තමා පැහැර ගැනීමට උත්සාහ කරන බවට ඇති වූ වැරැදි වැටහීමකින් වෛද්‍යවරියක ගිලන් රථයකින් පැන, සිද්ධිය පොලිසියට පැමිණිලි කිරීමේ සිද්ධියක් වාර්තා වේ.මේ සම්බන්ධයෙන් ගිලන් රථ රියැදුරකු සහ රෝහල් සේවකයකු අත්අඩංගුවට ගත් බව වවුනියාව නෙලුක්කුලම පොලිසිය කියයි. මෙම සිදුවීම පෙරේදා (26) රාත්‍රී කාලයේ සිදුව ඇත. එහිදී වෛද්‍යවරිය ගිලන් රථයෙන් බිමට පැනීම හේතුවෙන් තුවාල ලබා ඇත.
මෙම වෛද්‍යවරිය වවුනියාව රෝහලේ සේවය කරමින් පම්පමඩුව ප්‍රදේශයේ නේවාසිකව සිටින වෛද්‍යවරියකි.
ඇය සේවය සඳහා වවුනියාව මහ රෝහලට පැමිණීමට සූදානම් වූ අවස්ථාවේදී වවුනියාව මහ රෝහලේ සිට පම්පමඩුව ආයුර්වේද රෝහලට රාත්‍රී ආහාරය රැගෙන ගිය ගිලන් රථය ආපසු වවුනියාව මහ රෝහලට පැමිණෙමින් තිබූ නිසා ඇය එම ගිලන් රථයට පෙරේදා රාත්‍රී කාලයේ ගොඩ වී තිබේ.
ගිලන් රථයේ රියැදුරා හා තවත් අයකු සිට ඇති අතර රියැදුරා වවුනියාව - මන්නාරම මාර්ගයේ ඉන්ධන පිරවුම් හලකින් ඉන්ධන ලබා ගැනීමට ගිලන් රථය නවත්වා ආපසු එය වවුනියාව මහ රෝහලට ධාවනය කිරීම වෙනුවට අතුරු මාර්ගයකින් වෙනත් දිශාවකට ධාවනය කරන්නට පටන් ගෙන ඇත.
ඊට හේතුව විමසුවත් රියැදුරා කිසිවක් ප්‍රකාශ නොකිරීම නිසා බියට පත් වෛද්‍යවරිය ගිලන් රථයෙන් බිමට පැන තමා බලහත්කාරයෙන් පැහැර ගෙන යෑමට උත්සාහ කරන බව මහමග සිටි පිරිසට කෑගසා ප්‍රකාශ කොට තිබේ.
ජනතාව වෙනත් වාහනයකින් ගිලන් රථය හඹා ගොස් එය නතර කර රියැදුරුට හා සහායකයාට පහර දී ඔවුන් මෙල්ල කරගෙන නෙලුකුලම පොලිසිය වෙත ඔවුන් දෙදෙනා භාර දී ඇත.
වවුනියාව මහ රෝහලේ වෛද්‍යවරුන් පිරිසක් එම ස්ථානයට ගොස් ඇති අතර පොලිසිය සමඟ සාකච්ඡා කිරීමෙන් පසුව ගිලන් රථ රියැදුරා හා සහායකයා අත් අඩංගුවට ගෙන පරීක්ෂණ ආරම්භ කොට තිබේ.
එම වෛද්‍යවරිය පැහැර ගැනීමට උත්සාහ කළ රියැදුරා සිටි ගිලන් රථයද වවුනියාව මහ රෝහලට අයත් ගිලන් රථයක් බැවින් රියැදුරුට හා රිය සහායකයාට එරෙහිව වෙනම පරීක්ෂණයක් වවුනියාව මහ රෝහලේ පාලන අධිකාරිය විසින් ආරම්භ කොට ඇත.
වවුනියාව මහ රෝහලෙන් ගිය වෛද්‍යවරු පිරිස බියට පත්ව සිටි වෛද්‍යවරිය වවුනියාව මහ රෝහල වෙත රැගෙන විත් තිබේ.
වවුනියාව රෝහලට අයත් ගිලන් රථයක් වවුනියාව රෝහලේ සිට වවුනියාව පමඩුව ආයුර්වේද රෝහලේ නේවාසික රෝගී සම්බාහන වාට්ටුව වෙත රාත්‍රී ආහාර රැගෙන ගොස් ඇති අතර, ආයුර්වේද රෝහලට ආහාර ලබා දී නැවත පැමිණෙන අවස්ථාවේ ආයුර්වේද රෝහලේ සිටි වෛද්‍යවරිය තමන් වවුනියාව නව බස් නැවතුම්පොළ වෙත ඇරලවන ලෙසට රියැදුරුට සඳහන් කර, ගිලන් රථයට ගොඩ වී ඇති බව නෙලුක්කුලම පොලිසිය පැවැසීය.
එහිදී ගිලන් රථ රියැදුරු පම්පෙමඩුව පිහිටි ඉන්ධන පිරවුම්හලකින් ගිලන් රථයට ඉන්ධන පුරවාගෙන, වවුනියාව බස් නැවතුපොළට යාමට පිටත්ව ඇති අතර, වවුනියාව බස් නැවතුම්පොළ වෙත කෙටි මාර්ගයකින් ගමන් කිරීමට රියැදුරු ගිලන් රථය හරවා ඇතැයි ද පැවැසීය.මේ අවස්ථාවේ සුපුරුදු මාර්ගයෙන් ගිලන් රථය ගමන් නොකිරීම හේතුවෙන් ආයුර්වේද වෛද්‍යවරිය බිය වී ඇති අතර, පසුව ඇය ගිලන් රථයෙන් එළියට පැන, තමන් පැහැරගෙන යාමට කටයුතු කරන බවට කෑගසා ඇති බවත් කීය.
සිද්ධිය වන අවස්ථාවේ මාර්ගයේ සිටි පිරිසක් ගිලන් රථ රියැදුරා හා සේවකයා රථයෙන් බස්සවා අල්ලාගෙන ඇති අතර, සිදුවීම පිළිබඳ සිතා ගැනීමට නොහැකිව රියැදුරුගේ ඉල්ලීම මත ප්‍රදේශවාසියකු නෙලුක්කුලම පොලිසිය වෙත දැනුම් දී, නිලධාරීන් පැමිණි පසු විමර්ශනය සඳහා රියැදුරු සහ සේවකයා අත්අඩංගුවට ගෙන, පොලිස් ස්ථානය වෙත රැගෙන ගොස් ඇත. පොලිසිය වෙත රැගෙන පැමිණි ගිලන් රථ රියැදුරුගෙන් ප්‍රශ්න කිරීමේදී ඔහු පවසා ඇත්තේ, තමන් කෙටි මාර්ගයකින් වවුනියාව බස් නැවතුම්පොළ වෙත ගමන් කිරීමට පිටත් වූ බවත්, එම අවස්ථාවේ වෛද්‍යවරිය එකවර බිය වී කෑගසා, රථයෙන් බිමට පැන ඇති බවත්ය.
ගිලන් රථයේ සිටි රෝහල් සේවකයා, කෙටි මාර්ගයෙන් වෛද්‍යවරිය බස් නැවතුම වෙත රැගෙන යාම සිදු කරන බවට ද්‍රවිඩ භාෂාවෙන් ගිලන් රථ රියැදුරුට පවසා, මාර්ගය පිළිබඳ ප්‍රකාශ කිරීමේදී සිංහල පමණක් දන්නා වෛද්‍යවරිය එය තේරුම් ගැනීමට නොහැකිව, වරදවා තේරුම් ගෙන කෑගසා ඇති බවට විමර්ශනවලදී අනාවරණය වූ බවත් පොලිසිය පැවැසීය.
ද්‍රවිඩ භාෂාව නොතේරීම හේතුවෙන්, ගිලන් රථ රියැදුරු සහ සේවකයා තමන් පැහැරගෙන යනු ඇති බවට සැක සිතීම හේතූවෙන් එලෙස ඇය නොසන්සුන්ව හැසිරී ඇති බවට අනාවරණය වූ බවත්, දෙපාර්ශ්වයේ භාෂා සන්නිවේදන ගැටලුවක් මත මෙම සිද්ධිය සිදුව ඇති බවත්, වෛද්‍යවරියට කරුණු අවබෝධ කර දීම හේතුවෙන් සිද්ධිය සමථයට පත්කරගැනීමට වෛද්‍යවරිය එකඟ වූ බවත් පොලිසිය පැවැසීය.සිද්ධියට අදාළ පාර්ශ්වවල එකගතාව මත, ගැටලුවකින් තොරව අදාළ පිරිස් පොලිසියෙන් පිටව ගිය බවත් නෙලුක්කුලම පොලිසිය වැඩිදුරටත් පැවැසීය.
කෙසේ වෙතත් පරීක්ෂණයේදී අනාවරණය වී ඇත්තේ වවුනියාවේ සිට පම්පමඩුව ආයුර්වේද රෝහලට දුර කි.මී 16ක් වුවත් එක් ගමන් වාරයක් සඳහා මෙම රියැදුරා කි.මී. 20ක දුරක් සටහන් කොට ඉතිරි වන ඉන්ධන අලෙවි කරන බවයි.
දිනකට ගමන් වාර 6ක් මෙම ගිලන් රථය වවුනියාව මහ රෝහල හා පම්පමඩුව ආයුර්වේද රෝහල අතර ධාවනය කිරීම සිදුවන බැවින් ගිලන් රථ රියැදුරා මෙම ඉන්ධන වංචාව කාලයක සිට කරගෙන ගොස් ඇති බවද හෙළි වී ඇත.
(රසුල දිල්හාර ගමගේ, සිතුම් චතුරංග)
0 Comments