තණමල්විල ප්‍රසිද්ධ පාසලක 11 ශ්‍රේණියේ දැරියක සමූහ දූෂණය කිරීමේ සිද්ධියට අදාළව දැරිය වෛද්‍ය පරීක්ෂණය සදහා හම්බන්තොට මහ රෝහලට ඇතුළත් කර සිටියදී පොලිස් මූලස්ථානයේ උසස් පොලිස් නිලධාරියකු ලෙස පෙනී සිටිමින් දුරකතන ඇමතුමක් දුන් පුද්ගලයකු අත්අඩංගුවට ගෙන හම්බන්තොට මහේස්ත්‍රාත් අධිකරණයට ඉදිරිපත් කිරීමෙන් පසු මේ මස 28 දින දක්වා රක්ෂිත බන්ධනාගාරගත කරන ලෙස හම්බන්තොට මහේස්ත්‍රාත් හා අතිරේක දිසා විනිසුරු ඕෂධ මිගාර මහආරච්චි මහතා පෙරේදා (20) නියෝග කර තිබේ.
මෙලෙස රක්ෂිත බන්ධනාගාරගත කර ඇත්තේ අංක 114, අංගන්තැන්න, කෙන්ගල්ල, (දිගන) ලිපිනයේ පදිංචි කොඩිප්පිලි ආරච්චිලාගේ මනරංග උදයකුමාර ධර්මසේන නැමති 35 හැවිරිදි විවාහක පුද්ගලයෙකි.
සමූහ දූෂණයට ලක්වූ දැරිය වෛද්‍ය පරීක්ෂණ කටයුතු සදහා හම්බන්තොට මහ රෝහලට ඇතුළත් කර සිටියදි පසුගිය 13 වැනි දින හම්බන්තොට මහ රෝහලේ රෝහල් පොලිසියේ නිලධාරියකු සම්බන්ධ කරගෙන තමන් පොලිස් මූලස්ථානයේ උසස් පොලිස් නිලධාරියකු බව පවසමින් දැරියට දුරකතන ඇමතුමක් ලබා දී තිබේ.
ඉන්පසු තමන් පොලිස් මූලස්ථානයේ උසස් පොලිස් නිලධාරියකු බව පවසමින් දැරියගේ සාත්තුවට සිටි දැරියගේ පුංචිඅම්මාට හා පසුව දැරියටත් දුරකතනය ඔස්සේ කතා කර සිද්ධියට අදාළ විමර්ශනවල විස්තර ලබාගෙන තිබේ.
පසුව මේ සම්බන්ධයෙන් ඇති වූ සැකය මත දැරියගේ පුංචි අම්මා විසින් මේ සම්බන්ධයෙන් හම්බන්තොට මූලස්ථාන පොලිසියට පැමිණිල්ලක් ඉදිරිපත් කර තිබුණේ පසුගිය 14 වැනි දිනය.
ඒ අනුව අදාළ දුරකතන අංකය ඔස්සේ කළ පරික්ෂාවේදී එම දුරකතන අංකයට අදාළ සිම්පත හිමි පුද්ගලයා තෙල්දෙණියේ පදිංචිකරුවකු බව අනාවරණය වී ඇත. එම පුද්ගලයා සම්බන්ධයෙන් තෙල්දෙණිය පොලිසියට දැනුම් දී ඒ ඔස්සේ සැකකරුව අත්අඩංගුවට ගෙන ඇත.
එහිදි අදාල සැකකරුගෙන් ප්‍රකාශ සටහන් කර ගැනීමේදී සැකකරු පොලිසියට පවසා ඇත්තේ තමාට අයත්ව තිබූ අදාළ දුරකතන ඇමතුම ලබාගත් සිම්පත් මේ වන විට තමා සන්තකයේ නොමැති බවයි. මිට මාස 06කට පෙර තමන් එම සිම්පත සහිත දුරකතනය උකස් තැබූ බවත්, නැවත උකස බේරා ගන්නා අවස්ථාව වන විට එම සිම්පත දුරකතනයේ නොතිබුණු බවත්ය.
කෙසේ වෙතත් අත්අඩංගුවට පත් සැකකරුගෙන් ප්‍රකාශ සටහන් කර ගැනීමෙන් පසු සැකකරු හම්බන්තොට මහේස්ත්‍රාත් අධීකරණයට ඉදිරිපත් කෙරුණු අතර එහිදි සැකකරු මේ මස 28 වන දින දක්වා රක්ෂිත බන්ධානාගාරගත කරන ලෙස මහේස්ත්‍රාත්වරයා නියෝග කළේය. සිද්ධිය සම්බන්ධයෙන් හම්බන්තොට මූලස්ථාන පොලිසිය වැඩිදුර පරික්ෂණ පවත්වයි.
( නුවන් ජයසේකර)
0 Comments