තමන්ගේ අවසන් කටයුතු සිදු කළ යුතු ආකාරය ගැන අවසන් කැමැත්ත ප්‍රකාශ කර ලියුමක් තබා විෂ බීජ තුවාල නිසා මිය ගිය දෙදරු මවකගේ හදිසි මරණ පරීක්ෂණයේදී වැඩිමල් පුතා අපහසුවෙන් ඇය රැකබලාගත් ආකාරය ගැන අනුවේදනීය කතාවක් හෙළි විය.
මෙලෙස මිය ගොස් තිබුණේ බුලත්කොහුපිටිය පොලිස් වසමේ උඳුගොඩ තියඹරාහේන ග්‍රාමයේ පදිංචිව සිටි 77 හැවිරිදි කාරියවසම් මද්දුමගේ සෝමාවතී නැමැති දෙදරු මවකි.
මිය ගොස් ඇති දෙදරු මවගේ දකුණු කකුලේ දණහිස ආසන්නයේ තුවාලයක් සෑදී වැඩිමහල් පිරිමි දරුවා ඇයව කෑගල්ල මහ රෝහලට ඇතුළත් කර තිබුණි.කෑගල්ල මහ රෝහලේ නේවාසිකව ප්‍රතිකාර ලබමින් සිටි මව පෙරේදා(08) සවස මිය ගොස් තිබුණි. මිය ගිය මවගේ හදිසි මරණ පරීක්ෂණය ඊයේ(09) කෑගල්ල මහ රෝහලේ හදිසි මරණ පරීක්ෂක කිත්සිරි රණසිංහ මහතා ඉදිරියේදී කෑගල්ල මහ රෝහලේ අධිකරණ වෛද්‍ය ඒකකයේ දී සිදු කෙරිණි.
එහිදී අදහස් දැක්වූ මිය ගිය වයෝවෘද්ධ මවගේ වැඩිමහල් පිරිමි දරුවා වන උපාලි ගුණවර්ධන මහතා මෙසද පැවසීය.
පියා වරකාපොළ ආරච්චිල්ලාගේ ගුණවර්ධන.මට පාලිත කියලා බාල සහොදරයෙක් සිටිනවා. මට අවුරුදු නවයක් විතර වෙද්දී තාත්තා මිය ගියා.තාත්තාගේ මහ ගෙදර බුලත්කොහුපිටිය උදුගොඩ තියඹරාහේන කියන ගම.තාත්තා මිය ගියාට පසු අම්මා මල්ලිත් අරගෙන දැරණියගල සමන්පුරගම අම්මාගේ ගමේ පදිංචියට ගියා.මම තියඹරාහේන අත්තා කිරි අම්මා ළඟ නතර වුණා.මල්ලී විවාහ වෙලා අම්මා සමඟ දැරණියගල නිවසේ පදිංචිව සිටියා.
දැරණියගල සිටිය දී අම්මාට පිළිකාවක් හැදී අපේක්ෂා රෝහලෙන් නේවාසිකව ප්‍රතිකාර ගත්තා. පිළිකාව හොඳ වුණා. ප්‍රතිකාර ගැනීම නතර කර දැම්මාට පස්සේ අම්මාගේ ස්නායු දුර්වල වෙලා මානසිකත්වය අඩු වුණා.ඊට පස්සේ මම මීට අවුරුදු 15කට පමණ ඉහතදී අම්මා මම පදිංචිව සිටින තියඹරාහේනේ නිවසට ගෙනත් පේරාදෙණිය මහ රෝහලේ නතර කළා. පස්සේ මානසික රෝග පිළිබඳ වෛද්‍යවරියක් අම්මාට ප්‍රතිකාර දුන්නා. අම්මාට තවදුරටත් ප්‍රතිකාර ගන්න කියලා කෑගල්ල මහ රෝහලට හදලා දුන්නා.
අම්මාට ඇද තුවාල ආවා.ඒ තුවාලවලට ප්‍රතිකාර කර හොඳ වුණා.දිය පට්ට තුවාල අත්වල කකුල්වල ආවා.ඒ තුවාලවලට කඹගමුව ග්‍රාමීය රෝහලෙන් ප්‍රතිකාර ගත්තා.හොඳ වුණා.අම්මාගේ තුවාල පැසවන්න ගත්තා.අම්මා කෑගල්ල මහ රෝහලට ඇතුළත් කර නේවාසිකව ප්‍රතිකාර ලබා දුන්නා. මීට දවස් තුන හතරකට ඉහතදී අම්මා බලන්න මම කෑගල්ල මහ රෝහලට ආපුවාම තුවාලය හොඳ වුණාම ගෙදර යමු කියා අම්මා මට කිව්වා.මම දවසට තුන් වතාවම අම්මා බලන්න කෑගල්ල මහ රෝහලට එනවා යනවා.
මම පෙරේදා(08) සවස 5.00ට අම්මා බලන්න ආවා. ඒ ආවාට පස්සේ මම දැක්කා අම්මා හයියෙන් හුස්ම ගන්නවා.ඒ හුස්ම ගැනීම එක පාරට නතර වුණා. පස්සේ මම වාට්ටුවේ වෛද්‍යවරුන්ට කිව්වා. වෛද්‍යවරුන් ඇවිත් අම්මාගේ පපුව මසාජ් කර බැලුවා. පස්සේ වෛද්‍යවරු කිව්වා අම්මා මිය ගිහින් කියලා.
මල්ලිට දුරකතනයෙන් කතා කර කිව්වා. මල්ලියි මමයි කෑගල්ල මහ රෝහලට ඇවිත් අම්මාගේ දේහය හඳුනාගෙන මරණ පරීක්ෂණයට පෙනී සිටියා. මට මේ මරණය ගැන සැකයක් නෑ යැයි පැවසීය.
අම්මාට මම ගොඩක් ආදරේයි.මට පුළුවන් විදියට කුලී වැඩ කර හම්බ කරලා අම්මාට කෑම බීම ගෙනත් දීලා සැලකුවා.අම්මා අසනීප වුණාට පස්සේ සියලුම කැත කුණු අත ගාලා හැමදේම කළේ මම.
මිය ගිය දෙදරු මව විසින් 2007 අප්‍රේල් 2 වැනිදා අවසන් වරට ලියා තිබුණු ලිපියක් වැඩිමහල් පිරිමි දරුවා වන උපාලි ගුණවර්ධන නැමැත්තා විසින් හදිසි මරණ පරීක්ෂක කිත්සිරි රණසිංහ මහතා වෙත ඉදිරිපත් කළේය.
එහි අවසන් කටයුතු සිදු කළ යුතු ආකාරය සටහන් කොට තිබිණි.
හදිසි මරණ පරීක්ෂක කිත්සිරි රණසිංහ මහතා මිය ගොස් ඇති මවගේ දරුවන් දෙදෙනා හමුවේ මෙසේද පැවසීය.
වර්තමානයේ සල්ලි මිල මුදල් යහමින් තිබෙන දරුවෝ මවුපියන්ට සලකන්නේ නෑ.ගහනවා බනිනවා මරණවා. මහ පාරට ගෙනත් දානවා. වැඩිහිටි නිවාසවලට ගිහිල්ලා දානවා. තව දේපොළ සල්ලි ඉල්ලලා රණ්ඩු කරනවා. මොනවා ද උඹලා අපට දීලා තිබෙන්නේ කියනවා. එවන් කාලයක මේ අම්මාට ගැහැනු දරුවකු ද නැතිව පිරිමි දරුවන්ගෙන් ඇප උපස්ථාන ලබා ගන්න වාසනාවන්ත වෙලා තිබෙනවා. ඔය දෙන්නා පුංචි කාලයේ මේ මිය ගිහින් තිබෙන අම්මා ඇසේ මුහුණේ තියාගෙන හදා වඩා ගන්න ඇති.ඒ අම්මා වයසට ගියාට පස්සේ පිරිමි දරුවන් කැත කුණු අත ගාලා පිරිසුදු කරලා රැක බලා ගත්ත එක වර්තමානයේ සිටින තරුණ දරුවන්ට හොඳ ආදර්ශයක් හදිසි මරණ පරීක්ෂකවරයා පැවසීය.
මිය ගිය මවගේ පශ්චාත් මරණ පරීක්ෂණය කෑගල්ල මහ රෝහලේ සහකාර අධිකරණ වෛද්‍ය නිලධාරි වෛද්‍ය සුරංග කුලතුංග මහතා විසින් ඊයේ(09) සිදු කරන ලදී.කකුලේ සෑදී තිබුණු තුවාලයකට විෂ බීජයක් ඇතුළු වී බහුවිධ අවයව අකර්මණ්‍ය වීමෙන් වු ස්වාභාවික මරණයක් බවට කෑගල්ල මහ රෝහලේ හදිසි මරණ පරීක්ෂක කිත්සිරි රණසිංහ මහතා තීන්දු කළේය.
බුලත්කොහුපිටිය පොලිසියේ පොලිස් කොස්තාපල් රාජපක්ෂ (99993) නිලධාරියා විමර්ශන කටයුතු සිදු කළේය.
(කෑගල්ල චමින්ද ජයලත්)
0 Comments