ගෙවත්තට පැමිණි වන අලියකු විදුලිය සර වද්දවා මරා පුළුස්සා දැමූ බවට අත්අඩංගුවට ගත් සැකකරු අධිකරණයට ඉදිරිපත් කළ අවස්ථාවේ සැප්තැම්බර් 03 වැනි දින දක්වා සැකකරු රිමාන්ඩ් කරන ලෙස නිකවැරටිය මහේස්ත්‍රාත් චාන්දන ලියනගේ මහතා නියෝග කළේය.
වන අලියකු ඝාතනය කර පුළුස්සා වළ දැමූ බවට සැකපිට පුද්ගලයකු අත්අඩංගුවට ගත් බව නිකවැරටිය වනජීවී කාර්යාලය පවසයි.
ඌරන්ට යෙදූ විදුලි රැහැනක පැටළී මේ වන අලියා මීට දින කීපයකට පෙර මිය යන්නට ඇතැයි වනජීවී නිලධාරීහු සැක කරති.
නිකවැරටිය කොටුඅත්තාවල ප්‍රදේශයේ පෞද්ගලික ඉඩමක මියගිය වන අලියාගේ කොටස් පුළුස්සා වළදමා ඇති බවට පසුගියදා (29) ලැබුණු තොරකුරකට අනුව වනජීවී නිලධාරීහු පරීක්ෂණ ආරම්භ කළහ.
අදාළ ඉඩම අයිතිකරු ප්‍රදේශයෙන් පිටව ගොස් සිටියදී කුරුණෑගල ප්‍රදේශයේදී අත්අඩංගුවට ගෙන ඇත.වයස අවුරුදු 47ක තිදරු පියකු වන අදාළ පුද්ගලයා වන සත්ත්ව සහ වෘක්ෂලතා ආරක්ෂණ පනත යටතේ වනජීවී දෙපාර්තමේන්තුව විසින් නිකවැරටිය මහේස්ත්‍රාත් අධිකරණය වෙත ඉදිරිපත් කිරීමට නියමිතව තිබිණි.
උගුල් යොදා වන අලියකු ඝාතනය කිරීම,ඝාතනය වසන් කිරීම ඇතුළු චෝදනා කීපයක් අදාළ පුද්ගලයාට එරෙහිව ඉදිරිපත් කිරීමට නියමිතය.
මියගිය වන අලියාගේ සිරුර විදුලි කියත් මගින් කොටස් කර පුළුස්සා වළ දමන්නට ඇතැයි සැක කෙරේ.වන අලියාගේ සිරුරු කොටස් ඊයේ (30) බැකෝ යන්ත්‍රයක ආධාරයෙන් ගොඩගන්නා ලදී.
වනජීවි දෙපාර්තමේන්තුවේ පශු වෛද්‍ය ඉසුරු හේවාකෝට්ටගේ මහතාගේ ප්‍රධානත්වයෙන් සිරුර සම්බන්ධ පරීක්ෂණ සිදු කර නැවත වලළා දැමීමට පියවර ගැනිණි.
මියගිය වන අලියා අඩි 7-8 පමණ උසින් යුතු සතෙකු බව පරීක්ෂණ වලදී අනාවරණය විය.
(එන්.එම්.රවින්ද්‍ර ප්‍රභාත්, ගයන්දි පමෝධා)
0 Comments