රුසියාව සාම සාකච්ඡා මේසයට ගෙන්වා ගැනීම සඳහා එරට හදවත බඳු මොස්කව් නුවරට සහ ශාන්ත පීටර්ස්බර්ග් නුවරට ස්ටෝරිම් ෂැඩෝ දිගු දුර මිසයිල භාවිත කරමින් ප්‍රහාර එල්ල කිරීමට අවසර දෙන්නැයි යුක්රේන ජනාධිපති බ්ලොදිමීරි සෙලෙන්ස්කි බටහිර රාජ්‍යයන්ගෙන් ඉල්ලීමක් කර ඇතැයි ගාඩියන් පුවත්පත වාර්තා කළේය.යුක්රේනයේ නිදහස් දින සැමැරුම පෙරේදා(24) පවත්වා ඇති බවත් එහිදී යුක්රේන ජනාධිපති බ්ලොදිමීර් සෙලෙන්ස්කි කතාවක් කරමින් මෙම ඉල්ලීම කර ඇති බවත් ගාඩියන් පුවත්පත පවසයි.
යුක්රේනයට ප්‍රතිප්‍රහාර එල්ල කරනවා හැර වෙන විකල්පක් නොමැති බවත් යුක්රේනයේ ප්‍රතිප්‍රහාර කෙබඳුද යන්න සතුරාද දැනගත යුතු බවත් ජනාධිපතිවරයා පවසා ඇතැයි එම පුවත්පත ප්‍රකාශ කළේය.
ප්‍රංශය, ඉතාලිය සහ එක්සත් රාජධානිය භාවිත කරන ස්ටෝර්ම් ෂැඩෝ දිගු දුර මිසයිල භාවිත කරමින් මොස්කව් නගරය ආසන්නයේ ඇති ඉලක්කවලට ප්‍රහාරයක් එල්ල කිරීමෙන් යුක්රේනයට රුසියාවේ අභ්‍යන්තරයට ප්‍රහාර එල්ල කිරීමේ හැකියාව තිබෙන බව රුසියාවට ඒත්තු ගැන්වෙනු ඇති බවත් එමගින් සාම සාකච්ඡා මේසයට පැමිණීමට පීඩනයක් එල්ලවනු ඇති බවත් යුක්රේන බලධාරීන්ගේ අදහසවී තිබෙන බව එම පුවත්පත සඳහන් කළේය.
මොස්කව් නුවරට සහ ශාන්ත පීටර්ස්බර්ග් නුවරට ප්‍රහාරයක් එල්ල කිරීමට හැකියාව ලැබුණහොත් යුක්රේනයෙන් රුසියාවට සැලකිය යුතු තර්ජනයක් තිබෙන බවට ඒත්තු ගැන්වෙනු ඇති බවත් එවිට යුක්රේනය සමඟ සාකච්ඡා මේසයට රුසියාව පැමිණෙනු ඇති බවට යුක්රේන ජ්‍යෙෂ්ඨ නිලධාරියකු කළ යෝජනාවක් මත යුක්රේන ජනාධිපතිවරයා මෙම ඉල්ලීම කර ඇති බවත් ගාඩියන් පුවත්පත වාර්තා කළේය.මාස ගණනක සිට යුක්රේනය මොස්කව් නගරයට ප්‍රහාරයක් එල්ල කිරීමට බටහිර රාජ්‍යයන්ගෙන් අවසර ගැනීමට උත්සාහ දරන බවත් එහි විශාල අවදානමක් තිබෙන බවත් එම පුවත්පත සඳහන් කළේය. එලෙස ප්‍රහාර එල්ල කිරීමට බටහිර රාජ්‍යයන් අවසරය දුනහොත් යුද්ධය තවත් දරුණු තත්වයකට හැරීමේ අවස්ථාවක් තිබෙන බවද ගාඩියන් පුවත්පත පෙන්වා දුන්නේය.
0 Comments