අතුරුගිරිය ටැටූ මධ්‍යස්ථානයකදී ක්ලබ් වසන්ත සහ නයන වාසුල වෙඩි තබා ඝාතනය කිරීමේ සිද්ධියට සම්බන්ධ වෙඩික්කරුවන් ඇතුළු ප්‍රධාන සැකකරුවන් මේ වනවිට පොලිස් අත්අඩංගුවට පත්ව තිබෙන අතර මේ ඝාතනය සම්බන්ධ විස්තර රැසක් ඔවුන් පාපොච්චාරණය කර තිබේ.
පාණදුර බස්නැවතුමකදී අල්ලාගත් ඝාතනයට සම්බන්ධ වෙඩික්කරුවකු වන සජිත් ශ්‍රියන්ත ද සිල්වා නොහොත් 'පොඩි බලයා' නමැති වෙඩික්කරුට සහ සැකකරුවන් ප්‍රවාහනයට යොදාගත් මෝටර් රථයේ රියැදුරු ලෙස මදුසංක ද සිල්වා නොහොත් 'බහිරවයා' යන අයට නවාතැන් දුන් බව කියන පාණදුර පිංවත්ත පාසල් මාවත පදිංචිකරුවකු වන 56 හැවිරිදි හිටපු බස්නාහිර පළාත් සභා ශ්‍රී ලංකා පොදුජන පෙරමුණු මන්ත්‍රී අමල් සිල්වා ඊයේ (29) අත්අඩංගුවට ගෙන තිබිණි.
සංවිධානාත්මක අපරාධකරුවකු වන විදෙස්ගතව සැඟවී සිටින කන්ජිපානි ඉම්රාන් නමැත්තාගේ දැනුම් දීම මත ජූඩ් නමැත්තකු අමල් සිල්වා මන්ත්‍රීවරයාට දුරකතනයෙන් දැනුම්දී ඇත්තේ තම මිතුරන් දෙදෙනකු සඳහා දින කිහිපයක් නවාතැන් ලබා දෙන ලෙසයි. ඒ අනුව මන්ත්‍රීවරයා දින 25ක කාලයක් සැකකරුවන් දෙදෙනකුට සිය නිවෙසේ නවාතැන් ලබා දී ඇති නමුත් පුද්ගලයන් දෙදෙනා ක්ලබ් වසන්ත ඝාතන සැකකරුවන් බවට මන්ත්‍රීවරයා දැනගෙන ඇත්තේ නවාතැන් ලබාදී දින පහ හයකට පමණ පසු බව ඔහු පවසා ඇත.
සැකකරුවන්ගෙන් සිදුකළ ප්‍රශ්න කිරීම්වලදී අනාවරණ වී ඇත්තේ, පොලීසිය මාධ්‍ය හරහා ඔවුන් දෙදෙනා අත්අඩංගුවට ගැනීමට මහජන සහාය පැතීමත් සමඟ තමන්ට සැඟව සිටීමට තැනක් නොතිබූ බවය.
ක්ලබ් වසන්ත ඝාතනයට ආසන්න දිනකදී තමන් ඇතුළු පිරිස ඩුබායිහී සිටින පුද්ගලයකුගේ සම්බන්ධීකරණය මත අතුරුගිරිය ප්‍රදේශයේ නිවසකට පැමිණි බව ඝාතකයින් පොලීසිය හමුවේ පවසා තිබේ.
එම නිවසට පැමිණි අයකු විසින් පසුදින උදෑසන ඝාතනය කළයුතු පුද්ගලයාගේ ඡායාරූපයක් පෙන්වූ බවත් ඡායාරූපයේ සිටින පුද්ගලයා 'ක්ලබ් වසන්ත' බවට දැන නොසිටි බවත් ඔවුන් පවසා ඇත.
අනතුරුව KPI ලෙස සටහන් කරන ලද උණ්ඩ යෙදූ මැගසින් සහිත ටී.56 ගිනි අවි දෙක වෙඩික්කරුවන්ට ලබාදී ඔහු එම ස්ථානයෙන් පිටව ගොස් ඇති අතර ජුලි මස 8 වැනිදා උදෑසන වෙඩික්කරුවන් දෙදෙනා 'බහිරවයා' නමැත්තා සමඟින් මෝටර් රථයකින් අතුරුගිරියේ පිහිටි ටැටූ මධ්‍යස්ථානයට ගොස් ඝාතනය සිදු කර තිබේ.
එහිදී පළමුව ටැටූ මධ්‍යස්ථානයට ඇතුළු වූ 'පොඩි බලයා' නමැති වෙඩික්කරු සිතා ඇත්තේ, කේ. සුජීවාගේ සැමියා ක්ලබ් වසන්තගේ පෞද්ගලික ආරක්ෂකයෙක් බවටය.
ඒ අනුව ඔහුට වෙඩි ප්‍රහාර තුනක් එල්ල කළ සැකකරු අනතුරුව සිය පළමු මැගසිනයේ උණ්ඩ අවසන්වන තෙක් ක්ලබ් වසන්තට වෙඩි තැබූ බවට පොලීසියට පවසා තිබේ.
පසුව ඔහු පසුපස සිටි අනෙක් වෙඩික්කරුද ක්ලබ් වසන්තට වෙඩි තැබූ බව ඔහු පවසා ඇත.
අනතුරුව ඔවුන් මෝටර් රථයෙන් පැමිණ වෑන් රථයකට නැඟ කඩවතට ගොස් එහි සිට මාතර දක්වා බස් රථයකින් පළාගොස් තිබේ.
මාතරදී ඔවුන් සතුව තිබූ ගිනිඅවි වෙනත් අයකු පැමිණ රැගෙන ගොස් ඇති බව පොලීසිය සඳහන් කළේය. පසුව ඔවුන් කතරගම ප්‍රදේශයේ සැඟව සිටියදී 'ලොකු පැටී' ඩුබායී සිට දුරකථනයෙන් අමතා ඔවුන්ට සුබ පතා තිබේ.
තමන් විසින් ඝාතනය කර ඇත්තේ ක්ලබ් වසන්ත නමැත්තා යැයි දැනගත්තේ කතරගමදී ප්‍රවෘත්ති ප්‍රකාශ නැරඹීමේදී බවට ඔවුන් පොලීසිය හමුවේ හෙළිකර ඇත.
ඝාතනය වෙනුවෙන් අවස්ථා කිහිපයකදී මොවුන්ට රුපියල් ලක්ෂ දෙකහමාරක පමණ මුදලක් ලබාදී ඇති බවද පොලීසිය සඳහන් කළේය.
පසුව පිරිස මාතරට පැමිණ වෙන්වී ගොස් ඇති අතර පොලීසිය මොවුන් අත්අඩංගුවට ගැනීමට මහජන සහාය පැතීමත් සමඟ නැවත එක් වී විවිධ ස්ථානවල සැඟව සිට ඇති බව කියයි.
එහිදී තමන් දෙදෙනාට බස්නාහිර පළාත් සභාවේ හිටපු මන්ත්‍රීවරයකු වූ අමල් සිල්වා නමැත්තාගේ නිවසේ නවාතැන් ගන්නා ලෙසට ඩුබායි සිට උපදෙස් ලැබුණු බවද ඔවුන් පොලීසිය හමුවේ අනාවරණ කර තිබුණි.
දින 20කට අධික කාලයක් ඔවුන් එහි රැඳී සිට ඇති අතර අමල් සිල්වා විසින් ඔවුන්ගේ භාවිතය සඳහා දුරකථනයක් ද ලබාදී තිබුණු බවද පොලීසිය පැවසීය.
ඒ අනුව බස්නාහිර පළාත් සභාවේ හිටපු මන්ත්‍රී අමල් සිල්වා බස්නාහිර දකුණ අපරාධ කොට්ඨාසය මගින් අත්අඩංගුවට ගත්තේය.
ඔහුගෙන් සිදුකළ ප්‍රශ්න කිරීම්වලදී පවසා ඇත්තේ, 'කංජිපානි ඉම්රාන්' පැවසූ බව සඳහන් කරමින් 'ජූඩ්' නැමැත්තකු තමන්ට දුරකථන ඇමතුමක් ලබාදී පුද්ගලයන් දෙදෙනකුව තමන් වෙත එවා ආරක්ෂාව සපයන ලෙස පැවසූ බවය.
සැකකරුවන් වැඩිදුර විමර්ශන සඳහා අතුරුගිරිය පොලීසිය වෙත භාරදී ඇති අතර එහිදී සිදුකළ ප්‍රශ්න කිරීම්වලින් අනතුරුව මිලිමීටර් 9 වර්ගයේ පිස්තෝලයක් හා KPI ලෙස සටහන් කරන ලද ටී 56 උණ්ඩ තොගයක් සොයාගැනුණේ ඔවුන් ඝාතනයට පෙර නවාතැන්ගෙන සිටි අතුරුගිරිය නිවසේ සඟවා තිබියදීය.
මෙම සිද්ධියට සම්බන්ධ වෙඩික්කරු සහ රියැදුරු සතුව තිබී සොයා ගත් ජංගම දුරකථනය ද අමල් සිල්වා ලබාදුන් එකක් බව විමර්ශනවලින් හෙළිවී ඇත.
අමල් සිල්වා නමැත්තාට මීට පෙර අවස්ථා දෙකකදීම ගොනාකෝවිලේ රොහාගේ පාර්ශ්වය විසින් වෙඩි තබා තිබූ අතර ඔහු ඒ අවස්ථා දෙකේදීම තුවාල ලබා සියදිවි ගලවා ගත්තේය.
අමල් සිල්වා ඩුබායිහි සැඟවී සිටින කුඩු අංජු නමැත්තාගේ සමීප ඥාතියකු බවද පොලිසිය පවසයි.
විදෙස් රටවලට පලාගොස් සැඟව සිටින ප්‍රබල පාතාල කල්ලි නායකයන් දෙදෙනකු ලෙස සැලකෙන ලොකු පැටි සහ කංජිපාණී සමග හිටපු පළාත් සභා මන්ත්‍රීවරයා කාලයක් තිස්සේ සිට සමීප සම්බන්ධතා පවත්වාගෙන ගොස් ඇති බවට ද පොලිසියට තොරතුරු ලැබී ඇතැයි කියති.සැකකාර හිටපු පළාත් සභා මන්ත්‍රීවරයා මෙම පාතාල නායකයන් දෙදෙනා සමග තිබුණු ගනුදෙනු මොනවාදැයි යන්න සොයා ගැනීමට ද පොලිසිය පුළුල් පරීක්ෂණ පවත්වාගෙන යයි.
මේ වනවිට ක්ලබ් වසන්ත ඇතුළු දෙදෙනා ඝාතනයට සම්බන්ධ සිද්ධියේ සියලු සැකකරුවෝ අත්අඩංගුවට ගෙන සිටිති. මෙම ප්‍රහාරය මෙහෙයවූ ලොකු පැටී නමැත්තා ද බෙලරූෂ් රාජ්‍යයේ එරට පොලිසිය විසින් අත්අඩංගුවට ගත් අතර මේ වනවිට ඔහු ද බන්ධනාගාරගතව සිටියි.
පානදුර ජ්‍යෙෂ්ඨ පොලිස් අධිකාරි චමිල් රත්නායක මහතාගේ අධීක්ෂණයෙන් ප්‍රධාන පොලිස් පරීක්ෂක චන්න අමරසේකර මහතා ඇතුළු නිලධාරීන් විසින් අත්අඩංගුවට ගත් දෙවැනි වෙඩික්කරු සහ රියදුරු වැඩිදුර විමර්ශන සඳහා අතුරුගිරිය පොලිසිය වෙත භාරදීමට නියමිතව තිබිණි.
0 Comments