බංග්ලාදේශයේ අන්තර්වාර රජය අඟහරුවාදා දින බංග්ලාදේශ හමුදාවට මහේස්ත්‍රාත් සහ පොලිස් බලතල ප්‍රදානය කළේය. රාජ්‍ය පරිපාලන අමාත්‍යාංශය නිකුත් කළ නියෝගයකින් ප්‍රකාශ කර සිටියේ බංග්ලාදේශ හමුදාව ඉදිරි දින 60ක කාලයක් තුළ මෙම බලතල ක්‍රියාත්මක කරනු ඇති බවයි.
අග්‍රාමාත්‍ය ෂේක් හසීනා රටින් පලා ගොස් ඉන්දියාවේ රැකවරණය ලබා ගැනීමෙන් පසු බංග්ලාදේශ හමුදාපති ජනරාල් වකෙරුස් සමාන් කෙටි කාලයකට බලය භාර ගත්තේය. කෙසේ වෙතත්, අගෝස්තු 7 වන දින අන්තර්වාර රජය දිවුරුම් දීමේ උත්සවයෙන් පසු ඔහු පසුබිමට වී සිටියේය. හමුදාවට මහේස්ත්‍රාත් බලතල පැවරීමෙන් හමුදාවට පොලිස් සහ බන්ධනාගාර සම්බන්ධ කාර්යයන් මෙන්ම විධායක මහේස්ත්‍රාත්වරුන්ගේ කාර්යය ඉටු කිරීමට හැකි වනු ඇත.
අගෝස්තු 5 වන දින ෂේක් හසීනා රජය බිඳ වැටීමෙන් පසු බංග්ලාදේශයේ පොලිස් සේවය දැඩි ලෙස බලපෑමට ලක් වී ඇත. මන්ද යත් රජය බිඳ වැටීම හේතුවෙන් හසීනා විරෝධී උද්ඝෝෂකයින්ට එරෙහිව දැඩි ක්‍රියාමාර්ග ගැනීමේදී පොලීසිය සිදු කළ කාර්යභාරය නිසා ජනතාවගෙන් පළිගැනීම්වලට ලක්වීමට පොලීසියට සිදු විය.පොලිස් ස්ථාන ගණනාවක් ගිනි තැබීමෙන් පසු බංග්ලාදේශ පොලිස් සේවය පසුගිය කාලයේ ඇණ හිට තිබුණි. දැන් හමුදාව එම වගකීම ගෙන තිබේ.
මොහොමඩ් යුනුස් ප්‍රමුඛ අන්තර්වාර රජය අගෝස්තු 7 වන දින බලයට පත් වුවද, එතැන් සිට අඛණ්ඩව නීතිය හා සාමය පිළිබඳ අභියෝගවලට මුහුණ දී ඇත.
0 Comments