ශ්‍රී ලංකාවට දකුණු දෙසින් වූ ගැඹුරු මුහුදේදී මෙරට බහුදින ධීවර යාත්‍රාවක මත්ස්‍යයකු සපා කෑමෙන් තුවාල ලබා අසාධ්‍යව සිටි ධීවරයකු කොළඹ සමුද්‍රීය සෙවීම් හා මුදා ගැනීම් සම්බන්ධීකරණ මධ්‍යස්ථානයේ සම්බන්ධීකරණයෙන්, විදෙස් නෞකාවක් වෙත ලබාගැනීමෙන් අනතුරුව, ඊයේ (18) ගොඩබිමට රැගෙනවිත් ප්‍රතිකාර සඳහා කොළඹ, ජාතික රෝහල වෙත යොමු කිරීමට නාවික හමුදාව මඟින් කටයුතු කර තිබේ.
වෙන්නප්පුව ධීවර වරායෙන් පෙරේදා (17) ධීවරයන් හත් දෙනකු සමඟ ධීවර කටයුතු සඳහා පිටත්ව ගොස් තිබූ “Beula 02” නමැති බහුදින ධීවර යාත්‍රාවේ සිටි ධීවරයකු, ධීවර කටයුතු සිදු කරමින් සිටියදී මත්ස්‍යයකු සපා කෑමෙන් තුවාල ලබා අසාධ්‍යව ඇති බවත් එම ධීවරයා වෙත ප්‍රතිකාර කිරීම සඳහා කඩිනමින් ගොඩබිමට රැගෙන ඒමට නාවික හමුදාවේ සහාය ලබාදෙන ලෙසත් ධීවර හා ජලජ සම්පත් දෙපාර්තමේන්තුව මඟින් නාවික හමුදා මූලස්ථානයේ පිහිටි කොළඹ, සමුද්‍රීය සෙවීම් හා මුදා ගැනීම් සම්බන්ධීකරණ මධ්‍යස්ථානය වෙත දැනුම් දීමක් සිදු කර තිබිණි.
ඒ අනුව, අසාධ්‍ය තත්ත්වයේ සිටි ධීවරයා මුදා ගැනීම සඳහා සහාය වන ලෙස, එම මුහුදු ප්‍රදේශය ඔස්සේ ගමන් ගත් ‘MT Kiel Express’ නමැති විදේශීය නෞකාව දැනුවත් කර ඇත.
අනතුරට පත් වූ ධීවරයා ‘MT Kiel Express’ නෞකාව වෙත ලබා ගැනීම සිදු කෙරී ඇති අතර, මූලික ප්‍රථමාධාර ලබාදෙමින් ඊයේ (18) උදෑසන කෞළඹ වරාය ආසන්නයට රැගෙන ඒමෙන් අනතුරුව, බටහිර නාවික විධානයට අනුයුක්ත වේග ප්‍රහාරක යාත්‍රාවක් යොදවා රෝගී ධීවරයා කඩිනමින් ගොඩබිමට රැගෙනවිත් මෙලෙස ප්‍රතිකාර සඳහා කොළඹ ජාතික රෝහල වෙත යොමු කිරීමට නාවික හමුදාව මඟින් කටයුතු කර තිබේ.
(රක්ෂණ ශ්‍රියන්ත)
0 Comments