අනේ මාව මරන්න එපා.මට ගහන්න එපා. මං මොකද්ද කරපු වැරැද්ද... ප්‍රදීපිකාගේ මර ළතෝනිය ඇසුණු කිසිවකුත් ඒ ගමේ සිටියාදැයි සැක සහිතය. සිටියත් ඇය බේරා ගැනීමට ඉදිරිපත්වීමට තරම් ශක්තියක් ඔවුන්ට නොතිබෙන්න ඇති. ඒ අයුරින් ප්‍රදීපිකාගේ ඉරණම ලියැවී තිබුණේ ඒ නිසා විය යුතුය. හොරණ, මීවනපලාන, සිරිල්ටන්වත්ත ප්‍රදේශයට පසුගිය 24දා වෙනදා මෙන්ම හිරු උදා වුවත් කුමක් හෝ අබිරහසක් සිදු වෙමින් තිබෙන බව කිසිවකුත් දැන සිටියේ නැත.
අක්කර දොළහ, අංක 65/ 94 ලිපිනයේ පදිංචි උක්වත්තගේ ප්‍රදීපිකා කුමාරි ද (36) වෙනදා මෙන්ම තම දෛනික වැඩ කරගෙන සතුටින් සිටියේ අසල්වැසියන් සමඟ ද විනෝදයෙන් කාලය ගත කරමිනි. තිස්හය හැවිරිදි තිදරු මවක් වන ඇය නීත්‍යනුකූල සැමියාගෙන් වෙන්ව දැනට ජීවත් වන්නේ ටිරාන් සුරංග (40) සමඟය. ඔහු හොරණ නගරයේ කරත්තයක වඩේ විකුණමින් ජීවිතය ගෙන යෑමට උත්සාහ කරන අතර ප්‍රදීපිකා ද හරි හරියට ඔහුට සහාය දෙන්නේ නිවෙසේ සිට වඩේ ඇතුළු අනෙකුත් කෑම වර්ග සකසමිනි.
පිරිමි දරුවන් තිදෙනකුගේ මවක වූ ප්‍රදීපිකා කෑම විකිණීමට ද සැමියාට උදව් වෙමින් මේ ස්වයං රැකියාවේ වැඩි බර කරට ගෙන කටයුතු කරන්නේ කෙසේ හෝ ශක්තිමත් ආර්ථිකයක් ඇතිකර ගැනීමටය.
ඇගේ වැඩිමහල් දරුවා කලකට ඉහත මියගොස් ඇති අතර දෙවන පිරිමි දරුවා කුඩා කාලයේදීම සසුන්ගත වූයේ ඒ සඳහා තිබූ ඇල්ම නිසාවෙනි. 13 හැවිරිදි වියේ පසුවන බාල පිරිමි දරුවා මීවනපලාන විද්‍යාලයේ ඉගෙනුම ලබන අතර මේ වන විට නිවෙසේ සිටින්නේ ඔහු පමණි.
ප්‍රදීපිකාගේ සැමියා සුරංග උදෑසනම රැකියාවට ගිය අතර නිවෙසේ සිටි ප්‍රදීපිකා ක්‍රමයෙන් හවස් වන විට පසු දිනට කෑම සෑදීමට අවශ්‍ය කළමනා සකස් කරමින් සිටියේ තනිවමය. ඒ බාල පිරිමි දරුවාද පාසලෙන් ගිය අධ්‍යාපන චාරිකාවකට සහභාගි වී සිටි බැවිනි.
ප්‍රදීපිකාගේ නිවසේ අසල්වැසි රියැදුරකු ලෙස කටයුතු කළ පුද්ගලයකු කාලයක සිටම සිටියේ ප්‍රදීපිකා සමඟ අමනාපයෙනි. ඒ ඔහුගේ බිරිය අනියම් සම්බන්ධතාවක් මත වෙනත් පුරුෂයකු සමඟ මීට වසර පහකට පමණ පෙර පලා ගොස් ඇති අතර ඒ සඳහා ඇයට උදව් උපකාර කර ඇත්තේ ප්‍රදීපිකා බවට ඔහු සැක කරයි.
මේ නිසා ඔහු නිතර නිතර ප්‍රදීපිකා සමඟ බහින්බස්වීම් ඇතිකර ගත් අතර 24දා සවස 4.30ට පමණ ඔහු ප්‍රදීපිකා හමුවීමට ආවේ කහටපිටිය පන්නිල් කන්ද ප්‍රදේශයේ පදිංචි ඔහුගේ සහෝදරයා ද සමඟ මන්නා පිහියක් ද අතැතිවය. ඒ ප්‍රදීපිකාගේ මාරයා ද කැටුව බව ගමේ කිසිවකුත් දැන සිටියේ නැත.
එහෙත් ගතවූයේ නිමේෂයකි. ප්‍රතිවාදියාගේ මන්නා පිහි පහරින් තුවාල ලැබූ ප්‍රදීපිකා මිදුලේ ඇද වැටෙද්දී අයියා සහ මල්ලී පලා ගියේ පවනට බඳු වේගයෙනි.
ප්‍රදීපිකාගේ සැමියාගේ සහෝදරයකු වන පතිරගේ රොහාන් චතුරංග (44) පැවසුවේ මෙවැන්නකි.
...ප්‍රදීපිකා කියන්නේ මගේ මල්ලි සුරංගගේ නෝනා. මං ඉන්නේ ග්‍රවුන්ඩ් එක ගාව ගෙදර. මගේ ගෙදර ගාව ඉඳලා මීටර් හැටක් හැත්තෑවක් විතර තිබෙනවා මල්ලිලාගෙ ගෙදරට. ඊයේ හවස මම ගෙදර ඉන්නකොට දමිතුයි කළුවයි දෙන්නා ආවා. අපේ ගෙදරට මන්න පිහියකුත් අරගෙන. දමිත් හුඟ කාලෙක සිට ප්‍රදීපිකා එක්ක තරහෙන් හිටියේ. ඒවාට මල්ලිත් පැටළෙනවා. එතකොට මල්ලිගේ ප්‍රශ්නවලට මාත් මැදිහත් වෙනවා. ඒ හින්දා එයා මාත් එක්කත් තරහයි.
අපේ ගෙදර ඉස්සරහට ඇවිත් බැහැපන් එළියට කියා මාත් එක්ක රණ්ඩු වෙන්න පටන් ගත්තා. මම ඇසිඩ් බෝතලයක් ගෙනත් තියාගෙනයි ඉන්නේ. මං ඒක පෙන්නලා කිව්වා එන්න එපා වත්තට ආවොත් ඇසිඩ් ගහනවා කියලා. මං තණකොළවලට ටිකක් හලලා පෙන්නුවා. තණකොළ මැරෙනවා දැක්ක ගමන් මේ දෙන්නා යන්න ගියා. ඒ කේන්තියට මේ දෙන්නා කෙළින්ම ඇවිත් තිබෙන්නේ මල්ලිගේ ගෙදරට. ඒ වෙලාවේ මල්ලි හිටියේ නැහැ ගෙදර. නංගි විතරයි තනියම හිටියේ. ඒ හින්දා මං ආවා බලන්න. එතකොට මට ඇහුණා. මට ගහන්න එපා. මාව මරන්න එපා. මං මොකක්ද කළ වැරැද්ද කියලා නංගි කෑගහනවා. එයා මිදුලේ වැටිලයි හිටියේ. මං ඈත ඉඳලා ටිකක් වෙලා බලා ඉඳලා බයටම ආපහු හැරිලා දිව්වා. උන් ළඟ තිබුණු මන්නෙ මගේ ඉණගාවට විතර උසයි.
මං මල්ලිට මේ ගැන කියලා ආයෙත් මෙහාට ආවා. එතකොට වටපිට අය එකතු වෙලා නංගි හොරණ ඉස්පිරිතාලෙට අරගෙන ගිහින් තිබුණා. මම පස්සේ දැනගත්තා බෙල්ල කපලා නංගී නැති වුණා කියලා. හොඳ වෙලාවට පොඩි පුතා ඉස්කෝලෙන් ට්‍රිප් එකක් ගිහින් හිටියේ. නැතිනම් එයාවත් මරා දානවා.
කාලයක සිට තිබූ ආරවුලක් මුල් කර ගනිමින් කළ මේ ඝාතනයේ සැකකරුවන් අත්අඩංගුවට ගැනීමට මොරගහහේන පොලිස් ස්ථානාධිපති ප්‍රධාන පොලිස් පරීක්ෂක තුසිත වික්‍රමරත්න මහතා ඇතුළු නිලධාරීන් සිදු කළ අතර ප්‍රධාන සැකකරු සන්තකයේ තිබූ පහරදීමට යොදා ගත් මන්නා පිහියද ගමන් කළ යතුරුපැදිය ද ඔහු ඇඳ සිටි ලේ තැවරුණු ඇඳුම් ද නඩු භාණ්ඩ වශයෙන් පොලිසිය භාරයට ගෙන තිබේ. අත්අඩංගුවට පත් වූයේ සිරිල්ටන්වත්ත ප්‍රදේශයේ පදිංචි රියැදුරෙකු වන 44 හැවිරිදි ප්‍රධාන සැකකරු සහ ඔහුගේ සහෝදරයා වන පන්නිල් කන්ද ප්‍රදේශයේ පදිංචි පෞද්ගලික ආයතනයක රැකියාව කරන 40 හැවිරිදි පුද්ගලයෙකි.
පාණදුර කොට්ඨාස භාර ජ්‍යෙෂ්ඨ පොලිස් අධිකාරී චමිල් රත්නායක, හොරණ සහකාර පොලිස් අධිකාරී උදය කුමාර මහත්වරුන්ගේ නියෝග හා අධීක්ෂණය මත හොරණ මූලස්ථාන පොලිස් පරීක්ෂක චින්තක පනාවල, අපරාධ අංශයේ ස්ථානාධිපති ප්‍රධාන පොලිස් පරීක්ෂක ලක්ෂ්මන්ද සිල්වා ඇතුළු නිලධාරීහු විසින් ඉදිරි විමර්ශන සිදු කරනු ලබති.
(හල්තොට - විනීතා මානෙල් ගමගේ)
0 Comments