කන් රෝහලේදී දරුවකු ප්‍රසූත කළ අතර, ඇය ආපසු නිවෙසට යෑමෙන් පසුව අධික ලෙස රුධිරය වහනය වීම හේතුවෙන් යළි මුරුන්කන් රෝහලට ඇතුළත් කිරීමෙන් පසු ඇය මන්නාරම දිස්ත්‍රික් රෝහල වෙත මාරු කොට යවා ඇත. එහිදී ඇය ඇතුළත් කළ වාට්ටුවේ කාර්ය භාර වෛද්‍යවරයා හා හෙදියන් ඇතුළු කාර්ය මණ්ඩලය මේ සිද්ධිය සාමාන්‍ය රුධිරය වහනය වීමක් ලෙස සලකා රෝගි කාන්තාවට ප්‍රතිකාර දී නැත. පැය කීපයකට පසු ඒ කාන්තාව මියගිය අතර, ඇයගේ මව විසින් ජනාධිපතිවරයාගේ සිට සියලු බලධාරීන්ට පෙත්සම් ඉදිරිපත් කිරීමෙන් අනතුරුව සිද්ධිය සම්බන්ධයෙන් පරීක්ෂණ දෙකක් ආරම්භ විය.
උතුරු පළාත් සෞඛ්‍ය සේවා අධ්‍යක්ෂවරයා හා සෞඛ්‍ය අමාත්‍යාංශය විසින් එම පරීක්ෂණ ආරම්භ කළ අතර, එහිදී එදින සේවයේ නිරතව සිටි මන්නාරම රෝහලේ කාර්ය භාර වෛද්‍යවරයා, හෙදියන් දෙදෙනකු හා පවුල් සෞඛ්‍ය සේවිකාවක වරදකරුවන් බවට හඳුනා ගැනීමෙන් පසු ඔවුන්ගේ සේවය අත්හිටුවා තිබේ. එම ලිපි මේ වන විට සෞඛ්‍ය අමාත්‍යාංශයෙන් අදාළ නිලධාරීන් වෙත ලබා දී ඇති අතර, සිද්ධිය සම්බන්ධයෙන් පරීක්ෂණ කටයුතු තවදුරටත් සිදු වෙමින් පවතී.
මේ සිද්ධිය සම්බන්ධයෙන් අපක්ෂපාති පරීක්ෂණයක් පවත්වා වරදකරුවන්ට දඬුවම් දෙන ලෙස ඉල්ලමින් ජාත්‍යන්තර මානව හිමිකම් සංවිධාන කීපයක්ම ශ්‍රී ලංකාවේ ඉහළ පෙළේ සෞඛ්‍ය බලධාරීන්ගෙන් ඉල්ලීමක් කර ඇති අතර, සෞඛ්‍ය අමාත්‍යාංශයේ නිලධාරීහු පිරිසක් මන්නාරමේ රැඳී මේ පිළිබඳ වැඩිදුර විමර්ශනයක යෙදී සිටිති.
(රසුල දිල්හාර ගමගේ)
0 Comments