ලෙබනනයේ වයර් රහිත සන්නිවේදන උපකරණවලින් සිදුවූ දෙවන රැල්ලේ පිපිරීම් මගින් අවම වශයෙන් පුද්ගලයින් 20 දෙනෙකු මරණයට පත්ව තවත් 450කට වැඩි පිරිසක් තුවාල ලබා ඇති බව එරට සෞඛ්‍ය අමාත්‍යාංශය පවසයි.
ඊයේ පේජර් උපකරණ පිපිරී 12 ක් මියගොස් 3000 ක් පමණ තුවාල ලබාතිබූ අතර දෙවැන්න වොකී-ටොකී උපකරණ පුපුරුවා යාමක් ලෙස වාර්තා විය.මෙම පිපිරීම් ඉලක්ක කර ඇත්තේ හිස්බුල්ලා සාමාජිකයින් භාවිතා කරන වොකී-ටොකී උපකරණ වන අතර
මෙම පිපිරීම් සිදුවී ඇත්තේ සංවිධානයේ බලකොටු වන දකුණු බෙයිරූට් උපනගර, බෙකා මිටියාවත සහ දකුණු ලෙබනනය යන ප්‍රදේශවලය.
මුල් ප්‍රහාරය සඳහා හිස්බුල්ලා සංවිධානය ඊශ්‍රායලයට චෝදනා කළ නමුත් ඊශ්‍රායලය ඒ පිළිබඳව අදහස් දක්වා නැත.
මෙම සිදුවීම් ඊශ්‍රායල ආරක්ෂක අමාත්‍ය යෝව් ගැලන්ට් විසින් "යුද්ධයේ නව අදියරක්" ප්‍රකාශයට පත් කිරීම සහ ඊශ්‍රායල හමුදා කොටසක් උතුරට යළි යෙදවීම සමඟ සම කාලයක සිදු විය.
මෙම පිපිරීම් හිස්බුල්ලා සංවිධානයට එල්ල වූ සැලකිය යුතු පහරක් වන අතර ඔවුන්ගේ සමස්ත සන්නිවේදන ජාලයටම ඊශ්‍රායලය කාවැදී ඇති බවට හැඟවීමක් ලබා දෙයි.
බොහෝ ලෙබනන වැසියන් මෙම සිදුවීම් පිළිබඳව කම්පනයට පත්ව සිටින අතර, විශේෂයෙන්ම පෙර දින පිපිරීම්වල ගොදුරු බවට පත්වූවන්ගේ අවමඟුල් අතරතුර සමහර පිපිරීම් සිදුවූ නිසා ඔවුන් කෝපයට පත්ව සිටිති.
පිපිරීම් නිසා සටන්කරුවන් 13 දෙනෙකු, මිය ගොස් ඇති බව හිස්බුල්ලා සංවිධානය නිවේදනය කළේය. එසේම දේශසීමාව අසල සහ ඊශ්‍රායල් අල්ලාගත් ගෝලන් කඳුකරයේ ඊශ්‍රායල හමුදා ඉලක්ක කර රොකට් ප්‍රහාර එල්ල කළ බව ද සංවිධානය වාර්තා කළේය.
ලෙබනන රතු කුරුස සංවිධානය විවිධ ප්‍රදේශවල සිදුවූ පිපිරීම්වලට ප්‍රතිචාර දැක්වූ අතර, පිපිරීම් "වොකී-ටොකී ඉලක්ක කර ගත්" බව සෞඛ්‍ය අමාත්‍යාංශය තහවුරු කළේය. සමහර පිපිරීම්වලට ජපානයේ ICOM සමාගම විසින් නිෂ්පාදනය කරන ලද, දැන් නිෂ්පාදනය නවතා ඇති ICOM-V82 අතේ ගෙන යා හැකි VHF ගුවන්විදුලි යන්ත්‍ර සම්බන්ධ වී ඇත.
හිස්බුල්ලා සංවිධානයේ හදිසි අවස්ථා සන්නිවේදන පද්ධතියේ කොටසක් ලෙස දහස් ගණනක් වොකී-ටොකී උපකරණවල බෝම්බ සවි කර ඒවා හිස්බුල්ලා වෙත ලබා දී ඇති බවට ඊශ්‍රායල බුද්ධි සේවා විසින් යෝජනා කර ඇත. මෙම උපකරණ හිස්බොල්ලා සංවිධානය විසින් මාස පහකට පෙර මිලදී ගෙන ඇති අතර, එය පෙර පිපිරීම්වලට සම්බන්ධ පේජර් උපකරණ මිලදී ගත් කාලයට ආසන්න වේ.
මෙම ප්‍රහාර නිසා බරපතල තුවාල සිදු වී ඇති අතර, බෙයිරූට්හි අක්ෂි වෛද්‍යවරයෙකු වාර්තා කර ඇත්තේ ඔහු ප්‍රතිකාර කළ රෝගීන්ගෙන් අවම වශයෙන් 60%ක් එක් ඇසක් අහිමි වී ඇති බවත්, බොහෝ දෙනෙකුට අතක් ද අහිමි වී ඇති බවත්ය.
(බීබීසී ඇසුරිනි - Gossiplankanews.com)
0 Comments