හැටන් නගරයේ බිම වැටී තිබූ ණය කාඩ්පතක් අහුලාගත් පාසල් සිසුවකු එම කාඩ්පත භාවිත කර රුපියල් ලක්ෂ හතරහමාරක් පමණ වටිනා භාණ්ඩ මිල දී ගෙන ඇති බව හැටන් මූලස්ථාන පොලිසියේ ප්‍රධාන පොලිස් පරීක්ෂක රංජිත් ජයසේන මහතා පැවසීය.
ඉකුත්දා (01) හැටන් නගරයේ වැටී තිබූ ණය කාඩ්පත අහුලා ගත් සැකකාර සිසුවා හැටන් නගරයේ සුපිරි වෙළෙඳසලකින් ආහාර මිල දී ගැනීමෙන් පසු මහනුවර ප්‍රදේශයෙන් දුරකතනයට භාවිත කරන රුපියල් ලක්ෂයක් පමණ වටිනා උපකරණයක්, කාය වර්ධනය සඳහා භාවිත කරනු ලබන පෝෂ්‍යපදාර්ථ කිහිපයක් සහ පාවහන් යුගල් කිහිපයක් මිල දී ගෙන ඇත.
බගවන්තලාව ප්‍රදේශයේ පදිංචිකරුවකුට අයත් ණය කාඩ්පතක් අස්ථානගත වූ බවත් අස්ථානගත වූ ණය කාඩ්පතින් හැටන් සහ මහනුවර නගරයෙන් රු ලක්ෂ හතරහමාරක් පමණ වටිනා භාණ්ඩ කිසියම් පුද්ගලයකු විසින් මිල දී ගෙන ඇති බවට හැටන් පොලිසියේ අපරාධ විමර්ශන අංශයට කරන ලද පැමිණිල්ලක් මත අපරාධ විමර්ශන අංශයේ නිලධාරීන් විමර්ශනයක් සිදු කර සැකකාර සිසුවා පසුගියදා (06) අත්අඩංගුවට ගෙන ඇත.
එම භාණ්ඩ මිල දී ගත් එක් ආයතනයකින් සැකකාර සිසුවා මිල දී ගත් දුරකතන උපාංගයක වගකීම් සහතිකය නිකුත් කිරීමට සිසුවාගේ සත්‍ය නම, ලිපිනය සහ දුරකතන අංකය දී තිබූ නිසා සැකකාර සිසුවා අත්අඩංගුවට ගැනීමට හැකි වූ බවත් එම සිසුවා විසින් මිල දී ගත් භාණ්ඩ ඔහුගේ මුහුණුපොතේ දමා තිබූ බවත් පොලිස් විමර්ශනවලදී අනාවරණය වී ඇත.
හැටන් ප්‍රදේශයේ ප්‍රධාන පාසලක 13 වසරේ අධ්‍යාපන ලබමින් සිටින 18 හැවිරිදි සැකකාර පාසල් සිසුවා පසුගියදා (06) හැටන් මහේස්ත්‍රාත් අධිකරණයට ඉදිරිපත් කිරීමෙන් පසු හැටන් දිසා විනිසුරු සහ මහේස්ත්‍රාත් එම්. ෆරුක්ඩින් මහතා රුපියල් ලක්ෂ පහක ශරීර ඇප මත මුදාහැර එම නඩුව යළි මේ මස 18 වැනිදා කැඳවීමට නියෝග කළේය.
(හැටන් - රංජිත් රාජපක්ෂ)
0 Comments