කොළඹ ප්‍රධාන මහෙස්ත්‍රාත් අධිකරණ නඩු භාණ්ඩ කාමරයේ සුරක්ෂිතව තබා තිබූ රුපියල් කෝටි 24ක් වටිනා හෙරොයින් කිලෝ 12ක් අතුරුදන් වී ඇති බව හෙළි වී ඇත. මහාධිකරණ නඩුවකට ඉදිරිපත් කිරීම සඳහා කොළඹ ප්‍රධාන මහේස්ත්‍රාත් අධිකරණ නඩු භාණ්ඩ කාමරයේ සුරක්ෂිතව තබා තිබූ මෙම හෙරොයින් තොගය රජයේ රස පරීක්ෂකවරයාට ඉදිරිපත් කිරීමට බව පවසා රහස් පොලිස් නිලධාරියකු වශයෙන් පෙනී සිටි පුද්ගලයකු රැගෙන ගොස් ඇති බව හෙළිවීම නිසා සිද්ධියට සම්බන්ධ සැකකරුවන් වහාම අත්අඩංගුවට ගෙන අධිකරණයට ඉදිරිපත් කරන ලෙස කොළඹ ප්‍රධාන මහෙස්ත්‍රාත් තිළිණ ගමගේ මහතා රහස් පොලිසියේ අධ්‍යක්ෂවරයාට ඊයේ (28) නියම කළේය.
රහස් පොලිසියෙන් යැයි පවසමින් අදාළ හෙරොයින් තොගය රැගෙන ගිය බව කියන 'තුරිඳු යෝෂිත' නමැත්තා කවුද? යන්න හෙළිකර ගැනීම සඳහා වහාම විමර්ශනයක් කිරීමට ද ප්‍රධාන මහෙස්ත්‍රාත්වරයා රහස් පොලිස් අධ්‍යක්ෂවරයාට නියම කළේය.කොළඹ මහාධිකරණයේ විභාග කෙරෙන හෙරොයින් නඩුවක නඩු භාණ්ඩ වශයෙන් ලකුණු කර ඇති මෙම හෙරොයින් කිලෝ 12 මහාධිකරණයට යැවීම සඳහා සොයන විට රහස් පොලිසියේ තරිඳු යෝෂිත ' නමැති නිලධාරියා වශයෙන් පෙනී සිටි පුද්ගලයකු රජයේ රස පරීක්ෂකවරයාට ඉදිරිපත් කිරීමට බව පවසමින් අදාළ හෙරොයින් තොගය ගෙන ගොස් ඇති බව
හෙළිවීමෙන් අනතුරුව මේ පිළිබඳ විමර්ශන කිරීමට ප්‍රධාන මහෙස්ත්‍රාත්වරයා රහස් පොලිසියේ අධ්‍යක්ෂවරයාට වැඩිදුරටත් නියම කළේය.සිද්ධිය සම්බන්ධයෙන් කොළඹ ප්‍රධාන මහෙස්ත්‍රාත් අධිකරණයේ නඩු භාණ්ඩ බාරකරු ඇතුළු නඩු භාණ්ඩ කාමරයේ සේවය කළ නිලධාරීන්ගෙන් මේ වන විට විමසීම් කර ඇතැයි ද වාර්තා වේ.
(මනෝප්‍රිය ගුණසේකර)
0 Comments