පන්ති කාමරය පිරිසිදු නොකළැයි විදුහල්පතිවරයා විසින් 12 හැවිරිදි සිසුවකුට කළ පහර දීමකින් සිසුවාගේ ගෙලෙහි අස්ථි දෙකකට හානි සිදු වී මාස තුනක් තිස්සේ ප්‍රතිකාර ලබමින් සිටින පුවතක් මිද්දෙණියේ පාසලකින් වාර්තා වේ. මෙලෙස විදුහල්පතිවරයාගේ පහර කෑමට ලක්ව අසාධ්‍ය තත්ත්වයට පත්ව කරාපිටිය ශික්ෂණ රෝහලට ඇතුළත් කර නේවාසික ප්‍රතිකාර ගෙන ඇත්තේ දෙබොක්කාව මහා විද්‍යාලයේ 7 වන ශ්‍රේණියේ ඉගෙනුම ලබන සිසුවෙකි. සිද්ධියට මුහුණ දුන් පාසල් සිසුවා ඒ සම්බන්ධයෙන් අපට මෙසේ පැවසීය:
“මම හතේ පන්තියෙ ඉගෙනගන්නෙ. අපේ පන්තියෙ නායකයා මම. පහුගිය මැයි දෙවැනිදා අපට පළමුවෙනි පීරියඩ් එකේ ආගම තිබුණෙ. ටීචර් ඇවිත් පන්තියේ ආගම උගන්වමින් ඉන්න කොට ප්‍රින්සිපල් සර් පන්තියේ දොරකඩට ඇවිත් 'මේ පන්තිය අතුගාල නෑනේ. කෝ පන්ති නායකයො?' කියලා ඇහුවා. මමයි, පන්ති නායිකාවයි නැඟිට්ටා. ප්‍රින්සිපල් සර් මට කතා කරලා අරගෙන, 'තමුන් පන්ති නායකයානේ. තමුන් මේවා පිරිසිදු කරවන්න ඕනි නේ!' කියලා මගේ කනෙන් අල්ලගෙන පන්ති කාමරයෙන් එළියට අරගෙන ඇවිත් අත මිට මොළවලා මගේ බෙල්ලට හයියෙන් දෙකක් ගැහුව. මට ඒ වෙලාවෙ හරියට රිදුණා. ඊට පස්සෙ ප්‍රින්සිපල් සර් මට කියලා ඒ වෙලාවෙ අපේ පන්තිය සම්පූර්ණයෙන්ම අතුගෑවෙව්වා. පන්ති නායිකාවට කිසිම දෙයක් කීවෙ නෑ. ඊට පස්සෙ මම වේදනාව ඉවසාගෙන පන්තියෙ අමාරුවෙන් ඉඳලා, ඉස්කොලෙ ඇරුණාම අම්මත් එක්ක ගෙදර යන ගමන් කීවා 'අම්මේ... මට ප්‍රින්සිපල් සර් බෙල්ලට ගැහුවා, හරිම අමාරුයි, ඉන්න බෑ...' කියලා.”
දරුවාගේ මව වන අබේසිංහ ගමාච්චිගේ ලලනි චම්පිකා සිද්ධිය විස්තර කළේ මෙලෙසිනි:
“පන්තිය අතුගාලා නෑ කියලා විදුහල්පතිවරයා මගේ දරුවගේ බෙල්ලට අත මිට මොළවලා ගහලා. දරුවා වේදනාව උහුලාගන්න බැරිව මට කිව්වා. මම ගෙදර එක්ක ගිහින් බෙල්ලේ තෙල් ටිකක් ගෑවා. රෑ වෙන කොට බෙල්ල හොඳටම ඉදිමිලා. පහුවදාම මම පාසලට ගිහින් මේ ගැන විදුහල්පතිගෙන් ඇහුවා. එතකොට විදුහල්පති මට ඉතාමත් පහත් ලෙස බැණලා එළවගත්තා. දරුවගේ බෙල්ල හොඳ නැති නිසා මම දරුවා ගෝණදෙණිය රෝහලට එක්කගෙන ගිහින් බෙහෙත් අරන් දුන්නා. ඒත් අමාරුවෙ කිසි අඩුවක් නෑ. දවස ගානේ අමාරුව වැඩි වුණ නිසා යළිත් ගෝණදෙණිය රෝහලට දරුවා අරන් ගියාම එහි වෛද්‍යවරු දරුවා රෝහලේ නවත්තලා වැඩිදුර ප්‍රතිකාර සඳහා ඇඹිලිපිටිය මූලික රෝහලට දරුවා මාරු කරලා යැව්වා. ඇඹිලිපිටිය රෝහලේ වෛද්‍යවරයා දරුවා බලලා, 'දරුවට අමාරුවක් නෑ, බොරුවට ඉස්පිරිතාලේ ඉන්න ඕනැ නෑ' කියා දරුවගේ ටිකට් කැපුවා. ඒ වෙන කොටත් දරුවාට අමාරුයි. බැරිම තැන මම කරාපිටිය රෝහලේ වෛද්‍යවරයකු හමුවෙලා දරුවා පරීක්ෂා කෙරෙව්වා. කරාපිටිය රෝහලේ වෛද්‍යවරයා දරුවා පරීක්ෂා කරලා දරුවගේ බෙල්ලේ අස්ථි දෙකක් ඇදී ඇති බව කිව්වා. මේක අවදානම් තත්ත්වයක් බවත් ඔහු පැවසුවා. ඒ අනුව දරුවා කරාපිටිය රෝහලට ඇතුළත් කරලා ප්‍රතිකාර කළා. එහිදී දරුවගේ බෙල්ලට කොලරයක් දමා, ඔළුවේ වැලි කොට්ටයක් එල්ලා තබා තිබුණා. දැන් මේ වෙන කොට දරුවා මාස 3ක් තිස්සේ නිවෙසේ ප්‍රතිකාර ගනිමින් ඉන්නවා.”
තම දරුවාට වූ අසාධාරණයට යුක්තිය ඉටු කරගැනීම සම්බන්ධයෙන් ගත් පියවර සහ එහිදී ලත් අත්දැකීම් මව මෙලෙස අප හා වැඩිදුරටත් විස්තර කළාය:
“මගේ දරුවාට විදුහල්පතිවරයා කළ මේ අමානුෂික පහරදීම සම්බන්ධයෙන් මම මිද්දෙණිය පොලිසියට පැමිණලි කළා. දරුවා මෙච්චර අසාධ්‍ය තත්ත්වයේ සිටිද්දිත් මිද්දෙණිය පොලිසිය මේක සුළු සිදුවීමක් කියා පැමිණිල්ල සමථ මණ්ඩලයට යොමු කළා. දරුවා ඇඹිලිපිටි මූලික රෝහලට ඇතුළත් කළාම රෝහලේ කිහිපදෙනකු හා අධිකරණ වෛද්‍යවරයා 'මේක ප්‍රින්සිපල් අමාරුවේ දමන්න කරන වැඩක්, මේ ළමයට කිසි ලෙඩක් නෑ' කියා ටිකට් කැපුවා. පසුව මේ සම්බන්ධයෙන් මම තංගල්ල කලාප අධ්‍යාපන කාර්යාලයට වගේම කොළඹ ගිහින් කොළඹ ළමා ආරක්ෂණ අධිකාරියට සහ ළමා හා කාන්තා කාර්යාංශයට, පොලිස්පතිට හා මානව හිමිකම් කොමිසම වෙත පැමිණිලි කළා. ඒත් මේ වෙනකන් මගේ දරුවට කිසිම සාධාරණයක් ඉටු වුණේ නෑ. මානව හිමිකම් කාර්යාලයෙන් මීට දින තුනකට කලින් ඇවිත් ප්‍රකාශයක් ලියාගෙන ගියා විතරයි. අපි වගේ අසරණ අයට දෙයක් වුණාම කියන්න කෙනෙක් නෑ. මේ සම්බන්ධ සියලු පරීක්ෂණ අතරමග නැවතිලා. මේ වෙන කොට මම හම්බන්තොට මානව හිමිකම් ප්‍රථමාධාර මධ්‍යස්ථානයට මේ අවනඩුව ලිඛිතව දැනුම් දුන්නා. මගේ දරුවට වුණ දේ හෙට වෙනත් දරුවකුට නොවිය යුතුයි.”
මේ දරුවාට සිදු වූ අසාධාරණය සම්බන්ධයෙන් නීති සහාය ඉල්ලා දරුවාගේ මව විසින් හම්බන්තොට මානව හිමිකම් ප්‍රථමාධාර මධ්‍යස්ථානය වෙත ලිඛිත පැමිණිල්ලක් සිදු කළ බව එහි සම්බන්ධීකාරක තරංග එල්. පටබැඳි මහතා දිනමිණට පැවසූ අතර, දෙබොක්කාව විද්‍යාලයේ විදුහල්පතිවරයා සහ ඇඹිලිපිටිය රෝහලේ බලධාරීන් වෙතින් මේ සම්බන්ධයෙන් ප්‍රකාශ ගැනීමට අප උත්සාහ ගත්තද දුරකතනවලට ප්‍රතිචාර නොදැක්වීම හේතුවෙන් එය අසාර්ථක විය.
(නුවන් ජයසේකර)
0 Comments