අතුරුගිරිය ටැටූ සාප්පුවක් තුළදී ව්‍යාපාරික සුරේන්ද්‍ර වසන්ත පෙරේරා නොහොත් ක්ලබ් වසන්ත ඇතුළු දෙදෙනකු ඝාතනය කර තවත් සිව්දෙනකුට බරපතළ තුවාල සිදු කිරීමේ සිද්ධියේ වෙඩික්කරුවන් ගිනි අවි රැගෙන පලාගිය WP-NC1976 බස් රථය සම්බන්ධයෙන් යම් තොරතුරක් දන්නේ නම් පහත සඳහන් දුරකතන අංකවලට දැනුම් දෙන ලෙස පොලිසිය මහජනතාවගෙන් ඉල්ලා සිටී.
බස්නාහිර පළාත් දකුණු අපරාධ කොට්ඨාසයේ ස්ථානාධිපති 0718596065 දුරකතන අංකයට හෝ අතුරුගිරිය පොලිසියේ ස්ථානාධිපතිගේ 0718591657 දුරකතනයට එම තොරතුරු දෙන ලෙසත්, රහස්‍යභාවය සුරකින බවත් පොලිසිය දන්වා සිටී. ක්ලබ් වසන්ත ඝාතනය කිරීම සඳහා පාතාල නායක ලොකු පැටී නමැත්තා රුපියල් කෝටියකට ආසන්න මුදලක් වැය කර තිබූ අතර, එයින් රුපියල් ලක්ෂ 41ක මුදලක් වැය කර තිබුණේ ඝාතනයෙන් අනතුරුව වෙඩික්කරුවන්ට පලායෑම සඳහා බස් රථයක් මිල දී ගැනීමට බව පොලිස් විමර්ශනවලදී අනාවරණය වී තිබිණි.
මතුගම කුඩලිගම හරහා කොළඹ දක්වා ධාවනයේ යෙදුණු දොර දෙකේ බස් රථය විකුණන බවට මුහුණු පොතේ පළ කර තිබූ දැන්වීමකට අනුව ඝාතන සිද්ධිය සිදු කිරීමට දින කීපයකට ඉහත අන්තර්ජාලය ඔස්සේ රුපියල් ලක්ෂයක අත්තිකාරම් මුදලක් ගෙවා, ඉතිරි මුදල එකවර ගෙවා මිල දී ගෙන තිබුණේ මිරිස්ස පොල්අතුමෝදර අඹ ගහවත්ත ප්‍රදේශයේ 21 හැවිරිදි කාන්තාවකගේ නමට බව පොලිස් විමර්ශනවලදී අනාවරණයවීමෙන් අනතුරුව එම කාන්තාවද පොලිසිය මඟින් අත්අඩංගුවට ගැනීනි.
ඉකුත් මස 8 වෙනි දින ව්‍යාපාරික වසන්ත සුරේන්ද්‍ර පෙරේරා හෙවත් ක්ලබ් වසන්ත ඝාතන සිද්ධියෙන් අනතුරුව වෙඩික්කරුවන් දෙදෙනා මෝටර් රථයේ නැඟ , අනතුරුව වෑන් රථයට නැඟ මඳ දුරක් ගොස් කොරොතොට විහාරස්ථානයක් ආසන්නයේ නවතා තිබූ බස් රථයට නැඟ අධිවේගී මාර්ගය ඔස්සේ කතරගම බස් නැවතුම්පොළ දක්වා ගිනි අවි රැගෙන ගොස් ඇති බව පොලිසිය සිදු කළ විමර්ශනවලදී අනාවරණය වී තිබිණි. ඩුබායි රාජ්‍යයේ සැඟව සිටින පාතාල නායක ලන්දුවා හන්දි පුෂ්ප කුමාර හෙවත් ලොකු පැටි නැමැත්තාගේ නව සැලසුමකට අනුව ආරක්ෂක අංශවල අවධානය යොමු නොවී හසු නොවීම සඳහා හා වෙඩික්කරුවන්ට පලායාම සඳහාම හා ඒ සඳහා යොදාගත් ගිනිඅවි ප්‍රවාහනය සඳහාම මෙම බස් රථය මිලදීගෙන තිබූ බව මේ දක්වා සිදු කළ පොලිස් විමර්ශනවලදී අනාවරණය වී තිබිණි.වසන්ත සුරේන්ද්‍ර පෙරේරා නොහොත් ක්ලබ් වසන්ත ඝාතනය සම්බන්ධයෙන් මේ වන විට කාන්තාවක් ඇතුළු පුද්ගලයන් 9 දෙනකු පොලිසිය මඟින් අත්අඩංගුවට ගෙන බන්ධනාගාරගත කර ඇත.
නියෝජ්‍ය පොලිස්පති ගයන්ග මාරපන මහතාගේ උපදෙස් මත, බස්නාහිර පළාත දකුණු දිසාව අපරාධ කොට්ඨාසයේ අධ්‍යක්ෂ සහකාර පොලිස් අධිකාරී ජනක කුමාර මහතාගේ මෙහෙයවීමෙන් (පො.ප) හේමන්ත කුමාර, පොලිස් පරීක්ෂක දිනුක වීරසිංහ මහත්වරුන් ඇතුළු කණ්ඩායමක් විමර්ශන පවත්වයි.
(බණ්ඩාරගම - බිමල් ජයසිංහ)
0 Comments