දිවයිනේ විවිධ ප්‍රදේශවල පුද්ගලයන් හා මිතුරු වී ඔවුන් හා එක්ව ආහාර පාන ගෙන ඒවාට කිසියම් පෙති වර්ගයක් කලවම් කොට සිහි මූර්ජා වීමට සලස්වා ඔවුන් සන්තකයේ ඇති රන් භාණ්ඩ, මුදල් හා දේපල කොල්ලකෑමට පුරුදුව සිටි රජයේ මුද්‍රණ දෙපාර්තමේන්තුවේ කාර්යාල කාර්ය සහායකයකු හා ඔහුගේ අනියම් බිරිය අත්අඩංගුවට ගත් බව බස්නාහිර පළාත දකුණ අපරාධ කොට්ඨාසය පවසයි.
ඒ සමඟ සිහි මූර්ජා කිරීමට භාවිත කළ හඳුනා නොගත් මත්පෙති 15, ත්‍රිරෝද රථය, ජංගම දුරකතන හතරක්, රුපියල් ලක්ෂ 27ක් වටිනා රන් භාණ්ඩ පොලිස් භාරයට ගෙන ඇත.
වැලිකඩ වාද්දුව සහ කොටුව යන පොලිස් ස්ථානවලට මේ හා සම්බන්ධ පැමිණිලි ලැබී තිබූ අතර, වැලිකඩ පොලිස් ස්ථානයට ලැබී තිබූ රුපියල් ලක්ෂ 15ක් වටිනා දේපළ හා රන් භාණ්ඩ කොල්ලකෑමේ සිද්ධියක් සම්බන්ධයෙන් සිදු කළ විමර්ශනයකදී බස්නාහිර පළාත දකුණ අපරාධ කොට්ඨාසයේ පොලිස් සැරයන් (38723) රංජිත් නිලධාරියාට ලද තොරතුරකට අනුව මෙම ජාවාරමේ සුල මුල අනාවරණය කර ගැනීමට හැකි වූ බව පැවසේ.
සැකකාර කාන්තාව රාජගිරිය ප්‍රදේශයේ පුද්ගලයකු හා මිතුරු වී ඔහුව ඔබේසේකරපුර ප්‍රදේශයේ ලැගුම් හලකට රැගෙන ගොස් බීම බෝතල් දෙකක් ගෙන්වාගෙන ඉන් එක් බෝතලයකට මත්පෙති දමා ඔහු සිහි මූර්ජා කොට පවුම් 08ක් වටිනා රන්මාල දෙකක් හා ජංගම දුරකතන දෙකක් සොරාගෙන පලාගොස් තිබුණි. පසුව මෙම කාන්තාව වෙ‍ෙළඳසලට ගොස් යළි එන බව හෝටලයට පවසා පලා ගොස් තිබූ අතර, කාන්තාව යළි නොපැමිණීම හේතුවෙන් ලැගුම්හල් සේවකයන් කාමරය පරීක්ෂා කිරීමේදී පුද්ගලයකු සිහි මූර්ජා වී සිටිනු දැක තිබේ. පසුව මේ බවට පොලිසිය දැනුවත් කිරීමෙන් පසුව ප්‍රතිකාර සදහා ඔහු රෝහල්ගත කළ අතර, පියවි සිහියට පැමිණ ඇත්තේ දින තුනකට පසුව බව පොලිසිය කියයි.
මීට සම්බන්ධ කාන්තාව රාජගිරිය උස්වත්ත ප්‍රදේශයේ කුලී නිවසක රැඳී සිටියදී අත්අඩංගුවට ගනු ලැබූ අතර, ඇයගෙන් ලද තොරතුරකට අනුව මෙම ජාවාරමට ආධාර අනුබල දුන් ඇයගේ අනියම් සැමියා සිය සේවා ස්ථානයේදී ත්‍රිරෝද රථය ද සමඟ අත්අඩංගුවට ගනු ලැබූ බව පොලිසිය පවසයි.
ඉන්පසුව දෙදෙනාගෙන් සිදු කළ ප්‍රශ්න කිරීම්වලදී ඉකුත් මැයි 31දා වාද්දුව ප්‍රදේශයේ අඹුසැමි යුවළක් හා මිතුරු වී ඔවුන්ගේ පුතාට රැකියාවක් ලබා දෙන බව පවසා නිවසට පැමිණ තිබූ අතර, එහිදී සෑදූ කිරි කෝප්ප දෙකකට මත්පෙති දමා සිහි මූර්ජාකොට ඔවුන් සන්තකයේ තිබූ රුපියල් ලක්ෂ හයක් වටිනා රන්මාලයක් මුදු දෙකක් හා කරාබු යුගලයක් කොල්ලකා පලා ගොස් තිබුණි.
ඒ අනුව තවදුරටත් ප්‍රශ්න කිරීමේදී ඉකුත් මැයි 11දා සැකකාර කාන්තාව මොරටුවේ සිට කොල්ලුපිටිය දක්වා ත්‍රිරෝද රථයකින් කුලී ගමනක් යන මුවාවෙන් පැමිණ මුහුදු මාර්ගයේ අතුරු පාරක ත්‍රිරෝද රථය නවතා රියැදුරු හා මිතුරු වී දෙදෙනාට අයිස්ක්‍රීම් දෙකක් මිලයට ගෙන ඉන් එකකට මත්පෙති දමා රියැදුරුට දී ඔහු එය ආහාරයට ගැනීමේදී ඔහුගේ සිහි මූර්ජා වීමත් සමඟ ඔහු සන්තකයේ තිබූ පවුම් එකහමාරක රන්මාලයක් හා රුපියල් 7,500ක් කොල්ලකා පලා ගොස් ඇති බවට තොරතුරු අනාවරණය වූ බව පැවසේ. පසුව දෙදෙනාගෙන් ලද තොරතුරුවලට අනුව ගාල්ල, කොල්ලුපිටිය, නුගේගොඩ, බොරැල්ල ඇතුළු ප්‍රදේශ ගණනාවකට උකස් කර තිබූ රන් භාණ්ඩ හා දේපළ සොයාගෙන ඇත.
රජයේ මුද්‍රණ දෙපාර්තමේන්තුවේ කාර්යාල කාර්ය සහායකයකු ලෙස සේවය කරන සැකකරු සේවය නිමවා සිය ත්‍රිරෝද රථයෙන් බොරැල්ල ප්‍රදේශයේ කුලී ගමන් යද්දී මීට මාස 07කට පෙර කාන්තාව හා මිතුරු වී රුපියල් 17,000ක කුලියට මෙම නිවසේ අඹුසැමියන් ලෙස වාසය කර ඇතැයි විමර්ශනවලදී අනාවරණය වී තිබේ. විවාහකයකු වන සැකකරුට කුඩා දරුවන් දෙදෙනකු සිටින බවත් සැකකාරිය ද විවාහක බවත් අනාවරණය වී තිබේ.
සැකකරුගේ මෙහෙයවීම මත ගණිකා වෘත්තියේ යෙදෙමින් කාන්තාව මෙම ජාවාරම කරගෙන ගොස් ඇති බව පැවැසේ. පොලිස් භාරයට ගත් මත්පෙති හඳුනා ගැනීම සඳහා රස පරීක්ෂකවරයා වෙත යොමු කිරීමට නියමිත අතර, සැකකාර කාන්තාව පෑලියගොඩ සහ මරදාන ප්‍රදේශවල සිදු කළ මෙවැනිම සිද්ධීන් තුනක් සම්බන්ධයෙන් අලුත්කඩේ අධිකරණයේ නඩු ක්‍රියාත්මකය.
අත්අඩංගුවට පත් අහංගම (43) සහ නුවර (32) පදිංචිකරුවන් වන අනියම් යුවළ අධිකරණයට ඉදිරිපත් කිරීම සඳහා වැලිකඩ පොලිසියට (13) දා භාර දීමට නියමිතව තිබුණි. සිද්ධිය සම්බන්ධයෙන් බස්නාහිර පළාත දකුණ අපරාධ කොට්ඨාසයේ අධ්‍යක්ෂ සහකාර පොලිස් අධිකාරි ජනක කුමාර මහතාගේ අධීක්ෂණය යටතේ, එහි ස්ථානාධිපති පොලිස් පරීක්ෂක සුමිත් ජයසිංහ මහතාගේ උපදෙස් මත ඒකක 02 භාර ස්ථානාධිපති උප පොලිස් පරීක්ෂක චින්තක දසනායක මහතාගේ මෙහෙයවීමෙන් පොලිස් සැරයන් (38723) රංජිත්, (60161) වසන්ත, (73067) අනුරාධ, පො.කො (83774) සුදීර කා.පො.කො (9006) අනූෂා ඇතුළු නිලධාරීහු වැටලීම සිදුකොට ඉදිරි පරීක්ෂණ පවත්වති.
( කොට්ටාව - ප්‍රදීප් කුමාර, මීගොඩ - පී.කේ. කත්‍රිආරච්චි)
0 Comments