ශ්‍රී ලංකාවේ හෙට (21) පැවැත්වෙන ජනපතිවරණය පිළිබඳව බ්‍රිතාන්‍යයේ පළවන 'ද ගාර්ඩියන්' පුවත්පත අද (20) පළ කර ඇති ලිපියක පරිවර්තනය පහතින්.
වසර දෙකකට පමණ පෙර, ශ්‍රී ලංකාව අර්බුදයක සහ ප්‍රබෝධාත්මක ද්විත්ව මානසිකත්වයකට මුහුණ දුන්නේය. 'අරගලය' නමින් හැඳින්වූ තරුණ නායකත්වයෙන් යුත් ව්‍යාපාරයක් සාර්ථකව අධිකාරවාදී ජනාධිපති ගෝඨාභය රාජපක්ෂ සහ ඔහුගේ පවුලේ රාජවංශය පෙරළා දැමීය. ඔවුහු දූෂිත ගනුදෙනු සහ ප්‍රතිපත්ති හරහා රට බංකොලොත් කිරීමේ චෝදනාවට ලක්ව සිටියහ. උද්ඝෝෂකයෝ රාජපක්ෂගේ ජනාධිපති මන්දිරය ආක්‍රමණය කළ අතර, එහිදී ඔවුන් ඔහුගේ ඇඳ මත වාඩි වී, ඔහුගේ පිහිනුම් තටාකයේ පිහිනා, ඔහුගේ ව්‍යායාමශාලාවේ ව්‍යායාම කළහ.
රාජපක්ෂගේ නික්මයාමෙන් පසු ප්‍රථම වරට නව ජනාධිපතිවරයෙකු තේරීම සඳහා හෙට (21) ශ්‍රී ලංකාව ඡන්දයට යන විට, බොහෝ දෙනා පවසන්නේ විනාශකාරී ආර්ථික අර්බුදය තවදුරටත් පවතින බවත් - අරගලයේ ප්‍රබෝධය මැකී ගොස් ඇති බවත්ය.
වසර 26කට වැඩි කාලයක් සිවිල් යුද්ධයකට මුහුණ දුන්, සහ තවමත් ජාතික වශයෙන් බෙදී සිටින රටක් ලෙස, ශ්‍රී ලංකාවේ පසුගිය මැතිවරණ සැමවිටම ජාතිය, ආගම සහ යුද්ධය පිළිබඳ ගැටලු වලින් පීඩාව දරා ඇත. රටේ බලය සහ ධනය බොහෝ දුරට සිංහල බෞද්ධ බහුතරය සතුව පවතින අතර, දෙමළ සුළුතරය තවමත් ආර්ථික හා දේශපාලනික වශයෙන් නොසලකා හැර ඇත.
කෙසේ වෙතත් මෙවර එය ප්‍රධාන වශයෙන් ආර්ථිකය පිළිබඳ මැතිවරණයකි.
ප්‍රධාන අපේක්ෂකයින් තිදෙනෙකු ඉදිරියට පැමිණ සිටිති: රාජපක්ෂගන් පසු පත් කරන ලද වත්මන් ජනාධිපති රනිල් වික්‍රමසිංහ; විපක්ෂ නායක සජිත් ප්‍රේමදාස; සහ මෑතකදී ජනප්‍රියත්වයෙන් ඉහළ ගිය වාමාංශික සන්ධානයේ නායක අනුර කුමාර දිසානායකයි. පැහැදිලි ජයග්‍රාහකයෙකු බිහි නොවුවහොත්, දැනටමත් අසහනයට පත්ව සිටින සහ ආර්ථික වශයෙන් අස්ථාවර ශ්‍රී ලංකාව තවදුරටත් කලබැගෑනියට පත් විය හැකි බවට සැලකිලි මතුව තිබේ.
ජනාධිපති ධුර කාලයේ අවසාන වසර දෙක තුළ රාජපක්ෂගෙන් පසු බලයට පත් වූ හය වතාවක් අගමැති ධුරය දැරූ වික්‍රමසිංහ, බලය රඳවා ගැනීමට උත්සාහ කරමින් සිටී. ඔහු තමන්ව ආර්ථික ස්ථාවරත්වයේ මුහුණුවර ලෙස ඉදිරිපත් කරමින් සිටී. ජාත්‍යන්තර මූල්‍ය අරමුදලෙන් (IMF) ඩොලර් බිලියන 2.9ක ආධාර මුදලක් සාකච්ඡා කර ගැනීමට සමත් වූ අතර, විදේශ විනිමය සංචිත ශක්තිමත් කිරීම සහ උද්ධමනය පහත හෙළීමට ද කටයුතු කර ඇත.
කෙසේ වෙතත්, තවදුරටත් පෙට්‍රල් පිරවුම්හල් වල දිගු පෝලිම් නොමැති වුවද සහ අත්‍යවශ්‍ය විදේශ ආනයන නැවත ලැබී ඇති නමුත්, ශ්‍රී ලංකාවේ දරිද්‍රතා මට්ටම පසුගිය වසර දෙක තුළ දෙගුණ වී ඇති අතර, එය රටේ ජනගහනයෙන් 25%ක් දක්වා ඉහළ ගොස් තිබේ. වික්‍රමසිංහගේ ජනප්‍රිය නොවන ප්‍රතිපත්ති වලට දොස් පවරා ඇති අතර බොහෝ දෙනා ජාත්‍යන්තර මූල්‍ය අරමුදලේ ණය සඳහා ඇති දැඩි කොන්දේසි ගැන ද ප්‍රශ්න කර තිබේ.
අප කළ විමසීමකදී අත්තනායක ලලිතා (72) පැවසුවේ මෙම මැතිවරණය අවසානයේ බොහෝ කල් තිස්සේ අවශ්‍ය වූ දේශපාලන පරිවර්තනයක් සිදු කරනු ඇතැයි තමා බලාපොරොත්තු වන බවයි. "අපි මේ ක්‍රමයේ සම්පූර්ණ වෙනසක් බලාපොරොත්තු වෙනවා," ඇය පැවසුවාය. "අපිට මේ විදිහට ජීවත් වෙන්න පුළුවන්ද?" ඇය පැවසුවාය.
වෙනසක් සඳහා වූ කැමැත්ත මගින් වාමාංශික නායක දිසානායකට සහාය දැක්වීමේ රැල්ලක් ඇති කර තිබේ. ඔහු මාක්ස්වාදී ජාතික ජන බලවේගය (NPP) සන්ධානය නායකත්වය දරයි. ශ්‍රී ලංකාවේ වත්කම් සොරකම් කළ අයට එරෙහිව ක්‍රියා කරන බවට පොරොන්දු වෙමින් සහ ව්‍යුහාත්මක වෙනසක් සහ දූෂණය අවසන් කිරීමේ පොරොන්දු වන ශක්තිමත් ව්‍යාපාර තුළින් විශාල පිරිසක් ඔහුගේ රැලි වලට ඇදී එන්නේ අරගලයේ මූලික ඉල්ලීම් වූ මේවාට ආකර්ෂණය වීමෙනි.
කෙසේ වෙතත්, වසර දෙකකට පෙර වීදි බැස්ස සියලු දෙනා මෙම මැතිවරණයේදී ඔවුන්ගේ ප්‍රධාන වෙනස්කම් සඳහා වූ ඉල්ලීම් නියෝජනය වන බවට විශ්වාස නොකරති. "සිදුවූයේ අප බලාපොරොත්තු වූ දේ නොවේ. අර්බුදය නව දිශාවකට හැරුණා, ආර්ථික දුෂ්කරතා තවමත් තියෙනවා." ඇතැමෙකු පවසා තිබේ.
0 Comments